2 Byambo 19 - Libuka Lya Kuyela

Muluwe ukwambila Yehoshafwati

¹ Mwene Yehoshafwati wamu Yunda wabokele shiwahewahe ku musheke wendi mu Yelushalema.

² Ngoboni muluwe Yehu mwana Hanani wa mulume wayile mu kushimbawila mwene Yehoshafwati pe wamwipwile ngayi, “Kati ukuhanganika ngayi shinengi shashiwahe kuyavwa baya bakuluwa na ku haka aba bazimba Nyambi ya Ngula ndi? Shuma eshe unatende shinaleteshe ngayi Nyambi ya Ngula akupilamine.

³ Ngoboni hinge noho, kushili wuwahe wumo mumwobe, ndaba unafumishi tunankishi nimwato twa nyambi wa mbuyama Ashela otwe balemeshelenga bantu, kami unezeke kukonka shifungo sha Nyambi.”

Kukunkakanya kwa Yehoshafwati

⁴ Hinge ndi Yehoshafwati wazikilenga mu Yelushalema, ngoboni wayilenga na kuzingula bantu, ku balika ku Mbelishemba ku mabukubuku kukakuma naku nkumo ya litunga lya binkanda lya Efulemu ku ncelele, ngayi mwanga akehane bantu baboke kuli Nyambi ya Ngula, Nyambi wa bankakazabo.

⁵ Wemikile bakakuyata mu minzi nimwayo ya bipata yamu Yunda,

⁶ pe wabafundizizile ngayi, “Keyenu ha kuyata byambo kaliha mukutenda mu ngovu za wuntu, ngoboni mukutenda mu ngovu za Nyambi ya Ngula, pe uli hamo nanenu oho mu kuketula byambo.

⁷ Tinenu Nyambi ya Ngula, pe mutende na ku shangama, ndaba Nyambi ya Ngula, Nyambi yetu, kaliha mukakwimanina bakakwongeza hinge bashihota, hinge kutambula lizika kanwa.”

⁸ Yehoshafwati wemikile bakankombela mu Yelushalema, Balevi na bakakutwaminina Baishalela bamo bashindambo mu lukena kwinga bakakuyata byambo bina kundama ku bya kuhandula Ndayano za Nyambi ya Ngula, hinge kuyata byambo bya kukiluka ndayano mukati ka naba bekala mu lukena.

⁹ Kami wabafundizizile nehe ngayi, “Mu ku fwanina kutenda milimo yenu na bowa wakutina Nyambi ya Ngula na kwinga bakulunga na kwombatala mu byuma nimwabyo mu kutenda.

¹⁰ Shinge shikati ngani osho baminenu bamu minzi nimwayo ba kuleta byambo kukwenu bya lufu hinge bya kuhandula ndayano hinge bya kukiluka ndayano, mu ku fwanina kubafundiziza na kukeya ha shikati sha kuyata ngayi mwanga babule kwinga ba mulandu na kubipishila Nyambi ya Ngula. Ndele mutende noho, enu na baminenu mukayuvwa wulemu na wukali wa Nyambi ya Ngula. Ngoboni ndi mukutenda mulimo wenu shiwahe kukawana mulandu mufwako.

¹¹ Amaliya Mukulwane wa bakankombela Nimwabo ukekala na ngovu mu byambo bya wunyambi nimwabyo. Zembandiya mwana Ishimaele kalela wamu Yunda ukekala na ngovu za kumaninina mu byambo bya wene. Balevi bakekala na ngovu za ku mona ngayi byambo bikutwaliwa ku zinkuta bikuyatiwa shiwahe. Mwinge ba kukanca, kami tendeshenu kufundiziza okwe, mwanga Nyambi ya Ngula ekale na baya bakwinga bakwoloka.”