2 Byambo 4 - Libuka Lya Kuyela

Byuma bya ku Litala lya Nyambi

¹ Mwene Sholomoni watendele kaala ka lubemba, aka kengile ka mamita 9 kufwanikizila hamo mu wutali na muwipi na mamita 4.5 mu mwimo.

² Kami watendele lizawo lya lubemba lyanzinguluke, kukunama kwalyo kwapitakanine mamita abili, ha nkumo na ha nkumo ya mivumbo yalyo yengile mamita anaa mu wunene walyo, kami mu kunzinguluka mamita 13.

³ Kuzingwilisha ku nkumo ya mivumbo ya lizawo ya kutepukila hanza kwekalile mizila yibili ya lyozi, limo hayilu ya lyamina. Lyozi lyengile lya shifwekesha sha bankunzi likumi kushinga kulingana mu mashentimita 45 aba bayunguliwile shuma shimo na lizawo nimwalyo.

⁴ Lizawo lyatakamaninenga ha myongo ya bankunzi ba lubemba likumi na babili, baya balipenzeshele myongo, bahatu bapenzele ku mbalila na mbalila. Bahatu batilaminine ku ncelele, bahatu batilaminine ku mponci, bahatu batilaminine ku mabukubuku, pe bahatu batilaminine ku mushamuko.

⁵ Wuliti wa zimbalila za lizawo wengile ngo wunene wa shikandi sha liboko lya muntu. Muvumbo walyo walifwekele ngo muvumbo wa nkomoki, ya kukontamina ha munkanda kulifweka ngonehe mabizi a ntemo. Lizawo lyakongelenga mema akushinga ulingana malita 60,000.

⁶ Kami watendele zindonga za kukunama likumi, mutanu zayakiwile ku mbalila ya mabukubuku a Litala lya Nyambi, kami mutanu ku mbalila ya ncelele. Nizo zengile za kuyoweshela bimamo bya bimuna biya byahokeshiwilenga kwinga zinkombela. Mema amu lizawo lyalinene engile a bakankombela akuyowelanga.

⁷ Kami watendele meyeko a zimuni likumi ngonehe shiya batendele a kutatika mutanu ayakiwile mukati ka Litala lya Nyambi, ku mabukubuku kami mutanu ku mbalila ya ncelele.

⁸ Watendele kami zitebulu likumi, pe zayakiwile mukati ka Litala lya Nyambi, zitebulu mutanu ku mbalila ya mabukubuku, mutanu ku mbalila ya ncelele. Watendele kami zindonga za kukunama za ngolinde mwanda umo.

⁹ Watendele shipango sha bakankombela sha mukati, pe kami na shipango shashinene sha ha munkanda. Bihala bya ku mapangati a mukati ka bipango byafwikiwile na lubemba.

¹⁰ Lizawo lyayakiwile kwakwipi kulwa mabukubuku aku mushamuko mu nkomi ya Litala lya Nyambi.

¹¹ Hulamu watendele kami zinyungu na bishongwezo na zindonga za kukunama. Ebye nibyo byuma atendele Hilamu biya a kulupishile Mwene Sholomoni ngayi ukabitendela Litala lya Nyambi.

¹² Bishimi bibili na zindonga zibili na shifwekesha sha mitwe ya hayilu ya bishimi, shifwekesha sha nketwana zibili za ku shinta za kufwika zindonga zibili zaha bishimi.

¹³ Manzenze a lubemba myanda yinaa ayakiwile mu mizila yibili ku zingwilisha mutwe na mutwe wa shishimi.

¹⁴ Watendele bikakambwa likumi na zindonga za kukunama likumi za kuyakamo.

¹⁵ Watendele kami lizawo na bankunzi likumi na babili ha kutakamana lizawo.

¹⁶ Watendele kami zinyungu na bishongwezo na zinkombola na mincomo. Hulamu hekulya bantungu watendele ebye byuma nimwabyo ha lubemba lwa kulembuka, ngonehe eshe alayile Mwene Sholomoni bya kutendela Litala lya Nyambi ya Ngula.

¹⁷ Byuma ebye nimwabyo byatendiwile mu shitapo sha lima sha mukati ka Shukota na Zalenda mu mukulo wa Yondana, ngonehe amutongwezele mwene.

¹⁸ Byuma atendele Sholomoni byengile byabingi kowa muntu watweshele kulimuka wingi wa wulemu wa lubemba olu batendeshelenga.

¹⁹ Mwene Sholomoni kami watendele byuma nimwabyo biya batendeshelenga mu Litala lya Nyambi ha ngolinde, kaala na zitebulu za mankende a ntupu ya kuli Nyambi,

²⁰ na meyeko a zimuni na zimuni za ngolinde yayiwahe ziya zabangilenga kumbili ya Mwanya wa Kuyela Shikuma, ngonehe afundizizile,

²¹ lyozi lya maluba na zimuni na zimanya,

²² tulonga twa kukunama twa kuzimisha mimuni na zindonga za kukunama na zindonga za kuhokeshela incence na binzoyo bya kukalila mashanga a mundilo. Byuma ebye nimwabyo byatendiwile ha ngolinde ya kushamisha. Bihala bya ha munkanda wa Litala lya Nyambi, bihala bya ku Mwanya wa Kuyela Shikuma byengile bya kulamba na ngolinde.