2 Byambo 27 - Libuka Lya Kuyela

Yotamu Mwene wamu Yunda

¹ Yotamu washwanine ha wene oho uli na myaka 25, pe walelele mu Yelushalema myaka 16. Mandiyendi wengile Yelusha, mwana Zandoki.

² Yotamu watendele bya kuwahilisha Nyambi ya Ngula ngonehe atendele tatiyendi Uziya, ngoboni kaliha wafwekele tatiyendi ou wabipishile ha kuya mu kuhokesha incence mu Litala lya Nyambi. Ngoboni bantu bazaminine kutenda wubi.

³ Wengile Yotamu uya wazikile Lipangati lya ku Ncelele lya Litala lya Nyambi ya Ngula. Watendele mulimo wakunenehesha ku kembi ka lukena ku mbalila ya Yelushalema yatumbiwile ngayi Ofwila.

⁴ Mu mapili amu Yunda wazikilemo minzi, pe mu mashaka wazikilemo bipata na tupeshi.

⁵ Yotamu walwishile mwene wamu litunga lya Amoni pe wamukomene. Wakandikizile Baamoni kumutwalilanga ntupu eye ha mwaka ha mwaka ku myaka yihatu, wulemu wa shiliva wa makilongilamu 3,400 na matani a loto 1,000 na matani a luku 1,000.

⁶ Ngovu za Yotamu zanenehele ndaba wombatalile mu kupwisha Nyambi ya Ngula, Nyambi yendi.

⁷ Byuma byamina bya ha kulela kwa Yotamu na zinzita zendi na nyinkalo yendi, byatikitiwile nimwabyo mu Byambo bya likota lya Bamyene bamu Ishalela namu Yunda.

⁸ Yotamu wekalile na myaka makumi abili na mutanu oho ashwanine ha wene, pe walelele mu Yelushalema myaka likumi na mutanu na umo.

⁹ Yotamu wafwile, pe wafundiwile mu bizino bya wene mu Lukena lwa Ndavita, pe mwanendi wa mulume Ahazi wamushwanine kwinga mwene.