2 Byambo 32 - Libuka Lya Kuyela

Baashiliya ba kufumbila Yelushalema

¹ Oho byapitile byuma ebye mwene Hezekiya atendelenga byakwoloka kuli Nyambi ya Ngula, Shenakelimba mwene wamunene wamu Ashiliya wakatukilile mutakwe Yunda. Wayakile minzi mukati na shihanganiko sha kuyikoma.

² Oho Hezekiya amonene ngayi Shenakelimba ukushinga kulwisha Yelushalema kami,

³ niye na babilolo bendi bahanganikile kuzika tuheloke twa mema twaha munkanda wa lukena,

⁴ pe babilolo batwalile litanga lya bantu babengi ha munkanda nakuzika tuheloke twa mema nimwato nohobene ngayi “Mwanga Baashiliya bayene babule kuwana mema oho bakakuma kwakwipi na Yelushalema?”

⁵ Mwene Hezekiya washumishile lwanda lwa lukena na kutendulula kembi na tupeshi twabo, kami wazikile kembi kaha munkanda. Watendulwile kami lwanda lwaha mbalila iya yabuwiwile yaku mushamuko waku mapembe a lukena lwa Ndavita. Kami wafulile milinga yayingi shikuma na makebo.

⁶ Mwene wayakile bantu nimwabo bamu lukena mu maboko a bakulwane banzita pe waba kungwile ha munkanda ku lipangati lya lukena. Wambile kukwabo ngayi,

⁷ “Yingenu ba kushuma na kulikwatisha, kami hinga mutampwa na kutina mwene wamunene waku Ashiliya hinge nzita yayinene eye akutwaminina. Etu tuli na ngovu shikuma kuno ku mbalila yetu kupitakana eze ali nazo.

⁸ Niye uli na Ngovu za wuntu, ngoboni etu tuli na Nyambi ya Ngula Nyambi yetu, ukutuyavwa na kutulwila ku mangunga wetu.” Bantu bakancile shikuma na mazu a Hezekiya mwene waku Yunda.

⁹ Oho kwapitakale shikati, oho Shenakelimba mwene waku Ashiliya na nzita yendi bashili ku Lakishi, watumine lizu elye kuli Hezekiya naku bantu bamu Yunda aba bekalile nabo mu Yelushalema ngayi,

¹⁰ “Ami Shenakelimba, mwene wamunene wamu Ashiliya, nikwipula ebye bikumishumisha enu bantu na kwikala mu Yelushalema hinga mwayakiwa mukati.

¹¹ Hezekiya wamitongwezele ngayi, ‘Nyambi ya Ngula Nyambi yenu, ukatulamwina ku ngovu za mwene waku Ashiliya,’ ngoboni Hezekiya ukumyongeza, niye ukushinga ngayi mufwe ku nzala naku linyotwa.

¹² Hezekiya niye muntu umo uya wanongeshele myanya na tuula twa kulemeshela Nyambi ya Ngula kami watongwezele bantu bamu Yunda namu Yelushalema ngayi, ‘Lemeshenu na kuhokeshela zinkombela zenu ha kaala shimo tuhu.’

¹³ Kati enu kulimuka mufwako ebye batendele bankaka zami nanebye natende ami ku bantu ba mikoka yamina ndi? Kati banyambi ba ku mikoka nimwayo ba kutwesha kulamwina bantu babo kuli mwene wamunene wamu Ashiliya ndi?

¹⁴ Kati shikati ngani osho banyambi bamu matunga nimwawo batweshele kulamwina matunga wabo kukwetu? Hayaboni bishini bikumihanganikisha ngayi Nyambi yenu ukutwesha kumi lamwina?

¹⁵ Haya hinga mwitabila Hezekiya ngayi amyongeze nehe hinge kumi luwisha. Hinga mumukulupila. Kowa Nyambi waku mikoka nimwayo watweshele kulamwina bantu bendi ku bamyene babanene Baashiliya. Nohobene mwa shikuma ou Nyambi yenu kutwesha kumi lamwina wufwako.”

¹⁶ Babilolo ba Baashiliya bapitakanine kwamba byuma byabingi bya lihandu hali Nyambi ya Ngula na hali Hezekiya, mukamulimo wa Nyambi ya Ngula.

¹⁷ Mwene wamunene watikitile liñwati liya ahandwile Nyambi ya Ngula, Nyambi wa Ishalela. Liñwati walitikitile ngayi, “Nyambi wa Hezekiya kukatwesha ufwako kumulamwina kukwami ngonehe banyambi ba ku mikoka nimwayo kutwesha kulamwina bantu babo kukwami bafwako.”

¹⁸ Babilolo babilikizile mazu awa mu Shihebelu ngayi mwanga batinishe na kupopesha bantu bamu Yelushalema, aba bekalile ha kembi ka lukena ngayi mwanga shinge shawangu kukwata lukena.

¹⁹ Babilolo bambile bya hali Nyambi wamu Yelushalema mu nzila yimo tuhu ngonehe bambilenga bya hali banyambi ba mikoka yashenge, tunankishi twa kutendiwa na maboko a wuntu.

²⁰ Niho Mwene Hezekiya na muluwe wa Nyambi Ishaya mwana Amozi balombelele kuli Nyambi pe balililile kukwendi na kushinga kuyavwiwa.

²¹ Nyambi ya Ngula watumine lingeloyi uya wazihile bakanzita na bakulwane banzita ya Baashiliya. Nohobene mwene wamunene wabokele ku Ashiliya na lisheni lyalinene. Mutena umo oho ekalile mu litala lya nyambi yendi, bana bendi bamo babalume bamuzihile na mikwale yabo.

²² Mu nzila eye, Nyambi ya Ngula wapulwishile Mwene Hezekiya na bantu bamu Yelushalema ku ngovu za Shenakelimba mwene wamunene wamu Ashiliya, pe kami naku bamalamo babo bamina. Wetabilile bantu ngayi bekale mu ku mwena na matunga alikundamina nawo.

²³ Bantu babengi bezile ku Yelushalema na kuleta zintupu kuli Nyambi ya Ngula na bishemo kuli Hezekiya mwene wa Yunda, nohobene ku balika haya kutwala na kumbili mikoka nimwayo yaleemekele Hezekiya.

Kukola kwa Hezekiya na kuliyemeza

²⁴ Ha shikati shiya bene kami Mwene Hezekiya wakolelenga pe washingile kufwa. Walombelele, niho Nyambi ya Ngula amupanikile shilimukisho ngayi ukanyongomana.

²⁵ Ngoboni Hezekiya wengile mukakuliyemeza shikuma kwakubula kukambilila hanebye amutendelele Nyambi ya Ngula. Nohobene wukali wa Nyambi ya Ngula wezile hahendi naha Yunda naha Yelushalema.

²⁶ Niho ku mamaninino, Hezekiya na bantu bamu Yelushalema balilimbwilishile, pe Nyambi ya Ngula niho abulile kushushula bantu hantu kutwala na ha lufu lwa Hezekiya.

Wuheti wa Hezekiya na mpupo

²⁷ Hezekiya wengile wakuheta shikuma, pe bantu nimwabo bamulemeekele. Wekalile na Zimfuma za kulonga ngolinde na shiliva na mamanya amawahe na lukumba na makebo na bingwalingwali byabilemu.

²⁸ Wekalile kami na bishete bya kulonga mbuto yendi na waine na mazi a olive. Wazikile milaka ya zingombe zendi na bipata bya bambelele bendi.

²⁹ Kunebye nimwabyo amupanine Nyambi wamupanine kami bambelele na zingombe na wuheti wamina wawingi. Ndaba yanebye mwene watendele minzi yayingi.

³⁰ Wengile Mwene Hezekiya ou washinkile tuheloke twamu Ngihoni na kuzikula lilomba ngayi mema apite mu mumpongo na kwingina mukati ka twimbi twamu Yelushalema. Hezekiya watweshele mu byuma nimwabyo ebye atendele Ndavita.

³¹ Hingebene oho Bambambiloni batumine bantumwana ba liboko lyabo mu kushingishisha shilimukilo shiya shamonekele ha shikati shiya mu litunga lya Yunda, Nyambi wezekele Hezekiya ngayi atende mwaya shifungo shendi niyemwine ngayi amone bya mu mutima wendi.

Kumana kwakulela kwa Hezekiya

³² Byuma byamina nimwabyo kami biya atendele Mwene Hezekiya na kuliyaka kwendi kuli Nyambi ya Ngula, byatikitiwile mu bimonekesho bya muluwe Ishaya mwana Amozi, mu byambo bya Likota lya Bamyene bamu Yunda namu Ishalela.

³³ Hezekiya wafwile pe wafundiwile mu bizino bya wene bya bazukulya Ndavita bya ku lukandwa. Bantu bamu Yunda nimwawo namu Yelushalema bamupanine maleema amanene shikuma ha lufu lwendi. Mwanendi Manashe wamushwanine kwinga mwene.