2 Byambo 28 - Libuka Lya Kuyela

Ahazi mwene wamu Yunda

¹ Ahazi wekalile na myaka 20 oho ashwanine ha wene, pe walelele Yelushalema myaka 16. Kaliha wakonkele nzila yayiwahe ya nkakayendi Mwene Ndavita, ngoboni watendele bya kubula kuwahilisha Nyambi ya Ngula.

² Kami wakonkele zinzila za bamyene bamu Ishalela. Wekalile na tunankishi twa byondo twa Mbaalu.

³ Wahokeshelenga incence mu Mukulo wa Hinoma kami wakombelelele bana bendi babalume ba kulibelekela kwinga nkombela ya kuhokesha ku tunankishi, kukonka biheka bya wunyengwe batendelenga bantu aba atandile Nyambi ya Ngula mu litunga oho Baishalela bayilenga na kulikaka.

⁴ Ahazi wakombelelenga zinkombela na kuhokesha incence ku myanya yaha binkanda ya bakakulemesha banyambi bowa namu mibombola ya mitondo nimwayo.

Matunga Ashiliya na Ishalela a kulwisha wene wa Yunda

⁵ Ndaba ya Kubipisha kwa Mwene Ahazi Nyambi ya Ngula Nyambi yendi, wetabilishile mwene waku shiliya kumukoma na kutwala wingi wa bantu ba Yunda ku Ndamashika mukwinga bantapwa. Nyambi ya Ngula kami wetabilishile mwene wamu Ishalela, kukoma Ahazi

⁶ Mutena umo Mwene Peka mwana Lemaliya wazihile bakanzita ba kukanca ba Bayunda 120,000. Nyambi ya Ngula Nyambi wa bankakazabo, wetabilishile eshe ngayi shimoneke ndaba bamufutaminine.

⁷ Kanzita waku Efulemu watumbiwile Zikali wazihile Mayasheya mwana mwene Ahazi na Azilikamu mukakwendesha ku musheke na Elikana ou wengile mukulwane wawubili wakulundamina kuli mwene.

⁸ Hinge ndi Bayunda bengile bawushinda wa Baishalela, nzita ya Baishalela yakwatile bambuyama na batwanuke 200,000 kwinga bantapwa, pe babatwalile ku Shamaliya, hamo na lipuku lyalingi.

Muluwe Ondendi

⁹ Muluwe wa Nyambi ya Ngula watumbiwile ngayi Ondendi, ou wazikilenga mu lukena lwa Shamaliya, washimbawilile nzita ya Baishalela babokelenga ku Shamaliya na bantapwa babo ba Yunda. Oho bengile ngo bakushinga kwingina mu lukena pe wambile ngayi, “Mona, Nyambi ya Ngula, Nyambi wa bankakazenu wapilamina Yunda na kumitabilisha ngayi mubakome, ngoboni Nyambi muyilu nayuvwu eshe munabazihilimo na wukali na nguma.

¹⁰ Pe haya enu muli na kushinga kufutula aba balume na bambuyama bamu Yelushalema namu Yunda kwinga bandungo zenu. Kati kulimuka mufwako ngayi nenu kami munatende wubi wakulwisha Nyambi ya Ngula, Nyambi yenu ndi?

¹¹ Yuvwililenu kukwami. Aba bantapwa banengi bawushindawenu babalume na bambuyama. Balehenu baboke, ndelewa Nyambi ya Ngula na wukali wendi ukamishushula.”

¹² Balume banaa ba mpupo ba ku wene waku ncelele wa Efulemu ba Azaliya mwana Yehohanani na Mbelekiya mwana Meshilemoti na Yehizekiya mwana Shaluma na Amasha mwana Handilayi nibo baluwanganishile bakanzita.

¹³ Bambile ngayi, “Hinga muleta baya bantapwa kuno. Twa bipishilakale Nyambi ya Ngula na kumupilamisha ngayi atushushule. Haya enu muli na shihanganiko sha kunenehesha mulandu wetu kununga ku nowe tuna bipishi.”

¹⁴ Nohobene haya bakanzita bashobwele bantapwa na kupana lipuku ku maboko a bantu naku bakakutwaminina babo,

¹⁵ pe baya balume banaa banatoyiwi mazina wabo bakatukile na kupanika bivwalo ku bantapwa baya bekalile na uvwu bya ku lipuku. Babapanikile bivwalo na ncangwa, pe babapanine byakulya na mema bya kubakonkana, pe bayakile mazi a olive ha bitombo byabo. Obo bakwangile kwenda babayakile ha bambongolo, pe bantapwa nimwabo bababweshele ku Yeliko, lukena lwa bitondo bya minkomona mu litunga lya Yunda. Niho Baishalela babokele ku munzi ku Shamaliya.

Ahazi ukunyepa Ashiliya kumuyavwa

¹⁶ Ha shikati shiya Mwene Ahazi walobele Tingilati mwene wamunene wamu Ashiliya mu kumuyavwa.

¹⁷ Ndaba Baendoma kami bakatukilile mutakwe Yunda pe bakwatile bantapwa babengi.

¹⁸ Ku nosho shikati shimo bene, Bafwilishitina bapukwile minzi yaku tumbulumbumba twa ku mponci naku mabukubuku a Yunda. Bapukwile minzi ya Mbeti Shemeshi na Ayaloni na Ngendeloti na minzi ya Shoko na Timina na Ngimezo hamo na tunzi twayo, pe bazikile kuyo kwikalilila.

¹⁹ Nyambi ya Ngula waletelele malwa ha litunga lya Yunda ndaba ya Ahazi mwene wa Ishalela ou wakeyelele bantu bendi ku byuma byabo pe wabengishile bakuluwa kuli Nyambi ya Ngula.

²⁰ Nohobene Tingilati Pilesha mwene wamunene waku Ashiliya, waluwanganishile Mwene Ahazi na kumuyandisha ha kwinga ngayi amuyavwe.

²¹ Nohobene Ahazi watolele ngolinde mu Litala lya Nyambi ya Ngula namu minzi ya bakakutwamina bantu na kuyipanika kuli mwene wamunene wamu Ashiliya, ngoboni hinge noho eshe shabulile kumuyavwa.

Kubipisha kwa Ahazi

²² Oho malwa anenehele, mwene Ahazi wabipishilile Nyambi ya Ngula shikuma, kupitakana mwaka.

²³ Wakombelelenga zinkombela ku banyambi ba Ndamashika, aba bamukomene. Wambile ngayi, “Banyambi ba Baashiliya bayavwile bamyene bamu Shiliya, pe ndi nikukombelela kukwabo, pe ba kutwesha kami kunyavwa.” Eshe shaletele kampwe hahendi na ha Ishalela nimwabo.

²⁴ Byamina kami atendele, washimbile byuma nimwabyo bya mu Litala lya Nyambi ya Ngula na kubipabozola. Ahazi washinkile Litala lya Nyambi ya Ngula na kuzika tuula mu zimbalila nimwazo zamu Yelushalema.

²⁵ Mu minzi nimwayo namu tunzi twamu Yunda wazikile myanya yaha binkanda yakulemeshela banyambi bowa, oku bahokeshelenga incence. Mu nzila eye waliletelele niyemwine wukali wa Nyambi ya Ngula, Nyambi wa bankakazendi.

²⁶ Byuma nimwabyo byamina bya kulela kwendi, ku balika ku kutatika kukuma naku mamaninino, byatikitiwile mu Byambo bya likota lya bamyene bamu Yunda namu Ishalela.

²⁷ Mwene Ahazi wafwile pe wafundiwile mu Yelushalema ngoboni kaliha wafundiwile mu bizino bya bamyene ba Ishalela. Mwanendi Hezekiya wa mulume wamushwanine kwinga mwene.