2 Byambo 30 - Libuka Lya Kuyela

Kuliwahishila Shimbo sha Kupitilila

¹ Mwene Hezekiya watumine lizu ku bantu nimwabo bamu Ishalela namu Yunda. Watikitilile mañwati ku mishobo ya Efulemu na Manashe na kubehana ku Litala lya Nyambi mu Yelushalema mu kupinga Shimbo sha Kupitilila sha kulemesha Nyambi ya Ngula, Nyambi wa Ishalela.

² Mwene Hezekiya na babilolo bendi na bantu bamu Yelushalema betabilile kupinga shimbo mu ngonda wa wubili.

³ Bantu kaliha batweshele kupinga Shimbo sha kupitilila ku shikati sha kufwanina mu ngonda wakutatika, ndaba bakankombela kaliha bakonkanine kuliyelesha, kami kowa bantu babengi bakungulukile mu Yelushalema.

⁴ Mwene na Bantu bawahilile shikuma mu bihanganiko byabo.

⁵ Nohobene behanine Baishalela nimwabo, ba ku ncelele ku litunga lya Ndani kukakuma naku mabukubuku ku Mbelishemba, kukungulukila hamo mu Yelushalema na kupinga Shimbo sha Kupitilila sha Nyambi ya Ngula kukonka ngo muya shayila Shimbo, ngayi beze babengi kupitakana shiya bezanga.

⁶ Ku lizu lya mwene na babilolo bendi, bantumwana bayile na kupita mu Yunda nimwamo namu Ishalela nimwamo na lukuwa ngayi, “Enu bantu ba Ishalela mwashalile mu litunga na kupanza ku Baashiliya oho bakomenenga litunga bokenu haya kuli Nyambi ya Ngula Nyambi wa Abulahama na Ishaki na Yakobo, pe niye kami ukaboka kukwenu.

⁷ Hinga mufweka bankakazenu na baminenu Baishalela aba bengile bakuluwa kuli Nyambi ya Ngula Nyambi yabo. Wabashushwile shikuma ngonehe mu kutwesha kulimonena.

⁸ Hinga mwinga babinkwange ngo eshe bekalile batatizenu, ngoboni ombatalenu Nyambi ya Ngula. Mwize ku Litala lya Nyambi mu Yelushalema elye Nyambi ya Ngula Nyambi yenu anayeleshe mwaya myaka. Mwize na kumulemesha ngayi mwanga akabule kukamipilamina kami.

⁹ Ndi mu kuboka kuli Nyambi ya Ngula, niho baya batwala bawushindawenu kwashenge mukwinga bantapwa bakekala na nceshe hahabo na kubetabila ngayi baboke ku litunga lino. Nyambi ya Ngula, Nyambi yenu wenga wa shishemo na nceshe, kami ndi mu kubokela kukwendi, ukamitambula.”

¹⁰ Bantumwana bayile ku minzi nimwayo ya matunga a mishobo ya Efulemu na Manashe, kukakuma naku ncelele ku mushobo wa Zembuloni, ngoboni bantu babahepele na kubahengamina.

¹¹ Bantu bamo ba ku mishobo ya Asha na manashe na Zembuloni aba bekalile na kushinga kuya ku Yelushalema.

¹² Nyambi ya Ngula kami wengishile bantu bamu litunga lya Yunda kwikala na mutima umo wakwombatala shifungo shendi na kukonka ndayano eze emikile Mwene Hezekiya na babilolo bendi.

Kupingiwa kwa Shimbo sha Kupitilila

¹³ Likunge lya bantu babengi bakungulukilile mu Yelushalema mu ngonda wawubili mu kupinga Shimbo sha Mankende a kubula mumena.

¹⁴ Bafumishile tuula nimwato tuya batendeshelenga baya balemeshelenga ba nyambi bowa mu Yelushalema na tuula nimwato twa kuhokesha incence, pe babiyumbilile mu mukulo wa Kindiloni.

¹⁵ Kami ha mutena wawulikumi na yinaa wa ngonda wawubili bazihile mwana mbelele wa nkombela yaha kupitilila. Bakankombela na Balevi aba babulile kwinga ba kuyela bekalile na lisheni pe balifungwilile nibo bamwine kuli Nyambi ya Ngula, ngayi mwanga batweshe kukombelela zinkombela za kuhokesha mu Litala lya Nyambi.

¹⁶ Bakwalamine mu myanya yabo mu Litala lya Nyambi ngonehe kufundiziza kwa ndayano za Moshesha muntu wa Nyambi. Balevi bapanikile mukeza wa zinkombela ku bakankombela aba bamyanzililenga mukeza ha kaala.

¹⁷ Ndaba mwekalile bantu babengi mu likunge babulile kwinga bantu ba kuyela, pe bantu kaliha batweshele kuziha mwana mbelele waha kupitilila, nohobene Balevi babazihilileko, pe bafungwilile bana ba bambelele kuli Nyambi ya Ngula.

¹⁸ Shinene, kami wingi wa baya bafumine ku mishobo ya Efulemu na Manashe na Ishaka na Zembuloni, kaliha batendele shiheka sha kuliyelesha, nohobene bapingile ku Shimbo sha Kupitilila mu nzila yayibi. Mwene Hezekiya wabalombelelele ngayi,

¹⁹ “Obe Nyambi ya Ngula uli wamuwahe, Obe Nyambi wa bankakazetu, yatila baya bali na kukulemesha na mitima yabo nimwayo, hinge ndi banabulu kuyela.”

²⁰ Nyambi ya Ngula wakumbwile malombelo a Hezekiya, pe wayatilile bantu.

²¹ Ha matena mutanu na abili Baishalela aba bakungulukilile mu Yelushalema bapingile Shimbo sha Mankende A kubula Mumena na ku wahilila kwakunene. Ha mutena ha mutena Balevi na bakankombela bayemezele Nyambi ya Ngula na nyala zabo nimwazo.

²² Hezekiya wayemezele Balevi ha wutungu wabo wakwendesha shiwahe Shimbo sha kulemesha Nyambi ya Ngula pe bantu balile byakulya bya ha Shimbo mu matena mutanu na abili hibakombelela zinkombela za kulilumikila mu kuyemeza Nyambi ya Ngula, Nyambi ya bankakazabo.

Shimbo sha wubili

²³ Shikungulukilo nimwasho shaliyuvwashanine kuhenyesha ku matena a Shimbo matena mutanu na abili. Nohobene bapingile na ku wahilila.

²⁴ Hezekiya mwene waku Yunda wapanikile bankunzi 1,000 na bambelele 7,000 ku bantu ngayi bazihe balye, pe kami babilolo bapanine bankunzi na bambelele 10,000. Wingi wa bakankombela baliyeleshele.

²⁵ Nohobene bantu bamu Yunda nimwabo bekalile na ku wahilila na bakankombela na Balevi na bantu aba bafumine ku Ishalela ku ncelele na mapukwenda aba bekalilila mu Ishalela namu Yunda.

²⁶ Lukena lwa Yelushalema lwekalile mu ku wahilila, ndaba kowa sha kufweka ngo eshe shamonekele ku balika ku matena a Sholomoni mwene wa Ishalela mwana Ndavita.

²⁷ Bakankombela na Balevi banyepele mfuywezi za Nyambi ya Ngula ha bantu. Nyambi wayuvwile malombelo wabo, pe wawatambwile muyo mu munzi wendi wa muyilu.