2 Byambo 18 - Libuka Lya Kuyela

Muluwe Mikaya ukubela Ahambu

¹ Oho Mwene Yehoshafwati wamu Yunda engile wakuheta na kuya mpupo, wawahishile maluwo a mwanendi na mwana Mwene Ahambu wamu Ishalela.

² Oho kwapitile myaka Yehoshafwati wayile ku Lukena lwa Shamaliya mu kuzingula Ahambu. Mu ku monesha lileema kuli Yehoshafwati na baya endele nabo, Ahambu wazihile litanga lyalinene lya bambelele na zingombe kwinga mayambwayambwa a liyumbu. Kami Ahambu wezekele kukandamika Yehoshafwati kulifungila nendi mu kulwisha munzi wa Lamoti mu Ngiliyande.

³ Ahambu mwene wa Ishalela wepwile Yehoshafwati mwene waku Yunda ngayi, “Kati tukaya nimwetu mu kulwisha Lamoti Ngiliyande ndi?” Yehoshafwati wakumbwile ngayi, “Nalibalakanya kuya ndi obe walibalakanya, tukaya hamo ku nzita.

⁴ Ngoboni Yehoshafwati wambile kuli mwene wa Ishalela ha kutatika twipwizize taha kuli Nyambi ya Ngula ha shuma eshe.”

⁵ Nohobene Ahambu mwene wa Ishalela wehanine bamiluwe, nimwabo bengile 400. Pe wabepwile ngayi, “Kati nikutwesha kuya mu kulwisha munzi wa Lamoti Ngiliyande ndi byo?” Bambile ngayi, “Ingoi! Yanga mu kubalwisha, Nyambi ukakupana kukoma.”

⁶ Ngoboni Yehoshafwati wepwile ngayi, “Kati kuno kowa muluwe wa Nyambi wamina ou ukutwesha kutwipwizizila kuli Nyambi ya Ngula ndi?”

⁷ Ahambu mwene wa Ishalela wakumbwile ngayi, “Kunashala kami umo, Mikaya mwana Imula. Ngoboni namuzimba ndaba kulubulula byuma byabiwahe kukwami wufwako, wandubwililanga tuhu byuma byabibi shikati nimwasho.” Yehoshafwati wakumbwile ngayi, “Kaliha wafwanina kwamba noho.”

⁸ Nohobene Ahambu mwene wa Ishalela wehanine shilolo wamu shinzanza pe wamutongwezele ngayi aye shawanguwangu akalete Mikaya mwana Imula.

⁹ Kami bamyene babili bavwalile bikobelo byabitali bya wene, mwene wa Ishalela na Yehoshafwati mwene wa Yunda, bekalilenga ha matanda wabo ku mwanya waku likotwelo ha munkanda wa lipangati lya ku Shamaliya. Kami bamiluwe nimwabo balubwililenga kumbili yabo.

¹⁰ Umo ha bakakulubulula, wengile Zendekiya mwana Kenana wa mulume, wafulile ncengo za shondo, pe wambile kuli Ahambu ngayi, “Eshe nisho akwamba Nyambi ya Ngula ngayi, ‘Naneze ncengo ukalwisha Baashiliya na ku bakoma shikuma.’”

¹¹ Miluwe bamina nimwabo bambile shuma shino ngayi, “Yenunga mukalwishe Lamoti Ngiliyande pe mukapitakana. Nyambi ya Ngula ukamipanika ngovu.”

¹² Pe ha shikati oshobene, shilolo uya wayile mu kuleta Mikaya, wakamutongwezele ngayi, “Mona, miluwe bamina nimwabo banalubululu bya kukoma kwa mwene, pe nobe kami shikawaha kukamba shuma shimo.”

¹³ Ngoboni Mikaya wakumbwile ngayi, “Nikulibeza muli Nyambi ya Ngula wakuyoya, nikamba tuhu ebye akantongweza Nyambi yami.”

¹⁴ Oho aholokele ku meho a Mwene Ahambu, mwene wamwipwile ngayi, “Mikaya, kati Mwene Yehoshafwati na nami tuye mu kulwisha munzi wa Lamoti Ngiliyande ndi hinga tuya?” Mikaya wamukumbwile ngayi, “Yenunga mukawulwishe, pe mukatwesha. Nyambi ya Ngula ukakupana ngovu za kukoma.”

¹⁵ Ngoboni mwene Ahambu wakumbwile ngayi, “Kati kaliha nonzelanga kukutongweza ngayi oho ukwamba kukwami mu lizina lya Nyambi ya Ngula wambenga tuhu kupwisha ndi?”

¹⁶ Mikaya wakumbwile ngayi, “Nikutwesha ku mona nzita ya Ishalela yinapanzanini ha twina ngonehe bambelele bakubula mulishani. Nyambi ya Ngula wambile ngayi, ‘Aba bantu banabulu mukakubatwaminina, balehenu bayenga ku minzi na ku mwena.”

¹⁷ Mwene Ahambu wambile kuli Yehoshafwati ngayi, “Nka na kutongweza ngayi hinga atanga kulubulula byuma byabiwahe kukwami, wonzelanga tuhu kulubulula byuma byabibi.”

¹⁸ Mikaya wambile ngayi, “Haya yuvwililenu kunebye akwamba Nyambi ya Ngula. Namonene Nyambi ya Ngula hinga ekala ha litanda lyendi muyilu na mangeloyi endi nimwawo hinga emana ku nkumo yendi.

¹⁹ Nyambi ya Ngula wepwile ngayi, ‘Kati yani ou ukwongeza Ahambu mwene wa Ishalela ngayi mwanga aye bakamuzihile ku Lamoti Ngiliyande?’ Bamangeloyi bamo bambile shuma shimo pe kami bamina bambile shuma shashenge,

²⁰ hantu noho moyo umo wapitile kumbili na kuhenyena kuli Nyambi ya Ngula pe wambile ngayi, ‘Nikaya na kumwongeza.’ Nyambi ya Ngula wepwile ngayi, ‘Kati ukamwongeza nahiti?’

²¹ Moyo wakumbwile ngayi, ‘Nikaya na kwingisha bamiluwe ba Ahambu nimwabo kuya mu kumwongeza.’ Nyambi ya Ngula wambile ngayi, ‘Yanga ukamwongeze. Ukatwesha.’”

²² Wambile kami ngayi, “Eshe nisho shinatendiwi. Nyambi ya Ngula unengishi aba bamiluwe bobe ngayi bakwongeze. Ngoboni Nyambi ya Ngula unaketulu ngayi ukamona makando.”

²³ Niho muluwe Zendekiya waka Kenana ahenyenene hahepi pe wakamine mbanda Mikaya ku lupala, pe wamwipwile ngayi, “Kati Moyo wa Nyambi ya Ngula wafuma mwaka ngani mumwami na kuya na kwamba kukwobe?”

²⁴ Mikaya niho akumbwile ngayi, “Ukayuvwishisha oho ukwingina mu kampenci kakuholama.”

²⁵ Niho Mwene Ahambu atongwezele babilolo bendi ngayi, “Kwatenu Mikaya pe mu mutwale kuli Amoni kalela wamu lukena na kuli mwana mwene Yowashi.

²⁶ Kabatongweze ngayi, ‘Bamuyumbile mu tolongo, pe bakamuleleshe mankende na mema hantu nakaboko shiwahe.’ ”

²⁷ Mikaya walinyukumwine ngayi, “Ndi ukaboka shiwahe, pe Nyambi ya Ngula kwambila mumwami wufwako.” Pe wambile kami ngayi, “Nimwenu yuvwililenu kunebye ninamba.”

Lufu lwa Ahambu

²⁸ Niho Mwene Ahambu wamu Ishalela na Mwene Yehoshafwati wamu Yunda bayile mu kulwisha munzi wa Lamoti wamu Ngiliyande.

²⁹ Ahambu wambile kuli Yehoshafwati ngayi, “Oho tukuya mu nzita nikalifutula, ngoboni obe ukaye hinga wavwala bivwalo byobe bya wene.” Nohobene mwene wamu Ishalela wayile mu nzita hinga alifutula.

³⁰ Mwene wamu Shiliya watongwezele bakulwane bendi ba makoloyi ngayi hinga balwisha muntu tuhu washenge ndele tuhu mwene wamu Ishalela.

³¹ Nohobene oho bamonene Mwene Yehoshafwati, nimwabo bahanganikile ngayi wengile mwene wamu Ishalela pe bafutukile na kumulwisha. Ngoboni oho Yehoshafwati akalokele pe Nyambi ya Ngula wamulamwinine pe washintwilile nzita kukwendi.

³² Oho bakulwane ba makoloyi bamonene ngayi kaliha mwene wa Ishalela, balehele kumukonka.

³³ Sha kubula kulimuka, kanzita umo wa Kaashiliya wapuhile muvwi ou washompokelele mwene Ahambu mukati aha halinungila bivwalo bya nzita. Mwene wakalokelele kuli mukakwendesha koloyi yendi ngayi, “Nalemanakale. Bokamo umfumishe mu nzita.”

³⁴ Oho Nzita yatakalalile shikuma Ahambu mwene wa Ishalela washalile hinga atuntumana mu koloyi yendi, hinga ashangula ku Baashiliya. Pe ha kulela kwa mutena wafwile.