2 Byambo 3 - Libuka Lya Kuyela1 Mwene Ndavita, tata Sholomoni watatikile kuzika mushuwa wa kuzikila Litala lya Nyambi mu Yelushalema ha lipili lya Moliya, oku Nyambi ya Ngula aliholwele kukwendi, kuyo ku mwanya uyo Olinani wa Kayembushi atendeshelenga kwinga likotwelo. 2 Mulimo watatikile mu ngonda wawubili mu mwaka wawunaa wakulela kwa Sholomoni. 3 Litala lya Nyambi elye atendele Mwene Sholomoni, wutali walyo wengile mamita 27 na muwipi walyo wengile mamita 9. 4 Ku menginino a Litala lya Nyambi kwafwanikizile hamo ngonehe muwipi engile mamita 54 kami mwimo walyo engile mamita 54 mukati ka kampenci balambwilishilemo na ngolinde yayiwahe. 5 Kampenci kakanene bakafwikile maleenge a bitondo bya mupaini na kulambwilishamo na ngolinde yayiwahe, eye yatangiwile na bitondo bya minkomona na bitowanisho bya nketwana. 6 Mwene watobwanishile Litala lya Nyambi na mamanya amawahe a ndando, kami na ngolinde yafuminenga mu litunga lya Palivayima. 7 Watendeshelenga ngolinde yakulambwilisha ha mamota a Litala lya Nyambi na ha honto za maleenge na malyatilo a bipana na bihala. Ha mamota bakamilimo ba mangulileho bifwekesha bya makelumbi. 8 Kampenci ka mukati omu mu kutumbiwa ngayi Mwanya wa Kuyela Shikuma mwengile mamita 9 mu wutali namu wipi, niwo wengile wunene wamu lupati lwa Litala lya Nyambi. Wulemu wakupitakana makilongilamu 20,000 a ngolinde bayitendeshele mu kufwika mamota a Mwanya Wakuzila Shikuma. 9 Kami wulemu wakupitakana shitika sha kilo sha ngolinde bawufulile zindonda. Na mamota a tumpenci twa kuyilu niwo kami afwikiwile na ngolinde. 10 Mwene kami watongwezele bakamilimo bendi kubaza makelumbi abili. Pe bawafwikile na ngolinde na kuwayaka mu Mwanya wa Kuyela Shikuma. 11 Mbando za makelumbi nimwazo hamo ha kutandubuka zengile mamita 9. Wutali wa lubando lwa likelumbi limo lwengile mamita 9 ha kutandubula lubando lwa likelumbi na likelumbi lwakinkile ku limota na limota lya litala. Lubando lwalyo lwamina lwa mamita abili lwaliwanine hakati ka kampenci na lubando lwa likelumbi lyamina. 12 Lubando lwa likelumbi lwa mamita abili lwakinkile ku limota lya litala, pe lubando lwamina kami lwa mamita abili lwaliwanine na lubando lwa likelumbi lya kutatika. 13 Mbando za makelumbi zatandubukile mamita 9, makelumbi emanine na mawulu wawo hinga apenza ku kampenci kakanene. 14 Shibaamba sha mukati ka Litala lya Nyambi ya Ngula lya kuyela shikuma shatendiwile ha likwiza lyaliwahe lya kulelema na likwiza lyamina lyatangiwile wuhombo na kufumbuluka na kufubila na bifwekesha bya makelumbi atendiwileho. Zimpangwa zibili za lubemba ( 1 Bamyene 7:15-22 ) 15 Mwene wayungwilile bishimi bibili bya lubemba, shishimi na shishimi wutali washo shengile mamita 15. Pe wabiyakile kumbili ya Litala lya Nyambi. Shishimi na shishimi shekalile na mutwe wa wutali wakupitakana mamita 2.25. 16 Hayilu ya bishimi batowanishileho lyozi lya nketwana za ku shinta na bifwekesha bya manzenze a lubemba a mwanda. 17 Bishimi byazikiwile ku zimbalila za menginino a Litala lya Nyambi, shimo ku mabukubuku shatumbiwile ngayi Yakini, pe shamina ku ncelele shatumbiwile ngayi Mbowazi. |
Libuka Lya Kuyela © Bible Society of Zambia, 2020.
Bible Society of Zambia