2 Byambo 16 - Libuka Lya Kuyela

Zinzita mukati ka Yunda na Ishalela

¹ Mu mwaka wawu 36 wakulela kwa Mwene Asha wamu Yunda, Mwene Mbaasha wamu Ishalela wakatukilile Yunda mutakwe. Watendele shipata sha kuzingwilisha Lama ngayi mwanga ashishinkile kukanisha bantu mu zinzila za kuya mukati nanaba ba kututika ha munkanda wa Yunda.

² Nohobene Asha washimbile shiliva na ngolinde mu bikongelo bya mu Litala lya Nyambi ya Ngula namu musheke na kutuma ku Ndamashika, kuli Mwene Mbeni Handandi wamu Shiliya na lizu lya kwamba ngayi,

³ “Toko twinge shikonzi, ngonehe bengilenga batatizetu. Mona, eye shiliva na ngolinde inengi ya shishemo kukwobe. Haya manisha shikonzi shobe na Mwene Mbaasha wamu Ishalela ngayi mwanga akoke makunge a nzita yendi mu litunga lyami.”

⁴ Mbeni Handandi wetabilile ku shihanganiko sha Asha, pe watumine bakulwane bendi banzita hamo na bakanzita babo mu kulwisha minzi ya Ishalela. Bapukwile Yiyoni na Ndani na Abele Mayimu na minzi nimwayo ya Nafwitali oku bakongelelenga Byuma.

⁵ Oho Mwene Mbaasha ayuvwile ebye byamonekele walehele kuzingwilisha shipata ku Lama na ku shiya mulimo.

⁶ Niho Mwene Asha akungwile bantu ku Yunda pe wabashimbishile mamanya na maleenge aya atendeshelenga Mbaasha ku Lama, pe bawatendeshele bipata bya minzi ya Ngemba na Mizipa.

Muluwe Hanani

⁷ Ku shikati shiyo muluwe Hanani wayile kuli Asha mwene waku Yunda pe wambile ngayi, “Ndaba mwa kulupila tuhu hali mwene wa Shiliya, ku kulupila hali Nyambi ya Ngula, Nyambi yetu mufwako, pe obe mwene Asha wufwako kukatwesha kukoma uya mwene wa Shiliya.

⁸ Kati baka Kushi na baka Limbiya babulile bakanzita babengi na makoloyi amengi na bakakukandama ha bambishi ndi? Ngoboni ndaba mwakinka mitima hali Nyambi ya Ngula wamitabila ngayi mubakome.

⁹ Nyambi ya Ngula ukushengezela hano hanci nimwaho na kupana nyala kukwabo ba ku mwombatala mu kupwisha. Ha shuma eshe mwatenda bya wunkutala shikuma, nohobene haya ku balika lelo na kutwala kumbili mukonzela kulwanga nzita.”

¹⁰ Eshe shaleteshele ngayi Asha apilamine muluwe pe wamumangile mu mawenge. Shengile nisho shikati shimo shiya atatikile kwikalisha bantu bamo na shilala.

Mamaninino a kulela kwa Asha

¹¹ Byuma byamonekele ha kulela kwa Asha nimwabyo ku balika ku kutatika kukuma na ku mamaninino byatikitiwile mu byambo bya likota lya Bamyene bamu Yunda namu Ishalela.

¹² Mu mwaka wawu 39 wakulela kwendi, Mwene Asha wapengele na wulweli wa mawulu pe wayile kubanganga ngayi bamuyavwe, ngoboni kaliha wapenzele kuli Nyambi ya Ngula.

¹³ Kwapitile tuhu myaka yibili pe Asha wafwile,

¹⁴ pe wafundiwile mu shizino sha limanya eshe alimangwilile niyemwine mu Lukena lwa Ndavita. Bamuwabishile lukumba na mazi a livumba lyaliwahe mu kuwabisha lutu lwendi ha kufundiwa, pe bacabile nkuni za zintande za malila a lufu lwendi.