2 Byambo 11 - Libuka Lya Kuyela

¹ Oho Mwene Lehombowami akumine mu Yelushalema, wehanine bakanzita 180,000 ba kulwa shiwahe ba ku mishobo ya Mbenjamani na Yunda. Washingile kuya ku nzita mu kubwesha ngovu zendi za kulela ha mishobo ya Ishalela yaku ncelele.

² Ngoboni Nyambi ya Ngula watongwezele Shemaya muntu wa Nyambi ngayi,

³ atwale lizu kuli Lehombowami mwana Sholomoni mwene waku Yunda naku Baishalela nimwabo bali mu Yunda na Mbenjamani ngayi,

⁴ “Hinga mukalwisha baminenu Baishalela. Nimwenu bokenu ku minzi yenu. Ebye binatendiwi binengi bya shifungo shami.” Bombatalile ndayano za Nyambi ya Ngula pe kaliha bayile na kulwisha Yelombowami.

Lehombowami ukutenda bipata ku minzi

⁵ Lehombowami wekalilile mu Yelushalema pe wazikile bipata bya zinkena zamina za Yunda na Mbenjamani.

⁶ Wazikile zinkena za Mbetelehema na Etami na Tekoya,

⁷ na Mbeti Zula na Shoko na Andulama,

⁸ na Ngati na Malesha na Zifu,

⁹ na Andolayima na Lakishi na Azeka,

¹⁰ na Zola na Ayaloni na Hembuloni. Minzi ya mu bipata yekalile mu bipata bya Yunda na Mbenjamani.

¹¹ Wazikile bipata bya ku shuma, pe wemikile mukulwane umo na umo mu lukena na lukena. Mu zinkena nimwazo wayakilemo byakulya na mazi a olive na waine.

¹² Pe kami wayakilemo makebo na milinga, pe mu nzila eye walamine Yunda na Mbenjamani mu ngovu zendi.

Bakankombela na Balevi bakwiza ku Yunda

¹³ Bakankombela na Balevi bekalilenga ku biketu nimwabyo bya Ishalela bezile kufuma ku mabukubuku mu litunga lya Yunda.

¹⁴ Balevi bashiyile mayembelelo wabo na byuma byabo pe bayile ku Yunda naku Yelushalema, ndaba ngayi Mwene Yelombowami wamu Ishalela na bancwana zendi kaliha babetabilishile ngayi batende milimo ngo bakankombela ba Nyambi ya Ngula.

¹⁵ Yelombowami wemikile bakankombela bendi niyemwine kutendela mu myanya yaha binkanda yakulemeshela banyambi bowa na kulemesha mayimbwe na tunankishi otu babumbile mu shifwekesha sha kwinga ngo bankunzi.

¹⁶ Pe ku mishobo nimwayo ya Baishalela, bantu aba bashingile kulemesha Nyambi ya Ngula, Nyambi wa Ishalela na kulunga, bakonkele Balevi ku Yelushalema, ngayi mwanga batweshe kupana zinkombela kuli Nyambi ya Ngula, Nyambi wa bankakazabo.

¹⁷ Shuma eshe shashumishile wene wamu litunga lya Yunda ha myaka yihatu, nibo bemanine na Lehombowami mwana Sholomoni, pe bayoyele ngonehe bayoyelenga mu kuleliwa kwa Mwene Ndavita na Mwene Sholomoni.

Balupashi lwa Lehombowami

¹⁸ Lehombowami wayekele Mahalati tatiyendi wengile Yelimoti mwana Ndavita, kami mandiyendi wengile Ambihayile mwana Eliyambi na muzukulya Njeshe.

¹⁹ Niho babelekele bana bahatu babalume, ba Yeushi na Shemaliya na Zahamu.

²⁰ Kukumininako washimbile Maaka mwana Ambishalome, pe babelekele bana babalume banaa, bengile Ambiya na Atayi na Ziza na Shelomiti.

²¹ Bakazendi nimwabo ekalile nabo Lehombowami bengile 18 na bakazendi bakwinginina bengile 60. Wabelekele bana babalume 28 na bana babambuyama 60. Ngoboni hakati ka bakazendi nimwabo na bakazendi bakwinginina nimwabo wahakileho shikuma Maaka mwana Ambishalome.

²² Maaka wayakileko mwanendi wa mulume Ambiya kupitakana bana bendi bamina, pe bamuhatile kwinga muntu wakumushwana kwinga mwene.

²³ Lehombowami wakeyele, wapanikile ngovu ku bana bendi, pe wabayakile mu zinkena za bipata zamu Yunda na Mbenjamani. Wabashingilile byakulya byabingi bya nahiya, pe kami wabayekelele bambuyama babengi.