2 Byambo 21 - Libuka Lya Kuyela

¹ Yehoshafwati wafwile pe wafundiwile mu bizino bya wene mu Lukena lwa Ndavita, pe mwanendi wa mulume Yeholamu wamushwanine kwinga mwene.

Mwene Yeholamu wamu Yunda

² Yeholamu mwana Yehoshafwati, mwene wamu Yunda, wekalile na bakonzobendi mutanu na umo, mazina wabo engile Azaliya na Yehiyelu na Zakaliya na Azaliyahu na Mayikulu na Shefwatiya. Nimwabo aba bengile bana ba Mwene Yehoshafwati wamu Ishalela.

³ Tatiyabo wabapanikile ngolinde na shiliva yayingi na wuheti wawuwahe, pe wabayakile mu minzi ya bipata yamu Yunda kwinga bakulwane ba iya minzi. Ngoboni ndaba Yeholamu wengile mwana wa mweli, Yehoshafwati wamwimikile kwinga ncwana yendi.

⁴ Oho Yeholamu ashumankanine ha wene, wazihile bakonzobendi nimwabo na babilolo bamo bamu Ishalela.

⁵ Yeholamu washwanine wene oho uli na myaka 32, pe walelele mu Yelushalema myaka mutanu na yihatu.

⁶ Wakonkele nzila ya kuluwa ya Mwene Ahambu na bamyene bamina bamu Ishalela, ndaba washimbileho umo ha bana ba Ahambu. Wabipishilile Nyambi ya Ngula,

⁷ ngoboni Nyambi ya Ngula kaliha washingile kunongesha wene wa Ndavita, ndaba walimamine na Ndavita naku bazukulyendi ngayi ukabapana mimuni mwaya myaka.

⁸ Ha shikati sha kulela kwa Yeholamu, Endoma wafutukilile Yunda pe wengile wene wakulimanina.

⁹ Nohobene Yeholamu na babilolo bendi bafunzukile na makoloyi, pe bakatukilile mutakwe Baendoma. Bakanzita ba Endoma niko bakazingulukilile, ngoboni ha shikati sha wushiku batweshele ku bakama na kutina.

¹⁰ Ku balika haya Endoma wengile wakulimanina kufuma ku maboko a Yunda. Ha shikati shosho shimo, lukena lwa Limbina kami lwafutukilile Yunda, ndaba Yeholamu wafutaminine Nyambi ya Ngula, Nyambi wa Bankakazendi.

¹¹ Wazikile kami myanya yaha binkanda ya ku lemeshela banyambi bowa mu matunga a mapili a Yunda na ku twaminina bantu ba litunga lya Yunda na Yelushalema kubipishila Nyambi ya Ngula.

¹² Yeholamu watambwile liñwati lyafumine kuli muluwe Eliya elye lyalabiwile ngayi, “Nyambi ya Ngula Nyambi wa nkaka yobe Ndavita na kuyata ngayi ndaba wabulile kukonka nzila ya tatiyobe Yehoshafwati hinge iya ya nkaka yobe Mwene Asha wamu Yunda.

¹³ Ngoboni unakonko nzila ya bamyene bamu Ishalela na kutwaminina bantu ba Yunda na Yelushalema kwinga bakubula kwoloka kuli Nyambi, ngonehe Ahambu na bakakumushwana, aba batwaminina Ishalela kwinga wakuluwa. Pe kami wazihile bakonzobobe, aba bengile bantu babawahe kupitakana obe.

¹⁴ Ndaba ya neshe Nyambi ya Ngula ukashushula bantu bobe shikuma na bana bobe na bakazobe na kunongesha wuheti wobe.

¹⁵ Obe boni mwine, ukayanda na wulweli wa mumila iya yikakola shikuma ha mutena ha mutena, hantu mila yobe yinatiputukumo.”

¹⁶ Bafwilishitina bamo na baka Alambu bekalile kwakwipi na noku bekala baka Kushi ha shibumbo sha liwate. Nyambi ya Ngula wabakandikizile ngayi baye ku nzita mu kulwisha Yeholamu.

¹⁷ Niho bakatukilile mutakwe Yunda, bapukwile lukena, pe bashimbile ba mahano ba mwene na bana bamwene babalume ndele tuhu Yehoyahazi mwanendi wa kanuke wa mulume.

¹⁸ Niho ebye nimwabyo byapitile Nyambi ya Ngula waletele hali mwene wulweli wa mumila wakubula kutwesha kupangiwa.

¹⁹ Ha kumana kwa myaka yibili wulweli wanenehele shikuma kukumininako mila yendi yatiputukile pe mwene wafwile mu makando amanene, bantu bendi kaliha bawungikile zintande za malila ngonehe batendelenga ku bankakazendi.

²⁰ Yeholamu washwanine ha wene oho uli na myaka 32, pe walelele mu Yelushalema myaka 8. Kowa muntu wayuvwile wunginga oho afwile. Bamufundile mu Lukena lwa Ndavita. Ngoboni kaliha mu bizino bya wene.