2 Byambo 25 - Libuka Lya Kuyela

Mwene Amaziya wamu Yunda

¹ Amaziya washwanine ha wene oho uli na myaka 25, pe walelele mu Yelushalema myaka 29. Mandiyendi wengile Yehoyandini waku Yelushalema.

² Watendele bya kuwahilisha Nyambi ya Ngula, ngoboni kaliha na mutima nimwawo.

³ Oho ashumine tuhu ha wene, Amaziya wazihile babilolo aba bazihile tatiyendi.

⁴ Hinga noho kaliha wazihile bana babo, ngoboni wakonkele ebye alayile Nyambi ya Ngula mu ndayano za Moshesha ngayi, “Bahemi hinga bazihiwila ha milandu eye batenda bana babo, bana kami hinga bazihiwila ha milandu eye batenda bahemi babo. Muntu ukuzihiwila tuhu ha mulandu ou anatende niyemwine.”

Nzita ya kulwisha Endoma

⁵ Niho Mwene Amaziya akungwile bantu nimwabo ba mishobo ya Yunda na Mbenjamani mu kubatapatapa mu mihoko ya bakanzita ngo ku mavumo awa bahemuwa na kuyaka babilolo kutwaminina litanga lya bantu ba likulukazi limo na litanga lya bantu ba mwanda umo. Aba bengile tuhu bantu ba myaka makumi abili hinge kupitakana, bengile bakanzita 300,000 nimwabo hamo. Bengile ba kuhatiwa, baliwahishila bya nzita, ba wunongi ba kupuha milinga na kutendesha makebo.

⁶ Mukufungila ku baya, wakalobele bakanzita 100,000 mu Ishalela ha ndando ya wulemu wa makilongilamu 3,400 ya shiliva.

⁷ Ngoboni mulume wa Nyambi wayile kuli mwene mu kumutongweza ngayi “Hinga ushimba aba bakanzita ba Ishalela na kuya nabo. Nyambi ya Ngula kaliha uli nabo hamo aba bantu ba ku wene waku ncelele wa Efulemu.

⁸ Hamina ukuhanganika ngayi mukekala na ngovu mu nzita, ngoboni nengi Nyambi uli na ngovu za kukupana kukoma hinge bamalamo bobe kukukoma.”

⁹ Amaziya wepwile muntu wa Nyambi ngayi, “Ngoboni haya nahiti iya shiliva nayumbakale hahabo?” Muntu wa Nyambi wakumbwile ngayi, “Nyambi ya Ngula ukutwesha kukubweshela yayingi kupitakana iyo.”

¹⁰ Nohobene Amaziya wabweshele makunge akalobele kwashenge na kubatongweza ngayi baye ku munzi kufuma ku Efulemu. Baishalela bapilaminine bantu Bayunda, pe babokele kukwabo na kuvundangila.

¹¹ Ngoboni Amaziya walikwatishile pe watwalile bakanzita bendi ku Mukulo wa Mushele, kuyo niko bakalwililile, pe wakazihile bakanzita ba Baendoma 10,000.

¹² Bakanzita ya Yunda bakapukwile kami 10,000 banzita bamina ba Baendoma. Batwalile aba bantapwa kuyilu ya lipili ku lukena lwa Shela, pe babayumbilile mu nceto, nohobene bazihiwile ku mamanya amu nceto.

¹³ Ha shikati oshobene, bakanzita ba Baishalela baya akanishile Amaziya ngayi hinga baya mukwingina nendi mu nzita balwishile minzi ya Yunda mukati ka Shamaliya na Mbeti holoni. Bazihile balume 3,000 pe bapukwile byuma byabingi.

¹⁴ Oho Amaziya abokele mu kukoma Baendoma wezile na tunankishi twabo, watwimikile pe watulemeshele, pe wahokeshelele incence kukwato.

¹⁵ Eshe shapilamishile Nyambi ya Ngula, niho atumine muluwe kuli Amaziya. Muluwe wamwipwile ngayi, “Kati shumangani unalemeshele banyambi bowa baya babula kutwesha kulamwina bantu babo ku ngovu zobe?”

¹⁶ Oho muluwe ambilenga, Amaziya wamuluwanganishile, wambile kukwendi ngayi, “Kati mutena ngani twakwimikile ngayi winge mukakubela mwene, hinga wamba ndelewa ukuzihiwa.” Ngoboni oho muluwe shilolo amwene wambile ngayi, “Haya nikulimuka ngayi Nyambi unafungu kukunongesha ndaba unatende ebye nimwabyo, kami unalimbululu kubela kwami.”

Nzita ya kulwisha Ishalela

¹⁷ Mwene Amaziya wamu Yunda na bakakumubela babebele Ishalela. Niho atumine lizu kuli Yowashi mwana Yehoyahazi mwene wamu Ishalela ou wengile mwana Yehoyazi wa mulume kami wengile muzukulya Yehu, wamutongwezele ngayi, balwe.

¹⁸ Yowashi mwene wa Ishalela wabweshele okwe kukumbula kuli Amaziya mwene waku Yunda ngayi, “Kwekalile lipukumuna lya mihengela ha Lipili lya Lembanoni lyatongwezele mutondo wa shinda ngayi, ‘Yitabila ngayi mwanobe ayekiwe kuli mwanami.’ Niho kwezile kayamana wa lishaka na kulyatangila liya lipukumuna lya mihengela.

¹⁹ Haya obe Amaziya, ukuliyemeza ngayi, ‘Unakomo ba Endoma,’ ngoboni nikukubela ngayi ushale ku munzi. Kati shumangani eshe ukulishingishila wukalu ou ukuleta kuloba hahobe na ha bantu bobe bamu Yunda?”

²⁰ Ngoboni Amaziya wakanine kuyuvwa. Shengile shifungo sha Nyambi hali Amaziya kukomiwa, ndaba walemeshelenga tunankishi twa Endoma.

²¹ Nohobene Mwene Yowashi wamu Ishalela wayile mu kulwa nzita na Mwene Amaziya wamu Yunda. Nzita yaliwanine ku Mbeti Shemeshi mu Yunda.

²² Nzita ya Bayunda yakomiwile ku Baishalela pe bakanzita batininine ku minzi yabo.

²³ Mwene Yowashi wamu Ishalela wakwatile Amaziya mwene wa Yunda ku Mbeti Shemeshi pe wamutwalile ku Yelushalema. Kuyo niko akanyemwinine kembi ka lukena ku balika ku Lipangati lya Efulemu kukuma ku Lipangati lya ku Nkomi, mukala wa mamita 200.

²⁴ Wapukwile mu Litala lya Nyambi ngolinde na shiliva na byuma bya mu Litala lya Nyambi balaminenga bazukulya Ombendi Endoma na zimfuma za wuheti wa musheke na kutwala ku Shamaliya. Wakwatile kami bantapwa na kuya nabo hamo.

²⁵ Amaziya mwana Yowashi mwene waku Yunda wayoyele myaka 15 kunyima ya lufu lwa Yowashi mwana Yehoyahazi, mwene wa Ishalela.

²⁶ Byuma nimwabyo biya atendele Amaziya ku balika ku kutatika na kukuma ku mamaninino a kulela kwendi byatikitiwile mu byambo bya likota lya Bamyene bamu Yunda namu Ishalela.

²⁷ Ku balika shikati shiya Amaziya afutaminine Nyambi ya Ngula, kwekalile kubeba kwa hahendi mu Yelushalema lwa kumubeba. Kukumininako watininine ku munzi wa Lakishi, ngoboni bamalamo bendi bamukonkeleleko pe bakamuzihile.

²⁸ Mutuntu wendi bawubweshele ku Yelushalema ha mbishi, pe wafundiwile mu bizino bya wene mu Yunda mu Lukena lwa Ndavita.