2 Bamyene 6 - Libuka Lya Kuyela

Kazembe kakuwila mu mema kakuzabuliwa

¹ Litanga lya miluwe ba Nyambi baya endeshelenga Elisha balinyengele kukwendi ngayi, “Hano ha mwanya twazika hahashe shikuma.

² Utwitabilishe ngayi tuye ku Yondana tukatemeneko bishimi, niho tukatweshe kuzika mwakwikala.” Elisha wakumbwile ngayi, “Shinawaha.”

³ Umo wa hakati kabo wamukandamikile ngayi aye nabo. Elisha wetabilile kuya nabo,

⁴ nibo bafunzukile hamo. Oho bakumine ku Yondana, batatikile kutema mitondo.

⁵ Umo hakati kabo oho atatikile kutema shitondo kubazumuka tuhu, kazembe kendi shoko, kawila mu mema. Wabwalumukile kuli Elisha ngayi, “Ho! Nikwinga nahiti, hekulu? Niko kengile kakulomba.”

⁶ Elisha muntu wa Nyambi wepwile ngayi, “Kati kanawili halwa hati?” Uya muntu wamutongwezele aha kashokokelele, pe Elisha watemene katondo, wakashonkele ha mema na kutimbula mushuka wa kazembe.

⁷ Elisha wamutongwezele ngayi, “Kazabuleho.” Niho uya muntu wanyongamine, wakazabwileho.

Nzita ya Baashiliya yikukomiwa

⁸ Mwene waku Shiliya wekalile mu nzita na Baishalela. Wepwizizile babilolo bendi na kuhata mwanya wakuzikila munkungwa wendi.

⁹ Ngoboni muntu wa Nyambi watumine lizu kuli mwene wamu Ishalela na kumutongweza ngayi, “Hinga uya kwakwipi na mbalila iyo, ndaba Baashiliya bali na kutubelamininako.”

¹⁰ Nohobene mwene wa Ishalela wambilile bantu aba bekalilenga ku mbalila iyo, pe bekalile na kulama. Eshe shatendiwilenga bikati byabingi.

¹¹ Mwene wa Baashiliya wapilamine shikuma haneshe. Wehanine babilolo bendi na kubepula ngayi, “Kati hakati kenu bayani banawilikumo na mwene wamu Ishalela?”

¹² Umo hakati kabo wakumbwile ngayi, “Kowa muntu unawili kumo nendi, obe hekulu. Muluwe Elisha watongwezanga mwene wa Baishalela ebye wambanga ndi unambilingabyo kuwi mu kampenci kobe.”

¹³ Mwene wa Shiliya wambile ngayi, “Mushingenu oku ali, pe nikamukwata.” Oho niye bamutongwezele ngayi Elisha uli ku Ndotana,

¹⁴ watumine bakanzita babengi kuyo na bambishi na makoloyi a nzita. Bakumine ku munzi wushiku na kuwuzinguluka.

¹⁵ Oho kwashile lumenemene mukamulimo wa Elisha oho apindukile watutikile ha munkanda, wamonene litanga lya Baashiliya na bambishi babo na makoloyi hinga bazinguluka munzi. Wabokele kuli Elisha pe wabwalumukile ngayi, “Twafwakale hekulu! Tukutenda nahiti?”

¹⁶ Elisha wakumbwile ngayi, “Hinga utina. Etu tuli na babengi banawilikumo nanetu kupitakana aba banawilikumo nabo.”

¹⁷ Niho Elisha alombelele ngayi, “Obe Nyambi ya Ngula tonesha meho wendi, ngayi amone.” Nyambi ya Ngula wakumbwile kulomba kwendi, pe mukamulimo wa Elisha watilaminineko, pe wamonene shinkanda hinga shakwalama na bambishi na makoloyi a mundilo, nimwabo hinga bazinguluka Elisha.

¹⁸ Oho Baashiliya bezile mu kumulwisha Elisha walombelele ngayi, “Obe Nyambi ya Ngula, kama aba bantu benge batushishitwa.” Nyambi ya Ngula wakumbwile kulomba kwendi, pe wakamine bantu kubengisha batushishitwa.

¹⁹ Niho Elisha ayile kukwabo pe wambile ngayi, “Munalubu mu nzila, uno kaliha niwo munzi mukushinga. Nkonkenu, pe nikamitwala ku muntu ou muli na ku shinga.” Pe wabatwalile ku Shamaliya.

²⁰ Oho benginine tuhu mu lukena, Elisha walombelele ngayi, “Tonesha meho wabo obe Nyambi ya Ngula, pe ubalehe bamone.” Nyambi ya Ngula wakumbwile kulombela kwendi, wabweshele ku mona kwabo, pe bamonene ngayi bali mukati ka Shamaliya.

²¹ Mwene wamu Ishalela wamonene Baashiliya, wepwile Elisha ngayi, “Hekulu, nibazihe ndi? Nikabazihe ndi?”

²² Elisha wakumbwile ngayi, “Byo, kati bakanzita aba wakwatanga mu nzita wabazihanga ndi? Bapane byakulya na mema, pe ubalehe baboke kuli mwene yabo.”

²³ Nohobene mwene wamu Ishalela watendele mayambwayambwa amanene pe ha kumanisha kulya na kunwa, wababweshele kuli mwene waku Shiliya. Ku balika haya na kutwala kumbili Baashiliya balehele kulwisha litunga lya Ishalela.

Kuzingulukiwa kwa Shamaliya

²⁴ Oho kwapitile shikati, Mwene Mbeni Handandi wamu Shiliya watwalile bakanzita bendi nimwabo na kulwisha Ishalela na kuzinguluka shipata sha lukena lwa Shamaliya.

²⁵ Kwekalile kapande kakanene shikuma mu Shamaliya, oho lukena baluzingulukile, pe mutwe wa mbongolo walandiwilenga makumi mutanu na ahatu a muwayawaya wa shiliva, kantumba kakashe ka tuzi twa nkilimba kalandiwilenga muwayawaya mutanu wa shiliva.

²⁶ Mwene wamu Ishalela wendelenga ha kembi ka lukena, oho mbuyama ehaninenga ngayi, “Obe hekulu. Nyavwe.”

²⁷ Mwene wakumbwile ngayi, “Ndi Nyambi ya Ngula ukukana ku kuyavwa, pe nikutwesha ku kuyavwa nahiti? Kati nili na loto kuya kwa kupulila hinge waine ku shizongelo ndi?

²⁸ Ukalu ngani ulinawo?” Mbuyama wakumbwile ngayi, “Mutena umo ou mbuyama nili nendi wambile ngayi, ‘Tulye mwanobe taha lelo, nihoboni nzona tukalye mwanami.’

²⁹ Nohobene twatelekele mwanami pe twamulile. Kwashileko namutongwezele ngayi, ‘Tulye mwanobe.’ Ngoboni wamuholekele.”

³⁰ Ha kuyuvwa eshe, mwene watabwele bivwalo byendi na wunginga, pe bantu aba bekalile kwakwipi na kembi batweshele ku mona ngayi wavwalile bicancolo ku nceto ya bivwalo byendi.

³¹ Mwene wabwalumukile ngayi, “Nyambi mwanga ankame nifwe ndi Elisha mwana Shafwati kuketuliwa mutwe wufwako oho mutena shilolo ulele.”

³² Pe watumine ntumwana mu kuleta Elisha. Ha shikati oshobene Elisha wekalile ku munzi na bakulwane bamo aba bezile na kumuzingula. Oho shilolo ntumwana wa mwene akume, Elisha wambile ku bakulwane ngayi, “Uya kapondwa unatumu muntu mu kunziha. Haya, oho akukuma kuno, shinkenu shihala kami hinga mwitabila ngayi engine. Mwene niyemwine ukeza munyima yendi.”

³³ Oho shilolo amanishe kwamba, ntumwana wakumine pe wambile ngayi, “Kati unengi Nyambi ya Ngula, Ou unalete makando anehe kukwetu. Shumangani eshe nishili kutatila Nyambi ya Ngula tatililee?”