2 Bamyene 8 - Libuka Lya Kuyela

Mbuyama waku Shunema ukuboka

¹ Elisha watongwezele uya mbuyama wazikilenga ku Shunema, ou wekalile na mwana wa mulume uya ayoyeshele, ngayi Nyambi ya Ngula ukatuma kapande mu litunga aka kakekala myaka mutanu na yibili. Wamutongwezele kami ngayi aye na kwikala kwashenge na ba lupashi lwendi.

² Mbuyama watendele ngonehe amutongwezele muntu wa Nyambi, pe wayile na ba lupashi lwendi mukwikala mu Fwilishitina ha myaka mutanu na yibili.

³ Kukumana kwa myaka mutanu na yibili, wabokele ku Ishalela pe wayile kuli mwene mu kumunyepa litala lyendi na mfuba yendi ngayi bamubweshelebyo.

⁴ Wawanine mwene hamba na Ngehazi mukamulimo wa Elisha. Mwene washingile kulimuka bya bikomokesho bya Elisha.

⁵ Oho Ngehazi atongwezelenga mwene eshe Elisha ayoyeshele muntu wakufwa, mbuyama wakambikile shambo shendi kuli mwene. Ngehazi wambile kuli mwene ngayi, “Obe mwene ya ngoma, owe niye uya mbuyama wekala na mwanendi ayoyeshele Elisha.”

⁶ Ha kukumbula ku liyipu lya mwene, wenzalishile lushango lwa Ngehazi. Mwene wehanine shilolo niho amutongwezele ngayi amubweshele byuma nimwabyo byengile byendi, ndando ya wingi wa mbuto nimwayo iya yayiminenga mu mafuba endi ha myaka mutanu na yibili eye ekalile kwashenge.

Hazela ukuziha mwene Mbenihandandi

⁷ Elisha wayile ku Ndamashika ku shikati shiya akolelenga mwene Mbeni Handandi wamu Shiliya. Oho mwene atongweziwile ngayi muntu wa Nyambi uli kuyo,

⁸ wambile kuli Hazayelu umo waha babilolo bendi ngayi, “Twala liyumbu kuli muluwe wa Nyambi, pe kami kamunyepe kuya mukwipwiziza kuli Nyambi ya Ngula ndi nikapinduka hinge ndi nifwako.”

⁹ Nohobene Hazayelu wakulikishile makamela makumi anaa a bya mishoboshobo ya byuma byabiwahe bya ku Ndamashika, pe wayile kuli Elisha. Oho Hazayelu amuwanine wambile ngayi, “Mukamulimo wobe Mwene Mbeni Handandi waku Alamu unantumu mu kukwipula ndi ukapinduka shiwahe hinge ndi kutwesha kukapola wufwako.

¹⁰ Elisha wamukumbwile ngayi Nyambi ya Ngula unalihololo kukwami ngayi ukafwa, ngoboni uye kukwendi na kumutongweza ngayi ukapola.”

¹¹ Niho Elisha amuzekwile na kumunconcomeka ku lupala hantu noho Hazayelu ayuvwile lisheni. Kubazumuka tuhu Elisha muntu wa Nyambi ha kupwezuma kulila.

¹² Hazayelu wamwipwile ngayi, “Shumangani ukupwezuma hekulu?” Elisha wakumbwile ngayi, “Ndaba nikulimuka byuma byabibi ukutenda na kulwisha bantu ba Ishalela. Ukahokesha bipata byabo na mundilo, ukaziha bandumbana babo babawahe na mukwale, ukaziha bana babo na tupumpu, pe ukaloshola bana mu mavumo a bambuyama a kubula kukoma.”

¹³ Hazayelu wepwile ngayi, “Nikutwesha nahiti kwinga wa ngovu? Ami showashowa.” Elisha wakumbwile ngayi, “Nyambi ya Ngula unamoneshe ngayi wukenga mwene wamu Shiliya.”

¹⁴ Hazayelu wabokele kuli Mbenihandandi, niho amwipwile ngayi, “Elisha nakamba ngayi nahiti?” Hazayelu wamukumbwile ngayi, “Elisha nakantongweze ngayi mwa shikuma ukapinduka shiwahe.”

¹⁵ Ngoboni oho kwashile Hazayelu washimbile muyemba wawuzabikile mu mema na kufwika mwene ku meho kutwala noho afwile. Hazayelu washwanine Mbenihandandi kwinga mwene wamu Shiliya.

Mwene Yeholamu wamu Yunda

¹⁶ Mu mwaka wa mutanu wakulela kwa Yolamu mwana Ahambu mwene wa Ishalela, Yeholamu mwana Yehoshafwati wa mulume wengile mwene wamu Yunda.

¹⁷ Oho ekalile na myaka makumi ahatu na yibili, pe walelele mu Yelushalema myaka mutanu na yihatu.

¹⁸ Mukazendi wengile mwana Ahambu, pe wafwekele ba lupashi lwa Ahambu na kukonka biheka byabibi bya bamyene ba Ishalela. Wabipishilile Nyambi ya Ngula,

¹⁹ ngoboni Nyambi ya Ngula kaliha washingile kunongesha Yunda, ndaba wakulupishile mukamulimo wendi Ndavita ngayi bazukulyendi bakazamina kulela shikati nimwasho.

²⁰ Ha shikati sha kulela kwa Yeholamu, Endoma wafutulukilile Yunda pe wengile wene wakulimanina.

²¹ Nohobene Yolamu wafunzukile na makoloyi wendi nimwawo kuya ku Zaili, niko bakabazingulukilile bakanzita ba Baendoma. Ngoboni shikati sha wushiku, Yeholamu na bakulwane ba makoloyi wendi a nzita batweshele ku shila na kutina, pe bakanzita bendi bapanzanine kuya ku minzi yabo.

²² Endoma wengile wakuliyimanina kufuma ku maboko a Yunda. Ha shikati shimo bene, lukena lwa Limbina kami lwafutukilile Yunda na kuliyimanina.

²³ Byuma nimwabyo byamina biya atendele Yolamu byatikitiwile mu Likota lya bamyene bamu Yunda.

²⁴ Yolamu wafwile pe wafundiwile mu bizino bya wene bya mu Lukena lwa Ndavita, pe Ahaziya mwanendi wa mulume wamushwanine kwinga mwene.

Mwene Ahaziya wamu Yunda

²⁵ Mu mwaka wawulikumi na yibili wakulela kwa Yolamu mwana Ahambu mwene wa Ishalela, Ahaziya mwana Yeholamu wa mulume wengile mwene wamu Yunda.

²⁶ Oho Ahaziya ekalile na myaka makumi abili na yibili, pe walelele mu Yelushalema mwaka umo. Mandiyendi wengile Ataliya, muzukulya Omili mwene wa Ishalela.

²⁷ Ha kuwana ngayi Ahaziya baliwaninine wushinda na mwene Ahambu ha kuliyekela, wabipishilile Nyambi ya Ngula, ngonehe shiya batendele ba lupashi lwa Ahambu.

²⁸ Mwene Ahaziya walifungilile na Yolamu mwana Ahambu mwene wamu Ishalela mu nzita na kulwisha Hazayelu mwene waku Shiliya. Bakanzita bakaliwaninine ku Lamoti mu Ngiliyande, pe Yolamu bamulemekele mu nzita.

²⁹ Wabokele ku lukena lwa Yezilelu mu kupangiwa bitombo byendi, pe Ahaziya mwene wamu Yunda wayileko mu kumuzingula.