Biblia Todo Logo
Bìoball air-loidhne

- Sanasan -

2 Byambo 12 - Libuka Lya Kuyela


Litunga lya Engepita likukatukila mutakwe Litunga lya Yunda

1 Oho wene wa Lehombowami washumishiwile na kuwana ngovu, niye na bantu bendi nimwabo bafutaminine ndayano za Nyambi ya Ngula.

2 Ndaba ya shuma eshe bashushuliwile ha kubula kwoloka kwabo kuli Nyambi ya Ngula. Mwene Shishaki wamu Engepita walwishile Yelushalema mu mwaka wa mutanu wakulela kwa Lehombowami.

3 Wakatwile nzita ya makoloyi 1,200 na 60,000 bakakukandama ha bambishi na bakanzita babengi bakubula kutwesha kulabiwa, ku shimbilila hamo na bakanzita ba ku Limbiya na ba ku Shukimu na ba ku Kushi na ba ku Shundani.

4 Pe wapukwile zinkena za bipata mu Yunda kukakuma naku Yelushalema.

5 Niho muluwe Shemaya wayile kuli Mwene Lehombowami naku bakakutwaminina ba Yunda aba bakungulukilile mu Yelushalema kutina Shishaki. Wabatongwezele ngayi, “Lizu lya Nyambi ya Ngula likwamba kukwenu ngayi, ‘Munamfutamini, nohobene haya nami kami namipana kuli Shishaki.’”

6 Niho Mwene na bakakutwaminina Ishalela betabilile ngayi banabipishi, pe bambile ngayi, “Eshe anatende Nyambi ya Ngula shinawaha.”

7 Oho Nyambi ya Ngula amonene eshe, wambile kami kuli muluwe Shemaya na kumutongweza ngayi, “Ndaba oho banetabili wubi wabo, kuka banongesha nifwako. Yelushalema kukayuvwa wukali wami wawunene wufwako, ngoboni, oho Shishaki akabalwisha bakayoyela ha kanyala.

8 Ngoboni bakenga bakamilimo ba Shishaki, pe bakalimuka kutapuluka mukati ka kuntendela milimo na kutendela milimo batulela ba hano hanci.”

9 Mwene Shishaki waku Engepita wezile ku Yelushalema pe washimbile wuheti wamu Litala lya Nyambi ya Ngula namu musheke. Washimbile byuma nimwabyo na makebo a ngolinde aya atendele Mwene Sholomoni.

10 Ha kuwahingishamo, Lehombowami wafulile makebo a lubemba na kuwapanika ku babilolo aba bekalile na ngovu za kulama mapangati aku musheke.

11 Pe bikati nimwabyo biya ayilenga mwene ku Litala lya Nyambi ya Ngula, bakakulama bashimbilenga makebo, pe niho bawabweshelenga kubakakulama kampenci.

12 Ndaba walishishile kuli Nyambi ya Ngula, pe wukali wa Nyambi ya Ngula kaliha wamunongeshele pe byuma bya Litunga lya Yunda byendele shiwahe.


Kuhatulula kwakulela kwa Lehombowami

13 Lehombowami walelele mu Yelushalema pe ngovu zendi za kwinga mwene zanenehele. Wekalile na myaka 41 oho engile mwene, pe walelele myaka 17 mu Yelushalema, lukena olu ahatile Nyambi ya Ngula ku biketu nimwabyo bya Ishalela kwinga mbalila oku akayaka lizina lyendi na kulemeshiwila. Manda Lehombowami wengile Naama waku litunga lya Amoni.

14 Lehombowami wabipishile ndaba wabulile kwezeka kuwana shifungo sha Nyambi ya Ngula.

15 Milimo ya Lehombowami, ku balika ha kutatika kutwala ku nkumo na byambo bya ba lupashi lwendi byatikitiwile mu byambo bya likota lya muluwe Shemaya namu byambo bya likota lya muluwe Indo. Lehombowami na Yelombowami bazaminine kulwa nzita umo na wamina.

16 Lehombowami wafwile pe bamufundile mu bizino bya wene mu Lukena lwa Ndavita, pe mwanendi wa mulume Ambiya wamushwanine kwinga mwene.

Libuka Lya Kuyela © Bible Society of Zambia, 2020.

Bible Society of Zambia
Lean sinn:



Sanasan