2 Bamyene 7 - Libuka Lya Kuyela

¹ Elisha wakumbwile ngayi, “Yuvwa taha ebye akwamba Nyambi ya Ngula. Nzona, ku shikati shino ukatwesha kulanda mu Shamaliya makilongilamu 7 a loto yayiwahe hinge makilongilamu 14 a ncongamincale ha shiliva yimo.”

² Shilolo uya ayendaminine mwene wambile kuli Elisha ngayi, “Obyo kukamoneka bifwako, hingebene shinga ndi Nyambi ya Ngula niyemwine ukutuma mvula hahano.” Elisha wakumbwile ngayi, “Ukamona na meho wobe eshe shikaholoka hinga mwaka ukatange kulya biya byakulya.”

Bakanzita ba Baashiliya ba kushila

³ Balume banaa aba bayandilenga ku mbumba ha lutu bekalile ha munkanda ku mapangati a lukena lwa Shamaliya, pe balyambashanine ngayi, “Shumangani tukutatilila kuno kutwala ha kufwa kwetu?

⁴ Nisho kutuyavwa shifwako kuya na kwingina mu lukena ndaba tukafwilamo nzala, ngoboni ndi tukwikala kuno tukafwa kami. Nohobene tokonoko, tuyenunga ku munkungwa wa Baashiliya, shuma bakatenda tuhu kukwetu kutuziha, ngoboni kampe hamina bakatulehelela.”

⁵ Oho kwengile ha kaboko bwii, bayile ku munkungwa wa Baashiliya, ngoboni oho ba kumineho, kaliha hekalile muntu.

⁶ Nyambi ya Ngula wayuvwishile Baashiliya oho shilolo balume banaa baye mu Shamaliya ebye byavuminenga ngonehe kwiza kwa nzita yayinene, hamo na bambishi na makoloyi, pe Baashiliya bahanganikile ngayi mwene wamu Ishalela nakalobo baya Bahita na Baengepita na bakanzita babo mu kubalwisha.

⁷ Nohobene Baashiliya batinishile wumi wabo mazolo ayo na ku shiya zintanda zabo na bambishi babo na bambongolo babo, pe bashiyile munkungwa nahiya.

⁸ Oho baya balume banaa bakumine kunkumo ya munkungwa, benginine mu ntanda, balile na kunwa ebye byekalilemo, balitolelele shiliva na ngolinde na bivwalo ebye bawanine, pe bayile na kubiholeka. Benginine mu ntanda yamina kami batendele shuma shimo.

⁹ Niho balyambishile mukati kabo ngayi, “Kutwesha kutenda nehe tufwako. Tuli na mbuzi yayiwahe, kaliha twafwanina kulitentekelayo ninkayetu. Ndi tukutatilila kukuma ku lumenemene noho tukashimike, mwa shikuma tukashushuliwa. Tuyenunga hahano tukatongweze babilolo ba mwene.”

¹⁰ Nohobene bafumine mu munkungwa wa Baashiliya, bayile ku lukena na kutongweza bakakulama ku lipangati ngayi, “Twayile ku munkungwa wa Baashiliya, pe kaliha twamonene muntu hinge kuyuvwa muntu. Bambishi na bambongolo bekalile bakubula ku shobolola na zintanda ngonehe bazishiyile Baashiliya.”

¹¹ Bakakulama babilikile mbuzi, pe bayishimikile ku musheke.

¹² Kwengile oho kushili wushiku, ngoboni mwene wapindukile ha wulili pe wambile ku babilolo bendi ngayi, “Nikumitongweza ebye bakuhanganika Baashiliya. Banalimuku bya kapande kano, niho banashiyi zintanda zabo na kuya na kuholama mu lishaka. Bahanganika ngayi tukashiya lukena, tuye na kushinga byakulya, nohoboni bakatushimbe tuli babomi na kupukula lukena lwetu.”

¹³ Umo ha babilolo bendi wambile ngayi, “Bantu muno mu lukena bali mu malwa nimwabo, banafweke ngo bantu baya bafwakale. Nohobene tokonoko tutume bantu na bambishi mutanu baya banashalaho, ngayi mwanga tushingishishe binatendiwi.”

¹⁴ Bahatile bantu bamo, pe mwene wabatumine mu makoloyi abili na bambishi babo na mazu akubafundiziza kuya na ku shingishisha ebye byatendiwa ku bakanzita Baashiliya.

¹⁵ Balume bayile kukakuma naku Yondana, pe ha nzila bamonene bivwalo na byuma biya bayumbile Baashiliya oho batinine. Niho babokele pe bashimikile kuli mwene.

¹⁶ Bantu ba ku Shamaliya bawundumukile pe bapukwile munkungwa wa Baashiliya. Kami, ngonehe eshe ambile Nyambi ya Ngula ngayi makilongilamu 7 a loto yayiwahe shikuma hinge makilongilamu 14 ya ncongamincale yikalandiwa shiliva yimo.

¹⁷ Nisho shamonekele nehe ngayi, mwene wa Ishalela wayakile lipangati lya lukena mu ngovu za shilolo uya ayendaminine. Niho shilolo bamulyatangilile bantu, pe wafwile, ngonehe shiya alubulwile muntu wa Nyambi haya ayile mu ku mona mwene.

¹⁸ Ndaba muntu wa Nyambi watongwezele mwene nehe ngayi, “Nzona ha shikati shiyo makilongilamu 7 a loto yayiwahe shikuma, hinge makilongilamu 14 ya ncongamincale akalandishiwa mu Shamaliya ha shiliva yimo.”

¹⁹ Ku mazu wayo, shilolo wakumbwileko ngayi, “Obyo kukamoneka bifwako, hingebene shinga ndi Nyambi ya Ngula niyemwine ukutuma mvula hahano.” Elisha wakumbwile ngayi, “Ukalimonena na meho obe eshe shikaholoka, ngoboni hinga mwaka ukatange kulya ku biya byakulya.”

²⁰ Kami shiyo nisho shatendiwile kukwendi bene, pe wafwile, bamulyatangilile bantu ku lipangati lya lukena.