2 Byambo 7 - Libuka Lya Kuyela

Kukundika Litala lya Nyambi ya Ngula

¹ Oho Mwene Sholomoni amanishile lilombelo lyendi, mundilo wa muyilu walashekelele hanci pe wahokeshele zinkombela ziya batupwile, pe wuwahe wa lumuni lwa kumwesha lwaku meho a Nyambi ya Ngula lwenzalishile Litala lya Nyambi.

² Ndaba Litala lya Nyambi lyenzalile na wuwahe wa Nyambi ya Ngula, pe bakankombela kaliha batweshele kwinginamo.

³ Oho bantu ba Ishalela bamonene mundilo hiwuwa muyilu na liyeye linenzala mu Litala lya Nyambi, bafukumanine hinga bakinka zimpala hanci, pe balemeshele Nyambi ngayi, “Yemezenu Nyambi ya Ngula, ndaba nengi wa muwahe, ndaba nceshe zendi za mwaya myaka.”

⁴ Niho kuyo Mwene Sholomoni na bantu nimwabo batupwile zinkombela kuli Nyambi ya Ngula,

⁵ wakombelelele bankunzi 22,000 na bambelele 120,000 kwinga zinkombela za kulilumikila. Pe niho Mwene Sholomoni na bantu nimwabo bafungwile Litala lya Nyambi.

⁶ Bakankombela bemanine mu myanya iya yapanikiwile kukwabo, Balevi oho bayemezelenga Nyambi ya Ngula na bya kumbetesha biya abazishile Mwene Ndavita, oho abatongwezele luno lwimbo ngayi, “Shishemo shendi sha mwaya myaka.” Bakankombela bashibilenga zimpandula oho Baishalela nimwabo hinga bemana.

⁷ Sholomoni wazilikile mbalila ya hakati ka shipango mwanya wakumbili ya Litala lya Nyambi ya Ngula, pe wakombelele kuyo zinkombela za kuhokesha za nzimba na zintupu za mpeka na mazi aku zinkombela za kulilumikila. Watendele nehe ndaba kaala ka lubemba eshe azikile shengile shashishe shikuma ha zintupu nimwazo eze.

⁸ Sholomoni na bantu nimwabo ba Ishalela bapingile Shimbo sha Minkungwa ha matena mutanu na abili. Kwakungulukilile bantu babengi shikuma bafumine ku ncelele ku nzila ya Ncinencine ya Hamati naku mabukubuku ku nginza ya Engepita.

⁹ Bamanishile matena mutanu na abili akufungulwisha kaala, niho kami matena mutanu na abili a Shimbo sha Minkungwa, pe bapingile shimbo sha ku shinka ha mutena wa mutanu na ahatu.

¹⁰ Pe oho kwashile, ha mutena wawumakumi abili na ahatu wa ngonda wa mutanu na zibili, Sholomoni wapanzanishile bantu kuya ku minzi. Bawahililile ha mfuywezi nimwazo ziya Nyambi ya Ngula apanine ku bantu bendi Ishalela na kuli Ndavita na kuli Sholomoni.

Nyambi ukuliholola kami kuli Sholomoni

¹¹ Oho Mwene Sholomoni amanishile kuzika Litala lya Nyambi ya Ngula na musheke, wamanishile shiwahewahe bihanganiko byendi nimwabyo ha kuwazika,

¹² niho Nyambi ya Ngula aliholwele kuli Sholomoni ku wushiku. Wambile kukwendi ngayi, “Nayuvwu lilombelo lyobe pe natambulu lino Litala kwinga mwanya oku bakakombelelanga zinkombela kukwami.

¹³ Shikati nimwasho osho nikakanisha mvula, hinge kutuma mikumbi mu kulya mbuto, hinge kutuma ha bantu bami malweli,

¹⁴ ndi ba kulomba kukwami na kutenguluka ku wubi ou banatende, pe nikabayuvwa muno muyilu na kubayatila wubi wabo na kutumpula litunga lyabo kami.

¹⁵ Nikalama ha Litala lino na kutambula malombelo nimwawo aya akalombeliwa kuno,

¹⁶ ndaba nalihata na kulizilika kwinga mwanya oku nikayaka Lizina lyami na kulemeshiwila mwaya myaka. Nikalilamanga na kulikoweza shikati nimwasho.

¹⁷ Ndi ukuntendela na kwoloka ngonehe atendele tatiyobe Ndavita na kwombatala mazu wami na kutenda byuma nimwabyo ebye na kulayelele,

¹⁸ nikalama shikulupisho eshe na kulupishile kuli tatiyobe Ndavita, oho namutongwezele ngayi Ishalela ukonzelanga kuleliwa ku bazukulyendi.

¹⁹ Ngoboni ndi obe na bantu bobe kwombatala mazu wami na ndayano zami eze namipanine mufwako na kulemesha banyambi bamina,

²⁰ pe nikamifumisha mu litunga lino namipanine, nikashiya lino Litala lyami nazilikilile Lizina lyami kwinga mwanya oku nikalemeshiwilanga. Bantu nimwabo bakalimbulula lino Litala na kulihandula.

²¹ “Litala lya Nyambi hano likulemeekiwa shikuma, ngoboni haya kumbili bantu nimwabo bakapitako bakakomoka shikuma, pe bakepula ngayi, ‘Shumangani kati Nyambi ya Ngula anatende nehe ku litunga elye naku Litala lino?’

²² Bantu bakakumbula ngayi, ‘Ndaba banafutamini Nyambi ya Ngula, Nyambi yabo, Ou wafumishile bankakazabo mu Engepita. Bakakatilile banyambi bamina pe babalemeshele, nisho shuma shiya Nyambi ya Ngula analetele ano makando hahabo.’ ”