2 Byambo 20 - Libuka Lya Kuyela

Nzita ya kulwisha Endoma

¹ Ha kukumininako, bakanzita Bamowambi na Amoni na bakakubayavwa Bameunima, bakatukilile mutakwe litunga lya Yunda.

² Bantumwana bamo bezile na kutongweza Mwene Yehoshafwati ngayi, “Litunga lyalinene lya bakanzita ba ku Endoma linezi mu kukulwisha, linezilili mu nciza ya Liwate lya Mushele. Bapukulakale Hazazoni Tamale.” Elye nilyo lizina lyamina lya Engendi.

³ Yehoshafwati watinine pe walombelele kuli Nyambi ya Ngula ngayi amutwaminine. Watumine lizu mu litunga nimwalyo lya Yunda ngayi, bazile kulya.

⁴ Bantu bamu minzi nimwayo yamu Yunda banyankupilile ku Yelushalema mu kulombela kuli Nyambi ya Ngula ngayi abatwaminine.

⁵ Pe nibo na bantu ba ku Yunda na Yelushalema bakungulukilile mu shipango shashipya sha Litala lya Nyambi ya Ngula. Mwene Yehoshafwati wakatukile na kwimana kumbili yabo.

⁶ Pe walombelele na kukatula ku lizu ngayi, “Obe Nyambi ya Ngula, Obe Nyambi wa bankakazetu, ukulela muyilu na ha mikoka nimwayo ya hano hanci. Obe wa ngovu na wunene, pe kowa muntu wakutwesha kukukanangana.

⁷ Obe Nyambi yetu. Oho bantu bobe ba Ishalela bezilenga mu litunga elye, watandilemo bantu aba bazikilengamo, pe wapanine litunga ku bazukulya muhoni wobe Abulahama, kwinga lyabolyabo mwaya myaka.

⁸ Banazikinga muno pe ba kutendela na Litala mu kukulemeeka ngayi,

⁹ ndi malwa anahiti hinge ndi anahiti akubawila na kubashushula, hinge nzita hinge wulweli wakuliyambwisha hinge kapande, nibo ba kutwesha kwiza na kwimana kumbili ya Litala lino omu mwekala Lizina lyobe oku walemeshiwilanga. Bakutwesha kunyepa kukwobe mu wukalu wabo pe Obe ukubayuvwa na ku balamwina.

¹⁰ “Haya mona, bantu bamu Amoni na Mowambi na Endoma bali na kwiza na kutulwisha. Oho bankakazetu bafumine mu Engepita, kaliha wetabilile Baishalela ngayi bengine mu matunga owo, nohobene bankakazetu bayile na ku baongoloka pe kaliha babanongeshele.

¹¹ Ha kutuyana. Banezi mu kututanda mu litunga liya watupanine.

¹² Obe Nyambi yetu, bashushule ndaba etu ngovu tufwazo za kulwa na neye nzita yayinene yili na kutulwisha. Nomu mwa kutendela kulimukamo tufwamo, ngoboni tunapenze kukwobe ngayi utuyavwe.”

¹³ Bantu nimwabo ba Yunda na bakazabo na bana babo, bemanine kuyo ku Litala lya Nyambi ya Ngula.

¹⁴ Moyo wa Nyambi ya Ngula wawililile ha Kalevi ou wekalile ha likunge, lizina lyendi Yahaziyelu mwana Zakaliya wa mulume waku mushobo wa livumo lya Ashafwi, kami watutikile kuli Ashafwi muli Mataniya na Yeyiwelu na Mbenaya.

¹⁵ Yahaziyele wambile ngayi, “Obe Yehoshafwati, mwene ya ngoma nanenu bantu nimwenu ba litunga lya Yunda namu Yelushalema, Nyambi ya Ngula ukwamba ngayi ku fwanina mufwako kwinga ba kupopa hinge kutina kuya ku nzita eye yayinene. Nzita yinakundama kuli Nyambi kaliha kukwenu.

¹⁶ Kabalwishenu nzona oho bakeza na kupita ku nzila ya ncinencine ya Zizi. Mukaliwana nabo ku nkumo ya mukulo uya wakulumba ku litunga lya libelelengwa hahepi na Yeluwelu.

¹⁷ Kukalwa yino nzita mufwako. Kakwalamenu tuhu ku myanya yenu na kutatila mukamona Nyambi ya Ngula eshe akamilamwina. Enu bantu bamu litunga lya Yunda namu Yelushalema hinga mushintazala hinge kutina. Yenunga nzona ku nzita pe Nyambi ya Ngula ukekala hamo nanenu.”

¹⁸ Niho Mwene Yehoshafwati afukumanine hinga bakinka lupala hanci, pe bantu nimwabo ba Yunda na Yelushalema bafukumanine nendi na kulemesha Nyambi ya Ngula.

¹⁹ Muhoko wa Balevi waku mavumo a Kohati na Kola bemanine na kukuwa na lizu lyalinene, pe wayemezele Nyambi ya Ngula, Nyambi wa Ishalela.

²⁰ Oho kwashile lumenemene bantu bamenekele na kuya ku litunga lya libelelengwa kwakwipi na Tekoya. Oho shilolokale bakatuke Yehoshafwati wabatongwezele mazu awa ngayi, “Enu bantu bamu litunga lya Yunda namu Yelushalema, Kulupilenu muli Nyambi ya Ngula, Nyambi yenu pe mukemana na ku shuma. Kulupilenu kunebye ba kumitongweza bamiluwe bendi pe mukatwesha.”

²¹ Oho walyambashanakale hamo na bantu, mwene watongwezele bakakuwela ngayi bavwale bivwalo biya bavwalanga ha bimbo bya shizila pe baye na kwenda kumbili ya bakanzita hibembila ngayi, “Yemezenu Nyambi ya Ngula. Shishemo shendi sha mwaya myaka.”

²² Oho batatikile kwimbila na kuyemeza, Nyambi ya Ngula wayakile mu kampwe bantu ba Amoni na Mowambi na Sheya bakanzita baya bakatukilile litunga lya Yunda na Yelushalema mutakwe.

²³ Bakanzita ba Baamoni na bakanzita ba Bamowambi balwishile bakanzita bafumine ku lipili lya Sheya pe babanongeshele kulungu, pe balifutukilile na kulilwisha shikuma umo na wamina.

²⁴ Oho bakanzita ba Yunda bakumine ku kapeshi kaya kapenzele ku libelelengwa, batilaminine kumbili ku bamalamo, pe bamonene ngayi nimwabo bapyukwamine hanci ba kufwa, Kowa muntu umo wapanzile.

²⁵ Yehoshafwati na bakanzita bendi bayileko mu kushimba lipuku, pe bawanine zingombe zazingi na wuheti na bivwalo, hamo na byuma byamina byabilemu. Bashimbile matena ahatu na kukungula bya lipuku, byengile byabingi ngayi kaliha batweshele kushimba byuma nimwabyo.

²⁶ Mutena wawunaa bakungulukilile mu mukulo wa Mbelaka pe bayemezele Nyambi ya Ngula ha byuma nimwabyo ebye atendele. Nisho ukutumbiwila uya mukulo ngayi, “Mbelaka” kutontolola ngayi kuyemeza.

²⁷ Niho Yehoshafwati atwamininine bakanzita bendi kuboka ku Yelushalema na kutangala, ndaba Nyambi ya Ngula wakomene bamalamo babo.

²⁸ Oho bakumine mu Yelushalema, bayile na kuwuluta ku Litala lya Nyambi ya Ngula, hibaya na kumbeta tumbuli na ku shiba zimpandula.

²⁹ Pe matunga nimwawo aya ayuvwile eshe akomene Nyambi ya Ngula bamalamo ba Ishalela, atinine.

³⁰ Nohobene Yehoshafwati walelele mu ku mwena, pe Nyambi wamupanikile kukatala mu zimbalila nimwazo.

Kumana kwa kulela kwa Yehoshafwati

³¹ Yehoshafwati washwanine wene wamu Yunda oho uli na myaka 35, pe walelele mu Yelushalema myaka 25. Mandiyendi wengile Azumba, mwana Shiluhi.

³² Yehoshafwati watendele byabiwahe ku meho a Nyambi ya Ngula, ngonehe tatiyendi Asha ou ashwanine.

³³ Ngoboni myanya yaha binkanda ya kulemesha banyambi bowa kaliha yanongeshiwile. Bantu kaliha bafutukile na mitima yabo nimwayo mu kulemesha Nyambi wa bankakazabo.

³⁴ Byuma nimwabyo kami atendelenga Yehoshafwati, ku balika ku kutatika kwakulela kwendi na kutwala ku mamaninino byatikitiwile mu byambo bya Likota lya muluwe Yehu mwana Hanani. Eye yenga mbalila ya byambo bya Likota lya Bamyene bamu Ishalela.

³⁵ Ku shikati shimo, Mwene Yehoshafwati wamu Yunda watendele shikonzi na Mwene Ahaziya wamu Ishalela ou watendelenga byuma byabingi bya kuluwa.

³⁶ Ku livwe lya Eziyoni Ngemba babazishile mato akushinga kuya nawo ku Tashishi.

³⁷ Ngoboni Eliyeza mwana Ndondavahu wa mulume, waku munzi wa Malesha, wambilile Yehoshafwati ngayi, “Ndaba unatende shikonzi na Ahaziya, Nyambi ya Ngula ukanongesha mato awa unabazishi.” Mato atabukile hinga atangile kuvuwiwa kuya ku Tashishi.