2 Byambo 26 - Libuka Lya Kuyela

Mwene Uziya wamu Yunda

¹ Bantu nimwabo bamu Yunda bahatile Uziya mwana Amaziya wa mulume, ou wekalile na myaka 16 ku shwana tatiyendi kwinga mwene.

² Niho shatendiwile oho Amaziya wafwakale, pe Uziya watendulwile munzi wa Elati nakuwubwesha ku Yunda.

³ Uziya washwanine wene oho uli na myaka 16, pe walelele mu Yelushalema ha myaka 52. Mandiyendi wengile Yekoliya waku Yelushalema.

⁴ Watendelenga bya kuwahilisha Nyambi ya Ngula, wakonkele nzila ya tatiyendi Amaziya.

⁵ Shikati nimwasho shiya ayoyele Zakaliya wafundizizile Uziya mukutina Nyambi. Uziya watendelele milimo Nyambi ya Ngula na kulunga, pe Nyambi wamutandalishile.

⁶ Uziya wayile ku Nzita mu kulwisha Bafwilishitina. Wabunkwele twimbi twa minzi Ngati na Yambina na Ashindondi. Bazikile zinkena mu myanya ya Ashindondi namu Fwilishitina nimwamo.

⁷ Nyambi wamuyavwile kukoma Bafwilishitina na baka Alambu baya bazikilenga ku Ngali Mbaalu na Bameunima.

⁸ Baamoni batwalilenga zintupu kuli Uziya, kami wengile wa ngovu shikuma pe wayile mpupo iya yakakumine naku Engepita.

⁹ Uziya washumishile kembi ka Yelushalema na kuzika tumpenci ku Lipangati lya ku Nkomi naku Lipangati lya ku mukulo na kuya kakontamina kembi.

¹⁰ Wazikile kami tupeshi mu zimbuwa, pe wakabishile bikongelo bya mema byabingi, ndaba wekalile na matanga amengi a bimuna mu tumbulumbumba twa ku mponci namu zimbuwa. Ndaba wahakile kulima pe wayingizile bantu kulima mafuba a shinyanca mu litunga lya binkanda na kulima limvu lya wilo.

¹¹ Uziya wekalile na litanga lyalinene lya bakanzita baliwahishila kulwa. Mazina a bakanzita akongiwile mu mabuka atikitiwile bakakutikita bendi ba Yeyiwelu na Mayasheya, mukwendeshiwa kwa Hananiya waku muhoko wa babilolo ba bakulwane ba mwene.

¹² Bendeshelenga nzita bengile 2,600.

¹³ Bakanzita bendeshelenga bengile 307,500 aba batweshele kulwila shikuma mwene ku bamalamo bendi.

¹⁴ Uziya wapanikile bakanzita makebo na milinga na zihoshi na bivwalo bya nzita na bipando bya mikunzi na mivwi na mamanya akubilangwa.

¹⁵ Mu Yelushalema bantu batendele bilwisho bya kupuhisha mivwi na mamanya amanene aku tupeshi naku zinkomi za kembi ka lukena. Wayile mpupo nimwako, kami wekalile na ngovu shikuma ndaba Nyambi wamuyavwile shikuma.

Uziya ukushushuliwa ha kuliyemeza kwendi

¹⁶ Ngoboni oho Mwene Uziya ashumankanine ha wene watatikile kulilundumika, pe shiya shamuletelele kutamwa. Wabipishilile Nyambi ya Ngula, Nyambi yendi, ha kuya mu Litala lya Nyambi ngayi akahokeshelemo incence ha kaala ka incence.

¹⁷ Ngoboni mukankombela Azaliya na baminendi bakankombela 80 ba kushuma na kukanca, bakonkele mwene,

¹⁸ mu kumukanisha kutenda noho. Bambile ngayi, “Uziya, obe ku fwanina wufwako kuhokesha incence kuli Nyambi ya Ngula. Ndele tuhu bakankombela aba batutika kuli Aloni, nibo bafungwiliwile kutenda eshe. Tutika muno mu mwanya wakuzila. Wapilamishakale Nyambi ya Ngula, pe kuka kupana mfuywezi yendi wufwako.”

¹⁹ Uziya wemanine muyo mu Litala lya Nyambi ya Ngula ku nkumo ya kaala kakuhokeshela incence hinga akwatilila shinzoyo sha kuhokeshela incence. Niye wapilaminine bakankombela, pe kubazumuka tuhu, ha lupala lwendi hihakututika wulweli wa bimakwa.

²⁰ Azaliya na bakankombela bamina banconcomekele meho ha lupala lwa mwene na kulikomokela, pe niho bamukandikizile ngayi afume mu Litala lya Nyambi ya Ngula. Uziya wanyankupile kututika ha munkanda ndaba Nyambi ya Ngula wamushushwile.

²¹ Mu kuyoya kwendi kwa mamaninino, mwene Uziya wengile wakuzilikiwa shikuma ndaba ya wulweli wendi wa bimakwa. Kaliha watweshele kami kwingina mu Litala lya Nyambi ya Ngula, wekalile tuhu ku litala lyendi lya ku mbali. Waleheshiwile ku milimo nimwayo, ha shikati shiya mwanendi wa mulume Yotamu niye walelelenga litunga.

²² Muluwe wa Nyambi Ishaya mwana Amozi wa mulume watikitile mu libuka byuma nimwabyo biya atendelenga mwene Uziya ha shikati sha kulela kwendi.

²³ Uziya wafwile pe wafundiwile mu limvu lyafundiwanga bamyene, ngoboni ndaba ya wulweli wendi kaliha wafundiwile mu bizino bya wene. Mwanendi Yotamu wamushwanine kwinga mwene.