2 Byambo 6 - Libuka Lya Kuyela

Sholomoni ukwamba ku bantu

¹ Niho mwene Sholomoni alombelele nehe ngayi, “Nyambi ya Ngula, unahata kwikala mu makumbi namu mincimpwe.

² Haya nakuzikila kale Litala lyobe lya kukomokesha, mwanya wobe mwakwikalanga mwaya myaka.”

³ Mwene Sholomoni watengulukile na kupenza ku bantu ba Ishalela baya bemanine kumbili yendi, pe wabanyepelele mfuywezi za Nyambi.

⁴ Pe wambile ngayi, “Yemezenu Nyambi ya Ngula, Nyambi wa Ishalela. Unalama Shikulupisho eshe a kulupishile kuli tate Ndavita, oho ambile kukwabo ngayi,

⁵ ‘Ku balika shikati shiya nafumishile bantu bami mu Engepita kukuma nihano, kaliha nahatile lukena hinge lumo mu litunga lya Ishalela kwinga mwanya wakuzikila Litala omu nikalemeshiwilanga, kami kaliha nahatile muntu hinge umo wakutwaminina bantu bami ba Ishalela.

⁶ Ngoboni haya ninahata Yelushalema kwinga mwanya oku mukalemeshelanga Lizina lyami, kami Ndavita ukalela bantu bami.’ ”

⁷ Kami Sholomoni wambile ngayi, “Tate Ndavita wafungile kuzikila Nyambi ya Ngula, Nyambi wa Ishalela Litala lya kumulemeshelanga.

⁸ Ngoboni Nyambi ya Ngula wambile kuli Ndavita ngayi, ‘Watendele shiwahe ha kushinga kuzika Litala mwakundemeekela,

⁹ ngoboni hinga mwaka ukatanga kulizika. Mwanobe wakulibelekela, niye ukazika Litala mwakundemeekela.’ ”

¹⁰ “Haya Nyambi ya Ngula unalama shikulupisho eshe a kulupishile. Ami nashwana kale tate Ndavita kwinga mwene wa Ishalela, pe naziki Litala lya ku lemeshela Nyambi ya Ngula Nyambi wa Ishalela

¹¹ Nayaka Likwati lya Kulimama mu Litala lya Nyambi, omu muli matapa a mamanya a Kulimama okwe alimamine Nyambi ya Ngula na bantu ba Ishalela.”

Kulombela kwa Sholomoni

¹² Niho Sholomoni emanine kumbili ya Kaala ka Nyambi ya Ngula, shikungulukilo nimwasho sha Ishalela hi shimumona. Wakatwile maboko wendi kutwala muyilu na kulombela.

¹³ Sholomoni watatikile kutenda shuba sha lubemba pe washiyakile mukati ka shipango. Nisho shengile mamita abili kwezekela hamo, pe mu mwimo shengile mita yimo. Wakandamine ha shiya shuba, wafunkamine hanci oku bantu nimwabo. Wakatwile maboko wendi kutwala muyilu.

¹⁴ Walombelele ngayi, “Obe Nyambi ya Ngula, Nyambi wa Ishalela, muyilu hinge hano hanci kowa nyambi waku kufweka. Walamanga kulimama kwobe na bantu bobe na ku monesha nceshe zobe za mwaya myaka ku nobo ba kukwombatala na mitima yabo nimwayo.

¹⁵ Unalama shikulupisho eshe wakulupishile tate Ndavita, lizu nimwalyo lelo linatendiwi.

¹⁶ “Haya Obe Nyambi ya Ngula, Nyambi wa Ishalela, lama shikulupisho shiya wakulupishile tate Ndavita oho wamutongwezele ngayi, ukayakanga shikati nimwasho umo ha bazukulyendi ukashwananga kwinga mwene wakulela Ishalela, ku mona tuhu ndi ukombatala shiwahe mazu obe ngonehe atendele tate.

¹⁷ Nohobene haya Obe Nyambi ya Ngula, Nyambi wa Ishalela, yitabila byuma biya wakulupishile kuli mukamulimo wobe Ndavita kwinga bya kupwisha.

¹⁸ “Ngoboni kati Obe Nyambi, mwa shikuma ukutwesha kwikala hano hanci mukati ka balume na bambuyama ndi? Shikwanga wunene wa liyilu nimwalyo kulinganamo wufwako, pe bo Litala lino natende likaneneha nahiti ngayi ulinganemo?

¹⁹ Obe Nyambi ya Ngula, Nyambi yami, yuvwa lilombelo lyami. Ami nengi muka mulimo wobe, pe umpane ebye nanyepe kukwobe.

²⁰ Lama elye Litala lyobe wushiku na mwaana. Unakulupishi ngayi kuno nikwo bakakulemeshelanga, nohobene nyuvwe oho ami mukamulimo wobe nikupenza ku Litala lyobe na kulombela.

²¹ Yuvwa kulambilila kwami na bantu bobe ba Ishalela oho ba kupenza ku mwanya uno na kulombela. Tuyuvwe na kutuyatila omwo mu munzi wobe wa muyilu.”

²² “Oho muntu akuyatishiwa ngayi unabipishili muntu wamina, pe ha kuletiwa ku kaala kobe muno mu litala lyobe mu kulibeza kwa kuliyawila,

²³ Obe Nyambi ya Ngula, yuvwako omwo muyilu na kuyata bakamilimo bobe. Shushula muntu wa mulandu ngonehe shinamufwanini na ku shambisha muntu ou wakubula mulandu.

²⁴ “Oho bantu bobe Ishalela banakomiwi ku bamalamo babo ndaba banakubipishili, pe oho ba kutengulukila kukwobe na kwiza ku Litala lino na kulombela kukwobe na kushinga kuyamiziziwa,

²⁵ bayuvwe omwo muyilu wekala. Yatila wubi wa bantu bobe ba Ishalela, pe ubabweshe ku litunga elye wabapanikile na bankakazabo.

²⁶ “Oho ukukanisha mvula kuloka ndaba bantu bobe banakubipishili, pe haya oho ba kutenguluka na kupenza kuno ku Litala lyobe na kulombela na kulilimbwilisha.

²⁷ Obe Nyambi ya Ngula, bayuvwe omo muyilu wekala, pe yatila wubi wa bakamilimo bobe, bantu ba Ishalela, pe balongeshe kwinga bakulunga. Obe Nyambi ya Ngula, tuma mvula ha litunga lyobe elye wapanine ku bantu bobe kwinga likona lya mwaya myaka.

²⁸ “Oho kukekala kapande mu litunga, hinge wulweli wa limbo, hinge mbuto yinabolo hinge matanga a mikumbi hinge ndi bantu bobe bakabalwisha ku bamalamo babo hinge ndi kuli malweli akuliyambwisha, hinge kukola kwowa hakati kabo,

²⁹ bayuvwe malombelo wabo. Ndi umo ha bantu bobe Ishalela ukulibela mu mitima, hi akutandubwila maboko wendi na kulombela na kwanuka kuyanda kwendi ku shangula ku Litala lino,

³⁰ yuvwa kulombela kwendi. Bayuvwe omwo mu munzi wobe muyilu pe bayatile. Obe tuhu ninkayobe walimuka bihanganiko bya mitima ya bakawilezungu. Tenda ku muntu na muntu ngonehe shinamufwanini,

³¹ nohobene ngayi bantu bobe mwanga ba kutine na ku kwombatala shikati nimwasho, bakazika mu litunga elye wapanine ku bankakazetu.

³² “Oho lipukwenda ou wazika ku litunga lya kwakutali akayuvwa ha mpupo ya lizina lyobe na liboko lyobe lya ngovu na liboko lyobe lya kutandubuka naneshe wonzela kuliwahisha kuyavwa, pe hakwiza mu kulombela kuno ku Litala lyobe,

³³ yuvwa lilombelo lyendi. Muyuvwe omwo muyilu wayoya, pe tenda ebye akukunyepa. Nohobene ngayi mikoka ya hano hanci nimwayo mwanga yilimuke Lizina lyobe na kukwombatala, ngonehe ba kutenda bantu bobe Ishalela. Niho bakalimuke ngayi lino Litala lyobe elye naziki likatumbiwa na Lizina lyobe.

³⁴ “Oho ukwambila bantu bobe kuya ku nzita mu kulwisha bamalamo babo, pe oho ba kulombela kukwobe hinge ndi balikuti, pe hiba kushangula na kupenza ku lukena luno olu wahatile na lino Litala lyobe elye naziki kulemesha lizina lyobe,

³⁵ yuvwa malombelo wabo. Ubayuvwe omwo muyilu pe ubapane kukoma.

³⁶ “Oho bantu bobe banakubipishili, ndaba kowa muntu wabula Kubipisha, pe ha kubapilamina ukwitabilisha bamalamo babo ku bakoma na kubatwala mu wuntapwa ku litunga lyamina, hinge ndi liya litunga lyekala kwakutali,

³⁷ yuvwa malombelo a bantu bobe. Ndi shinga muyo mu litunga hiba kutenguluka na kulombela kukwobe na kulitabila ha wubi wabo na kuluwa kwabo ngayi banabipishi, bayuvwe malombelo wabo Obe Nyambi ya Ngula.

³⁸ Ndi shinga mu litunga liyo ba kutenguluka mu kupwisha na kulunga, pe hiba kulombela kukwobe, oho hinga bapenza ku litunga lino elye wapanine ku bankakazetu naku lukena luno wahatile na lino Litala lyobe elye naziki kulemesha lizina lyobe,

³⁹ niho yuvwa malombelo wabo. Pe bayuvwe omwo muyilu wekala na kubayuvwila nceshe, kami yatila wubi wa bantu bobe nimwawo.

⁴⁰ “Haya, Obe Nyambi yami, penza kukwetu na kuyuvwa malombelo analombeliwi mu mwanya uno.

⁴¹ Obe Nyambi ya Ngula, haya katuka, yanga ku mwanya oku wakatalilanga. Likwati lya Kulimama lyobe shilimukisho sha ngovu zobe. Obe Nyambi ya Ngula, mwanga bakankombela bobe babilikize ngovu zobe za kupulwisha bantu, mwanga bantu bobe ba kuyela mitima benge baka ku wahilila ndaba ya wuwahe wobe kukwabo.

⁴² Obe Nyambi ya Ngula Obe Nyambi, hinga ukana mwene ou unawabishi. Anuka nceshe zobe za mwaya myaka wekalile nazo hali mukamulimo wobe Ndavita.”