2 Byambo 34 - Libuka Lya KuyelaYoshiya mwene wamu Yunda ( 2 Bamyene 22:1-2 ) 1 Yoshiya wekalile na myaka mutanu na yihatu oho ashwanine ha wene wamu Yunda, pe walelele mu Yelushalema myaka 31. 2 Watendele bya kuwahilisha Nyambi ya Ngula, ndaba wakonkele nzila ya nkakayendi Mwene Ndavita, pe kaliha washanukile mu nzila. Yoshiya ukulwisha kulemesha banyambi bowa 3 Mu mwaka wa mutanu na yihatu wakulela kwa Mwene Yoshiya oho ushili ndumbana shikuma, watatikile kulemesha Nyambi wa nkakayendi Mwene Ndavita. Oho kwapitile myaka yinaa watatikile ku yelesha mu Yunda na Yelushalema myanya yaha binkanda ya bakakulemesha banyambi bowa na zimpangwa za nyambi wa mbuyama Ashela na tunankishi nimwato. 4 Ku kubela kwendi bantu babunkwele tuula otu balemeshelelenga Mbaalu na kubunkola tuula twa kwakwipi nabo biya bahokeshelelenga incence. Batwile bifwekesha bya kubumba bya nyambi wa mbuyama Ashela muhungahunga na tunankishi twamina, pe nibo bafukumwinine muhunga ha binzimbi bya bantu baya bakombelelenga kukwabyo. 5 Wahokeshele kami bifupa bya bakankombela bakakulemesha banyambi bowa ha tuula oku balemeshelelenga. Mukutenda byuma ebye wayeleshele kami Yunda na Yelushalema. 6 Watendele shuma shimo mu myanya yamu minzi iya yekalile mu matunga a Manashe na Efulemu na Shimiyoni, kukakuma naku Nafwitali ku ncelele. 7 Wapitile mu litunga nimwalyo lya Ishalela ku Wene waku Ncelele, pe wabunkwele tuula na zimpangwa za nyambi wa mbuyama Ashela, kami watwile tunankishi muhungahunga na ku pabozola tuula nimwato twa kukombelela incence. Niho abokele ku Yelushalema. Libuka lya mazu a Nyambi likuwaniwa ( 2 Bamyene 22:3-20 ) 8 Mu mwaka wawu 18 wakulela kwendi Mwene Yoshiya, oho wazilululakale litunga na Litala lya kulemeshela Nyambi, watumine Shafwani mwana Azaliya wa mulume na Mayasheya kalela wamu Yelushalema na Yowa mwana Yowahazi mukakulama bya likota lya wene, shilolo wamukulwane, kuya mu kutendulula Litala lya Nyambi ya Ngula, Nyambi yendi. 9 Bapanikile kuli Hilikiya Mukulwane wa bakankombela nimwabo mali aya ba kungwishilenga Balevi bakakulama Litala lya Nyambi. Mali afumine ku bantu ba Efulemu na Manashe na litunga nimwalyo lya Wene waku Ncelele naku bantu ba Yunda na Mbenjamani na Yelushalema. 10 Nibo bapanikile aya mali ku baya bantu bahatu bengile bakulwane ku baka kutendulula Litala lya Nyambi ya Ngula, pe nibo bawanungulwile kuwapana 11 ku bambazi na bakakuzika ngayi balande mamanya na maleenge akuliyavwisha ha kutendulula mitumbwe yiya balehelelele bamyene bamu Yunda hiyishiwuka. 12 Bantu baya batendele mulimo bengile bakulunga shikuma. Bendeshiwilenga ku balume banaa ba Balevi, bengile ba Yahati na Ombandiya bamu livumo lya Melali na Zakaliya na Meshulama bamu livumo lya Kohati. Balevi bamo bengile bakakuwela ba wulongo. 13 Balevi bamina bengile bakulwane bakakututwisha byuma na ku mona bakamilimo ku milimo yayingiyingi kami bamina batikitilenga byuma mu mabuka, hinge kutenda mulimo wakulama. 14 Oho mali afumishiwilenga mu Mfuma yamu Litala lya Nyambi ya Ngula, Hilikiya wawanine Libuka lya ndayano lya Nyambi ya Ngula, liya apanikile kuli Moshesha mukamulimo wendi. 15 Watongwezeleko mukakutikita Shafwani ngayi, “Ami nawana Libuka lya mazu a Nyambi muno mu Litala lya Nyambi ya Ngula.” Pe wapanikile libuka kuli Shafwani, 16 pe Shafwani walitwalile kuli mwene. Niye wakashimikile ngayi, “Tunatende byuma nimwabyo biya walaya. 17 Tunatwala mali aya akongiwilile mu Litala lya Nyambi ya Ngula na kuwapanika ku bakamilimo naku baka ku mona milimo.” 18 Niho mukakutikita Shafwani ambile kami ngayi, “Nili kami na libuka lino anampana Hilikiya.” Pe walilabilile mwene na kukatula ku lizu. 19 Oho mwene ayuvwile libuka hililabiwa, pe watabwele bivwalo byendi mu wunginga. 20 Niho mwene atuminine mazu awa kuli Hilikiya na kuli Ahikama, mwana Shafwani na kuli Ambindoni mwana Mika na kuli Shafwani mukakutikita waku shinzanza na kuli Ashaya mukakubela wa mwene, pe wabatongwezele ngayi, 21 “Yenunga mukanyipwizizile kuli Nyambi ya Ngula, ami na bantu aba bashili ku shala mu Ishalela namu Yunda. Kashingishishenu ebye liku longesha lino libuka. Nyambi ya Ngula unatupilamini ndaba bankakazetu babulile kwombatala mazu a Nyambi, pe kaliha batendele ebye likwamba lino Libuka.” 22 Ku lizu lya Mwene, Hilikiya na bamina bayile na ku shingishisha kuli muluwe wa Nyambi wa mbuyama Hulinda mukaza Shaluma ou wekalilenga mu mbalila yayipya ya Yelushalema. Shaluma wengile, mwana Tokati kami muzukulya Hashila, wengile mukulwane waku bivwalo bya mu Litala lya Nyambi. Batontwelelele muluwe Hulinda ebye byamonekele, 23 pe Hulinda wabatongwezele ku boka kuli mwene na kumutongweza elye 24 lizu lya kuli Nyambi ya Ngula lyambile ngayi, “Nikushushula lukena lwa Yelushalema na bantu balimo nimwabo na mikuto iya yatikitiwile mu libuka lyalabiwa kuli mwene wa Yunda. 25 Nibo banankana na kukombelela zinkombela ku banyambi bowa pe haya banatumeze wukali wami ku byuma nimwabyo ebye banatende. Wukali wami unakatuku na kulwisha Yelushalema, pe wukali wami kukafwomoka wufwako. 26 Nehe boni hali mwene wa Yunda niyemwine, nikwamba nehe ami Nyambi ya Ngula, Nyambi wa Ishalela ngayi, obe wayuvwishisha kunebye byatikitiwa mu libuka, 27 kami watenguluka pe walilimbwilisha obemwine kukwami na kutabozola bivwalo byobe na kulila, oho wayuvwa eshe nikufumbila kushushula lukena lwa Yelushalema na bantu balimo. Nayuvwu lilombelo lyobe, eshe nisho anamba Nyambi ya Ngula. 28 Mona kashushwilo kaya nashinga kushushula Yelushalema. Kukekalako kafwako hantu oho wafwakale. Nikakuleha ngayi ufwe mu ku mwena.” Elye nilyo lizu babokele nalyo bantu kuli mwene Yoshiya. Yoshiya ukulimama ku meho a Nyambi ya Ngula ( 2 Bamyene 23:1-20 ) 29 Mwene Yoshiya wehanine bakakutwaminina nimwabo bamu Yunda namu Yelushalema, 30 pe bayile hamo ku Litala lya Nyambi, bashindikiziwile na bakankombela na Balevi na wingi wa bantu nimwabo ba Yunda ba kuheta na naba ba kushepwa. Mwene wemanine kumbili yabo, walabile Libuka nimwalyo lya kulimama elye lyawaniwile mu Litala lya Nyambi ya Ngula na kukatula ku lizu. 31 Wemanine ku mpangwa ya wene, pe walimamine ku meho a Nyambi ya Ngula ngayi amwombatalenga na kulama kufundiziza kwendi na ndayano zendi na mutima wendi nimwawo hamo na moyo wendi na kutenda mazu nimwawo akushumisha kulimama, ngonehe byatikitiwile mu libuka. 32 Watongwezele bantu ba Mbenjamani na bantu nimwabo bekalile mu Yelushalema kulama kulimama. Bantu bamu Yelushalema bombatalile ku byuma bikushingiwa ha kulama kulimama kwa Nyambi okwe alimamine na bankakazabo. 33 Mwene Yoshiya wanongeshele tunankishi nimwato twa wunyengwe tuya twekalile mu litunga liya lyengilenga lya bantu ba Ishalela, pe shikati sha kuyoya kwendi nimwasho washingilenga ngayi bantu balemeshenga Nyambi ya Ngula Nyambi wa bankakazabo. |
Libuka Lya Kuyela © Bible Society of Zambia, 2020.
Bible Society of Zambia