2 Byambo 24 - Libuka Lya Kuyela

Mwene Yowashi wamu Yunda

¹ Yowashi washwanine wene wamu Yunda oho uli na myaka mutanu na yibili, pe walelele mu Yelushalema myaka makumi anaa. Mandiyendi wengile Zimbiya wamu munzi wa Mbelishemba.

² Yowashi watendele bya kuwahilisha Nyambi ya Ngula oho mukankombela Yehoyanda ushili kuyoya.

³ Yehoyanda wahatilile Mwene Yowashi bambuyama babili, pe bamubelekelele bana babalume naba babambuyama.

⁴ Oho wekalakale ha wene shikati shashishe, Yowashi wahanganikile kutendulula Litala lya Nyambi ya Ngula.

⁵ Watongwezele bakankombela na Balevi kuya ku minzi yamu Yunda na kukungwisha mali ku bantu ba Ishalela nimwabo akulingana, akutendulwishanga ku Litala lya Nyambi ya Ngula ha mwaka ha mwaka. Wabatongwezele ngayi batende wanguwangu ngoboni Balevi behalile shikuma.

⁶ Nohobene mwene wehanine mukankombela wa mukulwane Yehoyanda, pe wamwipwile ngayi, “Kati shumangani unalehelele balevi kubula kukungwisha mutelo mu Yunda namu Yelushalema, ou mutelo ateleshelenga Moshesha mukamulimo wa Nyambi ya Ngula ku bantu ngayi winge wakuwahishisha Ntanda ya Shikungulukilo?”

⁷ Bakakukonka Ataliya, uya mbuyama wamubi, wabipishilenga Litala lya Nyambi ya Ngula, kami batendeshele wingi wa bingwalingwali bya shizila mu kulemesha Mbaalu.

⁸ Mwene watongwezele Balevi ngayi batende likwati lya kuyakanga mukungwila, pe baliyake ku lipangati lya Litala lya Nyambi ya Ngula.

⁹ Batumine lizu mu Yelushalema nimwamo namu Yunda ku bantu nimwabo ngayi balete kuli Nyambi ya Ngula mutelo ou akungwishilenga ku Baishalela mu libelelengwa ha kutatika mukamulimo wa Nyambi Moshesha.

¹⁰ Eshe shawahililishile bantu na bakakutwaminina babo pe baletelenga mali wabo a mutelo na kwinzalisha likwati.

¹¹ Ha mutena ha mutena Balevi batwalilenga likwati kuli shilolo waku wene ou wengile mukakulilama shikati nimwasho oho lyenzalilenga, mukakutikita waku wene na mukakwimanina mukankombela wa mukulwane bafumishilenga mali amengimengi shikuma.

¹² Mwene hamo na mukankombela Yehoyanda bapanikilenga mali ku baya bengile bakakwendesha baka kutendulula Litala lya Nyambi ya Ngula, pe niho behaninenga bakakulembulula mamanya na bambazi, pe kami na bamfuzi ba byondo na lubemba ngayi batendulule Litala lya Nyambi ya Ngula.

¹³ Bakamilimo nimwabo batendelenga na kukalamana pe batendele Litala lya Nyambi ya Ngula mu wupya ngonehe lyekalile mwaka, kwinga lya ku shuma shikuma.

¹⁴ Oho kutendulula kwamanine, ngolinde na shiliva yahumbukileko yapanikiwile kuli mwene na kuli Yehoyanda, pe ha wutale batendeleho zindonga za kukunama na bya kukwatila byamina bya mu Litala lya Nyambi ya Ngula. Shikati osho ayoyelenga Yehoyanda, zinkombela zapanikiwilenga shikati nimwasho ku Litala lya Nyambi ya Ngula.

Nyinkalo ya Yehoyanda yikulehiwa

¹⁵ Oho Yehoyanda ekalile na myaka 130, pe wafwile.

¹⁶ Bamufundile mu bizino bya wene mu Lukena lwa Ndavita ndaba watendele shiwahe ku bantu ba Ishalela na kuli Nyambi na Litala lyendi.

¹⁷ Ngoboni ha kufwa kwa Yehoyanda bakakutwaminina bamu Yunda bakandikizile Mwene Yowashi kuyuvwilila kukwabo.

¹⁸ Nohobene bantu balehele kulemeshelanga mu Litala lya Nyambi ya Ngula, Nyambi wa bankakazabo, pe batatikile kulemesha tunankishi na bifwekesha bya nyambi wambuyama Ashela. Milandu yabo ha wubi owe waletele wukali kuli Nyambi ya Ngula ha Yunda na ha Yelushalema.

¹⁹ Nyambi ya Ngula watumine miluwe mu kubabeba ngayi baboke kukwendi, ngoboni bantu bakanine kuyuvwa.

²⁰ Niho Moyo wa Nyambi watukukishile Zakaliya, mwana mukankombela Yehoyanda wa mulume, Wemanine oku batweshele kumumona bantu, pe wabilikile ngayi, “Nyambi ya Ngula uli na kumipula ngayi kati shumangani eshe munalimbwilili ndayano zendi? Muli na kuliletela makando enu bamwine. Munamufutamini nohobene na niye kami unamifutamini.”

²¹ Ngoboni Mwene Yowashi hamo na bantu babebele Zakaliya. Oho batongweziwile kuli mwene, bantu bapuhile Zakaliya mamanya mu shipango sha Litala lya Nyambi ya Ngula.

²² Mwene Yowashi wavulamine shishemo shiya amoneshele Yehoyanda tata Zakaliya, pe Zakaliya wazihiwile. Oho Zakaliya atwalilenga mu kufwa wabilikizile ngayi, “Nyambi ya Ngula mwanga atweshe ku mona ebye muli na kutenda na kumishushula.”

Kumana kwa wene wa Yowashi

²³ Ha kumana kwa mwaka, nzita ya Baashiliya yalwishile Yunda na Yelushalema. Yazihile bakakutwaminina nimwabo, pe yashimbile lipuku lyalingi na kutwala ku Ndamashika.

²⁴ Nzita ya Baashiliya yengile yayishe, ngoboni Nyambi ya Ngula wabetabilishile ngayi bakome bakanzita babengibengi ba Bayunda ndaba bantu bafutaminine Nyambi ya Ngula, Nyambi wa bankakazabo. Niho Mwene Yowashi ashushuliwile mu nzita eye.

²⁵ Walemanine shibi, bakamilimo bendi babili bamubebele pe bamuzihile mu wulili wendi mu kubwesha wubi ku wubi ku mponde ya Zakaliya mwana mukankombela Yehoyanda. Wafundiwile mu Lukena lwa Ndavita, ngoboni kaliha mu bizino bya wene.

²⁶ Bantu bamubebele bengile Zabandi mwana mbuyama wa Kaamoni wa mulume ou watumbiwile ngayi Shimeyata na Yehozabandi mwana mbuyama wa Kamowambi wa mulume ou watumbiwile ngayi Shemilita.

²⁷ Makomonona amu Libuka lya Bamyene muli byambo bya bana ba Yowashi babalume na nebye balubulwile miluwe ba Nyambi hahendi, bya kumulwisha na neshe atendulwile Litala lya Nyambi ya Ngula. Pe mwanendi Amaziya wa mulume wamushwanine kwinga mwene.