2 Byambo 2 - Libuka Lya Kuyela

Kuliwahishila ha kuzika Litala lya Nyambi

¹ Mwene Sholomoni wafungwile kuzikila Litala lya Nyambi ya Ngula, pe kami ngayi azike musheke wendi niye mwine.

² Mwene Sholomoni wayakile bantu 70,000 ba kutenda mulimo wakututanga byuma na bantu 80,000 mukutenda mulimo wakupabola mamanya. Kwekalile bantu 3,600 bekalile na ngovu za kwendesha mulimo.

³ Kami Sholomoni watumine lizu kuli mwene Hilamu waku Tile ngayi, “Tenda mikwebo na nami ngonehe watendele na batate, mwene Ndavita oho amulandishile bishimi bya bitondo bya shinda bya kuzikisha musheke wendi.

⁴ Mona, nili na kuzikila Nyambi ya Ngula, Nyambi yami Litala lya kumulemeshela. Nilyo likenga lya kuzila, oku bantu bami na nami tukamulemeshelanga na kuhokesha incence. Oku niko tukaletanga zintupu za mankende ashizila kukwendi ha mutena ha mutena. Kami oku niko tukakombelelanga zinkombela kulumenemene na lumenemene na kumazolo na mazolo, hamo naku mutena wakukatala nawa shimbo sha kutelama kwa ngonda wamupya na matena amina akuzila akulemeka Nyambi ya Ngula, Nyambi yetu. Eshi nisho analayelele Baishalela kutenda noho mwaya myaka.

⁵ Nikuhanganika kuzika Litala lya Nyambi lyalinene ndaba Nyambi yetu wamunene kupitakana banyambi nimwabo.

⁶ Ngoboni mwa shikuma kowa muntu wa kutwesha kuzikila Nyambi Litala ndaba hingebene wunene wa mayilu kutwesha kulinganamo wufwako. Ami yani boni ngayi nitweshe kumuzikila Litala, ndele tuhu lya kuhokeshela incence.

⁷ Haya ntumine muntu wa wutungu walimuka mulimo wakumangula ngolinde na shiliva na lubemba na byondo na kutenda makwiza a wuhombo na kufumbuluka na kufubila. Ukatenda milimo na bantu bawutungu bamu Yunda namu Yelushalema aba ahatile tate Ndavita.

⁸ Nikulimuka wutungu wa bantu bobe bakakutabola maleenge, nohobene untumine bitondo bya shinda na mupaini na bishimi bya yunipa bya ku Lembanoni. Naliwahishalakale kutuma bantu bami mu kuyavwa bobe,

⁹ mu kuwahisha wingi wa maleenge ndaba Litala lya Nyambi nikushinga kutenda likenga lyalinene na kukomokesha.

¹⁰ Neheboni mu kuyumbila bakamilimo bobe ba kuketula bitondo nika kutumina matani a loto 20,000 na matani a luku 20,000 na malita a waine 20,000 na malita a mishashi ya mazi a olive 20,000.”

¹¹ Hilamu mwene waku Tile watuminine Sholomoni liñwati lya kumukumbula. Watikitile nehe ngayi, “Ndaba Nyambi ya Ngula wahaka bantu bendi unakwingi mwene yabo.”

¹² Hilamu wambile ngayi, “Yemezenu Nyambi ya Ngula Nyambi wa Ishalela ou walengele liyilu na hanci. Unapaniki mwene Ndavita mwana wakukeya wa mulume wenzala na kanangatima na wutungu, ou uli na kufunga kutendela Nyambi ya Ngula Litala na musheke wendi niyemwine.

¹³ Nili na kukutumina mu ka wutungu wakukeya hekulya bawulongo, lizina lyendi Hilamu.

¹⁴ Mandiyendi wengile waku muhoko wa mushobo wa Ndani, kami tatiyendi wengile waku Tile. Hulami walimuka sha kutenda byuma ha ngolinde na shiliva na lubemba na byondo na mamanya na bitondo. Ukutwesha kutenda makwiza a wuhombo na kufumbuluka na makwiza a kufubila hamo na makwiza amawahe a kulelema. Ukutwesha kutenda mishobo nimwayo ya kumangula kami ukutwesha kutenda na kukonka mbazilo nimwayo ya shuma akutongweziwa. Mwitabile atende hamo na bantu bobe ba wulongo, obo batendelanga milimo hekulyami tatiyobe Ndavita.

¹⁵ Nohobene haya ututumine loto na luku na waine na mazi a olive biya wakulupishile.

¹⁶ Mu mapili a Lembanoni tukatema bitondo nimwabyo bya shinda ebye ukushinga, ngayi tubimangile hamo na maleenge na kubitimbokesha mu liwate kukabikumisha ku Yopa. Kufumisha kuyo ukutwesha kubitutila ku Yelushalema.”

Kutatika kwa mulimo wakuzika Litala lya Nyambi

¹⁷ Mwene Sholomoni walabile bantu nimwabo ba mapukwenda bazikilenga mu litunga lya Ishalela. Kwalifwekele na kulaba kwa tatiyendi Ndavita kuya alabile. Kwekalile bantu 153,600 ba mapukwenda bazikile mu litunga.

¹⁸ Hakati kabo wapanikile bantu 70,000 mulimo wakututa byuma na bantu 80,000 bakakupabola mamanya mu mapili, kami wemikile bantu 3,600 bakakwendesha mulimo aba bamonenenga ngayi mulimo ukwenda shiwahe.