2 Byambo 14 - Libuka Lya Kuyela

Mwene Asha ukukoma Bashundani

¹ Mwene Ambiya wafwile. Pe wafundiwile mu bizino bya wene mu Lukena lwa Ndavita. Mwanendi Asha wa mulume wamushwanine kwinga mwene, pe ha kulela kwa Asha litunga lyekalile mu ku mwena mu myaka likumi.

² Asha wawahilishile Nyambi ya Ngula Nyambi yendi, ha kutenda byakwoloka na byabiwahe.

³ Wafumishile tuula twa banyambi bashenge na myanya yaha binkanda yakulemeshela banyambi bowa, wapokwezele zimpangwa za shizila za mamanya na kuketola mikambo ya shizila ya nyambi wa mbuyama Ashela.

⁴ Watongwezele bantu bamu Yunda kutenda shifungo sha Nyambi ya Ngula Nyambi wa bankakazabo na kwombatala ku longesha kwendi na ndayano zendi.

⁵ Ndaba wamanishile myanya yaha binkanda yakulemeshela banyambi bowa na tuula twa kuhokeshela incence bya ku minzi nimwayo yamu Yunda, wene wekalile na ku mwena ha kulela kwendi.

⁶ Ha shikati eshe wazikile bipata ku zinkena zamu Yunda, pe kaliha kwekalile nzita ku myanya yayingi ndaba Nyambi ya Ngula wamupanikile ku mwena.

⁷ Watongwezele bantu bamu Yunda ngayi, “Tokonoko tutende bipata na kuzingwilisha zinkena na kuzikako tupeshi na mapangati aya akutwesha ku shinkiwa na kupatiwa. Tuli na ngovu ha litunga ndaba tunatende shifungo sha Nyambi ya Ngula Nyambi yetu. Unatukoweze na kutupana kwikala shiwahe.” Nohobene bazikile pe batumpukile.

⁸ Mwene Asha wekalile na bakanzita ba ku Yunda 300,000 bapakatile makebo na milinga na bakanzita 280,000 ba ku litunga lya Mbenjamani, bapakatile makebo na bipando bya mukunzi. Nimwabo bengile ba kukanca, bantu ba kulilongesha shiwahe.

⁹ Muka Kushi umo lizina lyendi Zela wakatukilile mutakwe Yunda na bakanzita 1,000,000 na makoloyi 300, pe balikakile kukakuma naku Malesha.

¹⁰ Niho Asha ayile mu kumulwisha pe bakanzita na bakanzita bakwalamine ku mbalila yabo ku Mukulo wa Zefwati hahepi na Malesha.

¹¹ Asha walombelele kuli Nyambi ya Ngula, Nyambi yendi ngayi, “Obe Nyambi ya Ngula, ukutwesha bakanzita bangovu shikuma. Haya tuyavwe, Obe Nyambi ya Ngula Obe Nyambi yetu, ndaba tunakinki mitima hahobe, kami tunezi mu kulwisha lino likunge lyalinene lya bakanzita mu lizina lyobe. Obe Nyambi ya Ngula, Obe Nyambi Yetu, kowa muntu ukutwesha ku litanga na kukukoma.”

¹² Nohobene Nyambi ya Ngula wakomene bakanzita ba Kushi oho Asha na bakanzita ba Yunda babalwishile. Batinine,

¹³ pe Asha na makunge wendi babatandile pe bakaba kumishile naku Ngela. Niho baka Kushi babengi bazihiwile pe bakanzita bakwangile kulikungwila hamo na kulwa. Babakwangishile kuli Nyambi ya Ngula na nzita yendi, pe bakanzita bapukwile byabingi.

¹⁴ Niho banongeshele zinkena mu zimbalila zazingulukile Ngela, ndaba bantu batinishiwile kuli Nyambi ya Ngula. Bakanzita bapukwile zinkena nimwazo eze na kupukula byuma byabingi.

¹⁵ Balwishile kami minkungwa ya balishani bamo, bapukwile matanga amengi a bambelele na makamela. Niho babokele ku Yelushalema.