2 Byambo 15 - Libuka Lya Kuyela

Kukunkakanya kwa Asha

¹ Moyo wa Nyambi wezile hali Azaliya mwana Ondendi wa mulume,

² pe wayile mu kushimbawila Mwene Asha. Niho ambile kukwendi ngayi, “Yuvwilila kukwami, obe Mwene Asha nanenu bantu ba Yunda na Mbenjamani, Nyambi ya Ngula ukekala hamo nanenu ngo nehi muli hamo nendi. Ndi mukamushingashinga pe mukamuwana, ngoboni ndi mu kutengulukila kwashenge ukamifutamina.

³ Ndaba Ishalela wayoyele shikati shashitali sha kubula kulemesha Nyambi wa kupwisha na kubula kwikala na bakankombela ba kubalongesha, kami na kubula ndayano.

⁴ Ngoboni oho makando ezile, batengulukilile kuli Nyambi ya Ngula Nyambi wa Ishalela. Bamushingashingile, pe bamuwanine.

⁵ Mu matena owo kowa muntu watweshele kuya na kwenda na kuboka shiwahe, ndaba kwekalile makando na shikeku mu matunga nimwawo.

⁶ Litunga limo lyayandishilenga litunga lyamina na lukena lumo lwayandishilenga lukena lwamina, ndaba Nyambi waletelenga makando na malwa hahabo.

⁷ Ngoboni mu ku fwanina ku shuma na kubula kwinga ba kupopa, ndaba milimo iya mukutenda mukatambwilayo ncuungu.”

⁸ Oho Asha ayuvwile kulubulula kuya alubulwile Azaliya mwana Ondendi, washumine mutima. Wafumishile tunankishi twa Yunda na Mbenjamani. Wafumishile tunankishi nimwato twa mu zinkena ziya apukwile mu litunga lya binkanda lya Efulemu. Kami watendulwile kaala ka Nyambi ya Ngula, shiya shemaninenga mu shipango sha Litala lya Nyambi.

⁹ Bantu nimwabo bafumine ku litunga lya Efulemu na Manashe na Shimiyoni kwiza kuli Mwene Asha, pe bekalile mu wene wendi ndaba bamonene ngayi Nyambi ya Ngula wekalile hamo nendi. Asha wehanine bantu nimwabo baya bezile kukwendi, hamo na bantu ba Yunda na Mbenjamani.

¹⁰ Bakungulukilile mu Yelushalema mu ngonda wawuhatu wa mwaka wawulikumi na mutanu wakulela kwa mwene Asha.

¹¹ Ha mutena uyo bakombelelele zinkombela kuli Nyambi ya Ngula za ku lipuku elye bakapukwile. Bakombelelele bankunzi 700 na bambelele 7,000.

¹² Balimamine baliyuvwashanine ngayi bakalemeshe Nyambi ya Ngula, Nyambi wa bankakazabo na mitima yabo nimwayo na myoyo yabo.

¹³ Muntu nimwendi kanuke hinge mukulwane, mulume hinge mbuyama, ou wabulile kumulemesha Nyambi ya Ngula Nyambi wa Ishalela wazihiwile.

¹⁴ Bahahile luhaho na lizu lya kubilikiza na lizina lya Nyambi ya Ngula ngayi mwanga balame kulimama pe bawulumwinine na ku shiba zimpandula na mpeta.

¹⁵ Bantu nimwabo bamu Yunda bekalile na ku wahilila ndaba balimamine na mitima yabo nimwayo. Bawahililile na kulemesha Nyambi ya Ngula, Nyambi ya Ngula wabatambwile, pe wabapanine ku mwena ku zimbalila nimwazo.

¹⁶ Mwene Asha wafumishile nkakayendi Maaka mu mwanya wendi Ashela mwene wa mbuyama wa mukulwane, ndaba watendele kanankishi, pe wakapabwele, niho ahokeshelele bivulu mu mukulo wa Kindiloni.

¹⁷ Hinge ndi Asha kaliha wanongeshele myanya yaha tuula twa kulemeshela banyambi bowa ngoboni wekalile kami hinga enga wakulunga kuli Nyambi ya Ngula, mu kuyoya kwendi nimwako.

¹⁸ Wayakile bingwalingwali nimwabyo mu Litala lya Nyambi biya afungwilile tatiyendi Ambiya kuli Nyambi, hamo na bingwalingwali bya ngolinde na bya shiliva na bingwalingwali biya afungwile niyemwine.

¹⁹ Kaliha kwekalile kami nzita hantu akumine mu mwaka wawu 35 wakulela kwa Asha.