2 Byambo 5 - Libuka Lya Kuyela

Kufunguliwa kwa Litala lya Nyambi

¹ Oho mwene Sholomoni amanishile mulimo nimwawo wa Litala lya Nyambi, wayakile byuma nimwabyo biya tatiyendi Ndavita afungwilile kuli Nyambi ya Ngula, bya shiliva na ngolinde na byuma byamina, mu bishete bya ku Litala lya Nyambi.

Likwati lya Kulimama likuletiwa ku Litala lya Nyambi

² Niho mwene Sholomoni ehanine bakulwane ba mishobo na mavumo a Ishalela nimwabo bakungulukile mu Yelushalema, ngayi mwanga bakalete Likwati lya Kulimama kwa Nyambi ku Ziyoni Lukena lwa Ndavita na kuliyaka mu Litala lya Nyambi ya Ngula.

³ Nimwabo bakungulukile ku shikati sha Shimbo sha Minkungwa.

⁴ Oho bakulwane ba Baishalela nimwabo bakungulukile, niho Balevi bakatwile Likwati lya Kulimama,

⁵ pe baliletele ku Litala lya Nyambi. Bakankombela na Balevi kami batuntwile Ntanda ya Shikungulukilo na byuma byayo nimwabyo kuyileta ku Litala lya Nyambi.

⁶ Mwene Sholomoni na bantu nimwabo ba Ishalela bakungulukilile kumbili ya Likwati lya Kulimama pe bakombelelele bambelele babengi shikuma na zingombe zazingi shikuma, za kubula kutwesha kulabiwa.

⁷ Niho bakankombela bashimbile Likwati lya Kulimama kwa Nyambi ya Ngula na kulingiza mu Litala lya Nyambi, pe baliyakile mu mwanya wa kuyela shikuma, mu nceto ya makelumbi a mbando.

⁸ Mbando zawo za kutandubuka zafwikile ha Likwati lya Kulimama na mibanda yakulishimbila.

⁹ Mibanda yatalihile pe yamonekelenga kuzinkumo zayo ku nimwendi wakwimana kumbili ya mwanya wa kuyela, ngoboni wakwimana ha munkanda kuyimona wufwako. Mibanda yishiliko naku mutena wa lelo.

¹⁰ Mu Likwati lya Kulimama kaliha mwekalilenga shuma shamina ndele tuhu matapa abili a mamanya awa ayakilemo Moshesha kuyo ku Lipili lya Shinayi, oho Nyambi ya Ngula alimamine na bantu ba Ishalela aha bafuminenga ku Engepita.

¹¹ Haya oho Bakankombela batutikile mu mwanya wa kuyela ndaba Bakankombela nimwabo obo bekalileko baliyeleshele nibo bamwine kubula kutoya bipani okwe bawililile.

¹² Bakakuwela ba Balevi nimwabo bengile ba Ashafwi na Hemani na Yendutani na banababo na bawushinda, bavwalilenga makwiza amawahe a kulelema, bemanine kwakwipi na kaala ku mbalila ya mushamuko hibambeta mikwashi na tumbuli hamo na Bakankombela mwanda umo na makumi abili a bakakushiba zimpandula.

¹³ Mazu a bakakwimbila ayile hamo mushumina na zimpandula na bakakumbeta mikwashi na bimbetesho byamina. Bembilile na kuyemeza Nyambi ya Ngula ngayi, “Yemezenu Nyambi ya Ngula, Ndaba nengi wamuwahe, Ndaba nceshe zendi za mwaya myaka.” Litala lya Nyambi lyenzalile na likumbi.

¹⁴ Nohobene bakankombela kaliha batweshele kami kutenda milimo ya kulemesha ndaba wuwahe wa Nyambi ya Ngula wenzalishile Litala lya Nyambi.