2 Bamyene 9 - Libuka Lya Kuyela

Yehu ukuwabishiwa kwinga mwene wamu Ishalela

¹ Ha shikati osho, muluwe Elisha wehanineho umo ha bamiluwe ba Nyambi wa ndumbana pe wambile kukwendi ngayi, “Liwahishile ushimbe mushashi wa mazi pe uye nawo ku Lamoti mu Ngiliyande.

² Oho ukakumako kashinge Yehu mwana Yehoshafwati wa mulume muzukulya Nimushi wa mulume. Ukamutwala ku kampenci kumufumisha ha baminendi,

³ pe ukamuyitile mazi a olive ha mutwe wendi, na kumutongweza ngayi, ‘Nyambi ya Ngula unabiliki ngayi unakuwabishi kwinga mwene wamu Ishalela.’ Niho boka wanguwangu.”

⁴ Nohobene muluwe wa Nyambi wa ndumbana wayile ku Lamoti Ngiliyande,

⁵ niko akawanine bakulwane banzita ha shikungulukilo. Muluwe wepwile ngayi, “Hekulu, nili na lizu kukwenu.” Yehu wepwile ngayi, “Kati yani hakatiketu ou ukushinga?” Wakumbwile ngayi, “Obe bene hekulu.”

⁶ Niho wubili wabo bayile mukwingina mu litala, pe muluwe wa ndumbana wayitilile mazi ha mutwe wa Yehu pe wambile kukwendi ngayi, “Nyambi ya Ngula Nyambi wa Ishalela ukubilika ngayi, ‘Nakuwabishi kwinga mwene wa bantu bami Ishalela.

⁷ Ukaziha hekulyobe mwene, uya mwana Ahambu wa mulume, nohobene ngayi mwanga nishushule Yezembelo ha kuziha miluwe bami na bakamilimo bami bamina.

⁸ Balupashi lwa Ahambu na bazukulyendi nimwabo bakafwa, nikafumisha balupashi lwendi nimwalwo babalume hinge ndi batwanuke hinge bakulwane mu Ishalela.

⁹ Nikayandisha balupashi lwa Ahambu ngonehe natendele balupashi lwa mwene Yelombowami mwana Nembati wamu Ishalela na Mwene Mbaasha wamu Ishalela mwana Ahiya.

¹⁰ Yezembelo kukafundiwa wufwako, lutu lwendi lukaliwa ku batuwa mu mbalila ya Yezilelu.’ ” Uya muluwe wa ndumbana, oho amanishile kwamba noho, niho ashinkwilileko pe wetukile.

¹¹ Oho Yehu abokele ku baminendi babilolo, bamwipwile ngayi, “Kumwenenga boni? Uya shipempeli na ku shingilinga bishini?” Yehu wakumbwile ngayi, “Mulimuka uya muntu ngayi wanahiti naneshe ambanga na kutamoka.”

¹² Bakumbwile ngayi, “Byo etu kubilimuka tufwako. Tutongweze ebye anamba.” Yehu wabatongwezele ngayi, “Muluwe unantongweze ngayi, Nyambi ya Ngula unabiliki ngayi, ‘Nakuwabishi na kukwimika kwinga mwene wa Ishalela.’ ”

¹³ Baminendi babilolo hohobene bayalile bivwalo byabo hayilu ya tukandamisho ngayi Yehu emaneho, niho bashibile zimpandula na kubilikiza ngayi, “Yehu wengakale mwene.”

Mwene Yolamu wa Ishalela ukuzihiwa

¹⁴ Niho Yehu mwana Yehoshafwati mwana Nimushi abebele Mwene Yolamu. Yolamu wekalile na Bakanzita ku Lamoti Ngiliyande, ha kulwisha Mwene Hazayelu waku Shiliya.

¹⁵ Ngoboni mwene Yeholamu wekalile ku Yezilelu, oku ayile mu kupangiwila bitombo ebye akalemanine mu nzita ku Lamoti. Nohobene Yehu wambile ku baminendi babilolo ngayi, “Ndi munawili kumo na nami, monenu ngayi kowa muntu wakubembuluka mu Lamoti kuya na kutongweza bantu mu Yezilelu.”

¹⁶ Niho Yehu enginine mu koloyi yendi, wakatukile na kuya ku Yezilelu ndaba Yolamu oho ushili kukola, kami Mwene Ahaziya wamu Yunda niko ekalile na kumuzingula.

¹⁷ Mukakulama wekalile ha mulimo ha kapeshi ku Yezilelu, wamonene Yehu na bantu bendi hibeza. Wabilikizile ngayi, “Namono bantu bamo banakandama mu makoloyi.” Yolamu wakumbwile ngayi, “Tuma mukakukandama ha mbishi na kwipula ngayi mukwiza mu ku mwena ndi?”

¹⁸ Ntumwana wendelele ha mbishi na kushimbawila Yehu, pe wamutongwezele ngayi “Mwene ukushinga kulimuka ndi munezi ngo mu nzila ya wuhoni.” Yehu wakumbwile ngayi, “Obyo kaliha ulinabyo na ndaba. Wila ha muhoko wami.” Mukakulama waha kapeshi washimikile ngayi, “Ntumwana nakakumu ku likunge ngoboni kuboka wufwako.”

¹⁹ Mwene watumine ntumwana wawubili, wakepwile ngayi, “Mwene ukushinga kulimuka ndi munezi mu wuhoni.” Yehu wakumbwile ngayi, “Obyo kaliha uli nabyo na ndaba. Wila ha muhoko wami.”

²⁰ Niho kami mukakulama washimikile ngayi, “Ntumwana nakakumu ku likunge ngoboni kuboka wufwako. Mukakutwaminina likunge uli na kwendesha koloyi yendi ngonehe muntu wakupempela, ngonehe Yehu mwana Nimushi.”

²¹ Yeholamu wambile ngayi, “Ndetelenu koloyi yami.” Pe bamuletelele, mwene Yolamu wa Ishalela na Mwene Ahaziya mwene wa Yunda bakandamine muntu na muntu mu koloyi yendi, mu kushimbawila Yehu. Bamuhanganine ku mfuba eye yengile ya Namboti wa Kayezilelu.

²² Oho Yeholamu amonene Yehu, wepwile ngayi, “Munezi mu ku mwena ndi?” Yehu wakumbwile ngayi, “Kukutwesha ku mwena nahiti oho tushili na bya wulozi nimwabyo na tunankishi tuya aletele mandiyobe Yezembelo?”

²³ Yeholamu wabilikizile kuli Ahaziya ngayi, “Kuli kufutulukila.” Oho atengulwile koloyi yendi ngayi atine.

²⁴ Yehu wananine shipando shendi sha mukunzi na ngovu zendi nimwazo, wapuhile muvwi pe wayahile Yeholamu mu mongo kukatubula naku mutima wendi. Yolamu wawilile mu koloyi yendi wakufwa.

²⁵ Yehu wambile kuli minendi Mbindika mukakumuyavwa ngayi, “Shimba lutu lwendi uluyumbile mu mfuba iya yengilenga ya Namboti wa Kayezilelu. Anuka ngayi oho obe na nami twendelenga hamo mu koloyi kunyima ya Ahambu tata mwene Yolama, Nyambi ya Ngula wambile mazu a kulwisha Ahambu ngayi,

²⁶ ‘Nzona namona mponde ya Namboti na bana bendi babalume.’ ” Niho na kukulupishi ngayi, “Nikakushushwila mwamuno mu mfuba.” Yehu niho atongwezele Mbindika ngayi, “Haya shimba mutuntu wa Yolama uwuyumbile mu mfuba iya yengilenga ya Namboti, ngonehe ambile Nyambi ya Ngula ngayi shikamoneka.”

Mwene Ahaziya wamu Yunda ukuzihiwa

²⁷ Mwene Ahaziya mwene wamu Yunda oho amonene ebye byatendiwile pe watininine mu koloyi yendi na kulumba ku munzi wa Mbeti Hangane Yehu wamukonkele. Watongwezele bantu bendi ngayi, “Muzihenu nou kami.” Pe bamulemekele oho ayilenga mu koloyi yendi kulumba ku Ngula, kwakwipi na munzi wa Imbilemu. Ngoboni wanungileko kukakuma naku lukena lwa Mengindo, oku akafwililile.

²⁸ Babilolo bendi batwalile mutuntu wendi ku Yelushalema mu koloyi, pe bakamufundile mu bizino bya wene mu Lukena lwa Ndavita,

²⁹ Mu mwaka wawulikumi na umo wakulela kwa Mwene Yolamu mwana Ahambu wamu Ishalela, Ahaziya wengile mwene wamu Yunda.

Lihano Yezembelo ukuzihiwa

³⁰ Yehu wakumine mu Yezilelu. Yezembelo, ha kuyuvwa eshe shatendiwile wawabile wulombo ku meho wendi, wawahishile huki zendi na kwimana hinga atilamina mu limpananga lya musheke.

³¹ Oho Yehu enginine ku lipangati, Yezembelo wehanine ngayi, “Obe unafweke ngonehe Zimili ou wazihile hekulyendi. Shumangani unezili kuno?”

³² Yehu watilaminine kuyilu pe wabilikizile ngayi, “Yani unawili kumo na nami?” Babilolo babili hinge bahatu ba ku musheke bapenzele hanci kukwendi mu limpananga

³³ Yehu wambile kukwabo ngayi, “Muyumbilenu hanci.” Bamuyumbilile hanci. Mukeza wendi washabukilile ha limota na ha bambishi, pe Yehu walyatile Yezelela na koloyi na bambishi ha lutu lwendi,

³⁴ pe wenginine mu musheke, walile byakulya na kunwa. Nohoboni ambenga ngayi, “Shimbenu uya mbuyama wa shikuto mukamufunde, ndaba niye wenga mwana mwene wa mbuyama.”

³⁵ Ngoboni bantu aba bayile na kumufunda kaliha bawanineko mutuntu wendi ndele tuhu kangawe kendi na bifupa bya ku maboko wendi nabya mawulu.

³⁶ Oho bashimikilebyo kuli Yehu, wambile ngayi, “Ebye nibyo ambile Nyambi ya Ngula ngayi bikamoneka, oho ambilile muli mukamulimo wendi Eliya waku Tishimbe ngayi, ‘Batuwa bakalya lutu lwa Yezembelo mu mbalila ya Yezilelu.

³⁷ Bimamo byendi bikapanzanina kuyo ngonehe wutoko, kowa muntu ukatwesha kulimuka ngayi binengi bya Yezembelo.’ ”