2 Byambo 36 - Libuka Lya Kuyela

Yehoyahazi mwene wamu Yunda

¹ Bantu bamu Yunda bakwatile Yehoyahazi mwana Yoshiya, pe bamuwabishile kwinga mwene wamu Yelushalema.

² Yehoyahazi wekalile na myaka 23 oho engile mwene wa mu Yunda, pe walelele mu Yelushalema zingonda zihatu

³ Mwene Neko wamu Engepita wamutwalile mu wuntapwa pe wayumbishile Yunda makilongilamu 3,400 a shiliva na makilongilamu 34 a ngolinde kwinga mutelo.

⁴ Neko wakwatile mukonzo wa Yehoyahazi, Eliyakimu kwinga mwene wamu Yunda na Yelushalema na kufutula lizina lyendi kwinga Yehoyakimu. Neko watwalile Yehoyahazi ku Engepita kwinga kayili.

Yehoyakimu mwene wamu Yunda

⁵ Yehoyakimu wekalile na myaka 25 oho ashwanine ha wene wamu Yunda, pe walelele mu Yelushalema myaka likumi na umo. Wabipishilile Nyambi ya Ngula, Nyambi yendi.

⁶ Mwene Nembukandineza wamu Mbambiloniya walwishile Yunda, wakwatile Yehoyakimu pe wamutwalile ku Mbambiloniya walwishile Yunda, wakwatile Yehoyakimu pe wamutwalile ku Mbambiloni hinga amangiwa.

⁷ Nembukandineza washimbile wuheti wumo wamu Litala lya Nyambi ya Ngula pe wawuyakile mu musheke wendi wamu Mbambiloni.

⁸ Byuma byamina nimwabyo kami biya atendele Yehoyakimu, kuyakako na biheka byendi bya wunyengwe atendelenga na wubi atendele byatikitiwile mu byambo bya Likota lya Bamyene bamu Ishalela namu Yunda. Mwanendi Yehoyakini wamushwanine kwinga mwene.

Yehoyakini mwene wamu Yunda

⁹ Yehoyakini wekalile na myaka 18 oho ashwanine ha wene wamu Yunda, pe walelele mu Yelushalema zingonda zihatu na matena likumi. Niye kami wabipishilile Nyambi ya Ngula.

¹⁰ Oho kwengile mvumbi, mwene Nembukandineza watwalile Yehoyakini ku Mbambiloni kwinga Ntapwa, pe washimbile wuheti wamu Litala lya Nyambi ya Ngula. Niho Nembukandineza akwatile Zendekiya kawushinda wa Yehoyakini kwinga mwene wamu Yunda namu Yelushalema.

Zendekiya mwene wamu Yunda

¹¹ Zendekiya wekalile na myaka 21 oho engile mwene wamu Yunda, pe walelele mu Yelushalema myaka likumi na umo.

¹² Wabipishilile Nyambi ya Ngula, kami kaliha wabayuvwililenga na kulilimbwilisha kuli muluwe Yelemiya, ou washimikililenga lizu lya Nyambi ya Ngula.

Kuwa kwa Yelushalema

¹³ Zendekiya wafutukilile Mwene Nembukandineza, ou wamukandamikile kubeza mu lizina lya Nyambi ngayi akenge wakulunga, wakaluhishile mutima wendi na kukana kutenguluka na kuboka kuli Nyambi ya Ngula, Nyambi wa Ishalela.

¹⁴ Bakakutwaminina bamu Yunda na bakankombela na bantu bakonkelenga nzila yayibi ya mikoka eye ya bazinguluka na kulemesha tunankishi. Mu nzila eye bazilulwile Litala lya Nyambi, elye Nyambi ya Ngula azilikile niyemwine mu Yelushalema.

¹⁵ Nyambi ya Ngula, Nyambi wa bankakazabo wazaminine kutuma bamiluwe mu kushuza bantu bendi ndaba washingilenga kukokela bantu bendi hamo na Litala lyendi.

¹⁶ Ngoboni bahandwile bantumwana ba Nyambi na kulimbulula mazu a Nyambi na kuhepa bamiluwe bendi, kutwala noho wukali wa Nyambi ya Ngula, wakulwisha bantu bendi wanenehele shikuma, pe kwabulile nzila ya kupanza.

¹⁷ Nohobene Nyambi ya Ngula waletele mwene waku Mbambiloni kwiza mu kubalwisha. Mwene wazihile bandumbana bamu Yunda na mukwale naba bamu Litala lya Nyambi. Wabulile kuyuvwila nceshe ha muntu nimwendi, kanuke hinge mukulwane, ndumbana hinge kankanga, wakukola hinge wa nzimba. Nyambi wamupaninebo nimwabo.

¹⁸ Mwene waku Mbambiloni wapukwile Mfuma yamu Litala lya Nyambi ya Ngula na wuheti wa mwene na babilolo bendi, pe watwalile byuma nimwabyo ku Mbambiloni.

¹⁹ Wahokeshele Litala lya Nyambi ya Ngula na lukena lwa Yelushalema na misheke yalwo nimwayo na wuheti pe wanyemwine kembi ka lukena.

²⁰ Bantu nimwabo aba bashalile ku mponde yamu nzita wabatwalile ku Mbambiloni, pe bakafutukile kwinga bandungo bendi na bandungo za bazukulyendi, hantu noho mwene wamunene wa Pesha akomene.

²¹ Haya biya ambile Nyambi ya Ngula muli muluwe Yelemiya byengile bya kupwisha oho ambile ngayi, “Litunga likashala lipembe myaka 70. Mukapana litunga Matena aku Katala aya lyabulilenga kuwana.”

Shilushi mwene ukulaya Bayunda kuboka ku litunga lyabo

²² Mu mwaka wakutatika uya Shilushi wamu Pesha ashwanine kwinga mwene wamunene, Nyambi ya Ngula wengishile ebye ambile muli muluwe Yelemiya ngayi binge bya kupwisha, pe wakandikizile Shilushi kubilika lukuwa na kulutikita na kulutuma mu matunga a wene wendi nimwawo.

²³ Lukuwa lwa Mwene wamunene Shilushi wamu Pesha abilikile wambile nehe ngayi, “Nyambi ya Ngula Nyambi wa mayilu, unanyaka kwinga kalela wa hano hanci nimwaho pe unampana mulimo wakumuzikila Litala mu Yelushalema, mu litunga lya Yunda. Haya enu nimwenu munengi bantu ba Nyambi bokenu kuyo, pe Nyambi ya Ngula Nyambi yenu, mwanga akekale hamo na nenu.”