2 Byambo 13 - Libuka Lya Kuyela

Nzita ya Ambiya na Yelombowami

¹ Mu mwaka wawu 18 wakulela kwa Mwene Yelombowami wamu Ishalela, Ambiya wengile mwene wamu Yunda,

² pe walelele myaka yihatu mu Yelushalema. Mandiyendi wengile Mikaya mwana Uliyele wamu lukena lwa Ngimbiya. Nzita yahangulukile mukati ka Ambiya na Yelombowami.

³ Ambiya wakatwile bakanzita 400,000 pe Yelombowami wezile na bakanzita 800,000.

⁴ Bakanzita baliwaninine mu litunga lya binkanda lya Efulemu. Mwene Ambiya wakandamine ku Lipili lya Zemalayima pe wabilikizile Yelombowami na Baishalela. Wambile ngayi, “Yuvwililenu kukwami.

⁵ Kati kulimuka mufwako ngayi Nyambi ya Ngula Nyambi wa Ishalela, wapanine Ndavita na bazukulyendi wene waha Ishalela ha kulimama kwa mushele kwakubula kumana ndi?

⁶ Yelombowami mwana Nembati wafutukilile kulwisha mwene yendi Sholomoni mwana Ndavita.

⁷ Ku mamaninino wakungwile hamo litanga lya bihulahuli, bakandikizile Lehombowami mwana Sholomoni kwitabila bifungo byabo, ou wengile ndumbana wakubula kutwesha ku bakanangana.

⁸ Pe haya enu munafungu kulwisha ngovu za wene ziya Nyambi ya Ngula apanine ku bazukulya Ndavita. Enu muli na nzita yayinene, kami muli na bankunzi ba ngolinde baya abumbile Yelombowami kwinga banyambi benu.

⁹ Munatanda bakankombela ba Nyambi ya Ngula bazukulya Aloni, kami munatanda Balevi. Mu myaka yabo mwemikileho bakankombela ngo mu nzila yimo iya batendanga ba mikoka yashenge. Muntu nimwendi ou ukwiza na nkunzi hinge bambelele mutanu na babili ukutwesha kulizilika niyemwine kwinga mukankombela ku baya ba kutumbiwa ngayi banyambi babo.

¹⁰ “Ngoboni etu tushili kutendela milimo Nyambi ya Ngula Nyambi yetu, pe kumufutamina tufwako. Bakankombela bahemuwile kuli Aloni batendanga milimo yabo na Balevi bakakubayavwa.

¹¹ Batupulanga kukwendi incence na kukombelela bimuna bya kuhokesha bya nzimba ku lumenemene naku mazolo. Baletanga zintupu za mankende ha tebulu iya yenga ya kuzila shikuma, pe ku mazolo na mazolo babangizanga zimuni ha lyeyeko lya zimuni za ngolinde. Etu twatendanga ebye alayile Nyambi ya Ngula ngoboni enu munamufutamini.

¹² Monenu, Nyambi uli na netu, pe bakankombela bendi bali kuno na zimpandula banaliwahishi kuzishiba mu kutwihana ku ngunga yakumilwisha. Enu bantu ba Ishalela. Hinga mulwisha Nyambi ya Ngula, Nyambi wa bankakazenu. Kutwesha kumupitakana mufwako.”

¹³ Ha shikati oshobene, Yelombowami watumine bamo ba bakanzita bendi mu ku belamina bakanzita ba Yunda kunyima, pe wingi wabo wabatwamikile kumbili.

¹⁴ Oho Bayunda batilaminine nokunoku bawanine ngayi nimwabo banabazinguluku. Pe babilikizile kuli Nyambi ya Ngula mu kubayavwa bakankombela bashibile zimpandula.

¹⁵ Niho Bayunda babilikizile shikuma, pe mu kutwaminina kwa Nyambi, Ambiya wakomene Yelombowami na nzita ya Baishalela.

¹⁶ Baishalela batinine ku Bayunda, pe Nyambi wetabilishile Bayunda ku bakoma.

¹⁷ Ambiya na nzita yendi balwishile Baishalela na ku baziha. Pe 500,000 bakanzita ba Baishalela bakakulwa shiwahe bazihiwile.

¹⁸ Nohobene haya bantu ba Yunda bazihile Baishalela, ndaba bakinkile mitima yabo hali Nyambi ya Ngula Nyambi wa wabankakazabo.

¹⁹ Pe Ambiya watandile bakanzita ba Yelombowami pe wakwatile minzi ya Mbetele na Yeshana na Efweloni na tunzi twa kwakwipi na minzi eye na kwikalamo.

²⁰ Hinga atangile kami Yelombowami kuwana ngovu ha shikati sha kulela kwa Ambiya. Kukumininako Nyambi ya Ngula wamukamine pe wafwile.

²¹ Ngoboni ngovu za Ambiya, zanenehele shikuma. Wekalile na bakazendi likumi na banaa, pe wabelekele bana babalume 22 na bana babambuyama 16.

²² Wingi wa byambo bya likota lya Ambiya, ebye ambile nanebye atendele byatikitiwile mu byambo bya Likota lya muluwe Indo.