2 Byambo 17 - Libuka Lya Kuyela

Yehoshafwati ukwinga mwene

¹ Yehoshafwati washwanine tatiyendi Asha kwinga mwene pe washumishile wene wendi mu kulwisha Ishalela.

² Wayakile bakanzita bendi mu minzi ya bipata yamu Yunda namu minzi ya litunga nimwalyo lya Yunda namu minzi eye apukwile Asha mu litunga lya Efulemu.

³ Nyambi ya Ngula watandalishile Yehoshafwati, ndaba wahembwizikile nzila ya tatiyendi Ndavita ya kuyoya kwendi kwakutatika, pe wabulile kulemesha Mbaalu.

⁴ Watendelele Nyambi ya tatiyendi milimo, pe wombatalile ndayano za Nyambi, kami kaliha watendele ebye batendelenga bamyene ba Ishalela.

⁵ Nyambi ya Ngula wapanine Yehoshafwati ngovu za kushumisha kulela kwendi ha wene wa Yunda, pe bantu nimwabo bamuletelelenga zintupu, nohobene wengile mukakuheta na kutambula lileema lyalinene.

⁶ Walitupwile mu kutendela Nyambi ya Ngula pe washandwele myanya yaha binkanda nimwayo ya bakakulemesha ba nyambi bowa na tuula hali zimpangwa za nyambi wa mbuyama Ashela wamu Yunda.

⁷ Mu mwaka wawuhatu wakulela kwendi watumine babilolo aba mu ku longesha mu minzi yamu Yunda, mazina wabo engile Mbani Hayila na Ombandiya na Zakaliya na Netanele na Mikaya.

⁸ Bashindikiziwile na Balevi mutanu na banaa, mazina wabo engile Shemaya na Netaniya na Zembandiya na Ashaheli na Shemilamoti na Yonatana na Andoniya na Tombiya Andoniya pe bakankombela babili bengile Elishama na Yeholamu.

⁹ Pe bashimbile Libuka lya ndayano za Nyambi ya Ngula niho bayile na ku longesha bantu mu minzi nimwayo yamu Yunda.

Wunene wa Yehoshafwati

¹⁰ Nyambi ya Ngula wayuvwishile bowa wene nimwawo wazinguluka litunga lya Yunda kuya mu kulwisha Mwene Yehoshafwati.

¹¹ Bafwilishitina bamina baletelele Yehoshafwati mushinzi wawunene wa shiliva na zintupu zamina na baka Alambu bamo bamuletelelele babikungwe babambelele bengile 7,700 na bampongo kami bengile 7,700.

¹² Nohobene ngovu za Yehoshafwati zanenehele shikuma. Mu Yunda nimwamo watendele tupeshi na minzi ya bipata,

¹³ pe wakongelelengamo byakulya na byuma byabingibingi mu Yunda. Wayakile babilolo na bakanzita ba kukanca mu Yelushalema,

¹⁴ kuya ngo ku mavumo wabo. Andina wengile mukulwane wa likunge lya bakanzita ba ku mavumo a Yunda, pe wekalile na bakanzita 300,000 mu ngovu zendi.

¹⁵ Wawubili ku wukulwane wengile Yehohanani, ou wekalile na bakanzita 280,000.

¹⁶ Pe wawuhatu ku wukulwane wengile Amashiya mwana Zikali ou wekalile na bakanzita 200,000. Amashiya walifungwile niyemwine ku mulimo wakutendela Nyambi ya Ngula.

¹⁷ Mukulwane wa likunge lya bakanzita ba ku mavumo a Mbenjamani wengile Eliyanda, kanzita wakukanca, ou wekalile na bakanzita 200,000 balume ba kupakata makebo na bipando bya mukunzi.

¹⁸ Wamulundaminine ku wukulwane wengile Yehozabandi ou wekalile na bakanzita 180,000 balume baliwahishila bya nzita.

¹⁹ Aba banzita nimwabo batendelele milimo mwene wamu Yelushalema, mu kufungila kunaba, wayakile kami bakanzita bamina mu minzi yamina ya bipata mu Yunda.