2 Bamyene 5 - Libuka Lya Kuyela

Naamani ukupoleshiwa ku mbumba

¹ Naamani, mukulwane wa nzita, ya mwene wa litunga lya Shiliya wengile wamuleemu shikuma, pe mwene wa Shiliya wamuyakileko, ndaba muli Naamani Nyambi ya Ngula wapanikile ngovu ku bakanzita ba Shiliya. Wengile kanzita wamunene, ngoboni wayandilenga ku wulweli wa mbumba.

² Mu nzita yabo yekalileko ya kulwisha Ishalela, Baashiliya bashimbile mushimbi wamushe wa Kaishalela ou wezile mukwinga mukamulimo wa mukaza Naamani.

³ Mutena umo mushimbi wambile kuli Hekulyendi wa mbuyama ngayi, “Shinga ngayi, hekulyami atweshe kuya kuli muluwe ou wekala ku Shamaliya, shinga unakamupoleshe ku wulweli wendi.”

⁴ Oho Naamani ayuvwile eshe wayile kuli mwene, pe wakamutongwezele ebye ambile mushimbi wafumine ku litunga lya Ishalela.

⁵ Mwene waku Alamu wambile ngayi, “Yanga kuli mwene wamu Ishalela pe nika kupana liñwati lya kuya kukwendi.” Nohobene Naamani wafunzukile, washimbile makulukazi makumi ahatu a muwayawaya wa shiliva na muwayawaya wa ngolinde na bivwalo likumi byabiwahe bya kutambashanisha.

⁶ Liñwati liya atwalile kuli mwene lyalabiwile ngayi, “Lino liñwati likutontolola shilolo wami Naamani. Nikushinga ngayi umupoleshe ku wulweli wendi.”

⁷ Oho mwene wa Ishalela alabile liñwati, watabwele bivwalo na kulikomokela, pe wambile ngayi, “Kati mwene waku Shiliya unanyakamo nahiti ngayi ami nikutwesha kupolesha ou muntu? Kati ukuhanganika ngayi ami nengi Nyambi ou wekala na ngovu ha wumi na ha lufu ndi? Shamonekakale ngayi uli na kushinga kutatika kulyamba na nami.”

⁸ Oho muluwe Elisha ayuvwile ebye byatendiwile, watumine lizu kuli mwene ngayi, “Shumangani unapilamini? Tuma owo muntu kukwami, pe nikamumoneshe ngayi mwali muluwe wa Nyambi mu Ishalela.”

⁹ Nohobene Naamani wayile na bambishi bendi na makoloyi, pe wemanine ha shipana sha litala lya Elisha.

¹⁰ Elisha watumine mukamulimo wendi mu kumutongweza ngayi aye mu kuyowela bikati mutanu na bibili mu mushinzi wa Yondana, pe wulweli wendi ukamana.

¹¹ Ngoboni Naamani wayile na kuvundangila na kwamba ngayi, “Nahanganika ngayi ukatutikila kukwami na kulombela kuli Nyambi ya Ngula, Nyambi yendi na kukwakula liboko lyendi ha libala lya wulweli na kumpolesha.

¹² Pe kami, mishinzi ya Ambana na Fwalipa yakukwetu ku Ndamashika kati kupitakana mishinzi nimwayo yamu Ishalela yifwako ndi? Nka shinga natweshe kuyowelamo pe hinikupola.”

¹³ Bakamilimo bendi bayile kukwendi pe bambile ngayi, “Hekulu shinga muluwe wakutongweza kutenda shuma shashikalu, nka shinga washitenda. Haya shumangani kati ukukanina kuyowela, ngonehe anamba, pe hiwukupola?”

¹⁴ Nohobene Naamani wayile ku Yondana, pe wazubililemo bikati mutanu na bibili ngonehe amufundizizile Elisha muntu wa Nyambi, pe wapolele. Lutu lwendi lwashumine na kupola, lwafwekele ngonehe lutu lwa kanuke wamushe.

¹⁵ Wabokele kuli Elisha na bantu bendi nimwabo pe wambile ngayi, “Haya nikulimuka ngayi kowa nyambi ndele tuhu Nyambi wa Ishalela. Nohobene obe hekulyami, tambula shishemo kukwami.”

¹⁶ Elisha wakumbwile ngayi, “Nikulibeza na Nyambi Wakuyoya, Ou natendelanga milimo kukatambula shishemo nifwako.” Naamani wamukandimikile ngayi ashitambule, ngoboni wakanine.

¹⁷ Nohobene Naamani wambile ngayi, “Ndi ukukana kutambula shishemo shami, pe kati nyintabilishe nishimbe miziho yibili ya limvu ya kushimba bambishi babili nitwale ku munzi, ndaba ku balika hano na kumbili kuka kombelela zinkombela hinge zinkombela za kuhokesha ku nyambi washenge nifwako, ndele tuhu kuli Nyambi ya Ngula.

¹⁸ Nohobene nikalumbeza ngayi Nyambi ya Ngula ukanyatila oho nikashindikiza mwene yami ku litala lya nyambi ya Limoni, nyambi waku Shiliya na kumulemesha. Mwa shikuma Nyambi ya Ngula ukanyatila.”

¹⁹ Elisha ambile ngayi, “Endangaho shiwahe.” Pe Naamani wayile. Oho Naamani endele tuhu mukala wawipi,

²⁰ pe Ngehazi mukamulimo wa Elisha walyambishile niyemwine ngayi, “Hekulyami unalehe Naamani haya na kubula kumuyumbila shuma. Shinga wafwaninine kutambula biya amuyumbilile Kaashiliya. Nikulibeza na Nyambi ya Ngula Wakuyoya, nikumwitukila nikatambule shuma shimo kukwendi.”

²¹ Nohobene wafunzukile kukonka Naamani. Oho Naamani amonene muntu heza na kwituka munyima yendi, washulukile mu koloyi yendi na kumushimbawila. Niho epwile ngayi “Kumwenenga boni?”

²² Ngehazi wakumbwile ngayi, “Byo ngoboni hekulyami unantumu mu kukutongweza ngayi babilolo babili ba ku miluwe ba Nyambi ba mu litunga lya binkanda lya Efulemu banakumu wuluno bene, ukushinga kubapanika makulukazi ahatu a muwayawaya wa shiliva na bivwalo bibili byabiwahe bya kutambashanisha.”

²³ Naamani wakumbwile ngayi, “Hekulu shimba makulukazi mutanu na limo a muwayawaya wa shiliva.” Wamukandamikile pe wamangile shiliva mu zimpamba zibili, wabapanikilezo na bivwalo bibili byabiwahe bya kutambashanisha ku bakamilimo bendi babili bashimbilileko Ngehazi.

²⁴ Oho bakumine ku shinkanda oku kwekalile Elisha, Ngehazi washimbile zimpangwa zibili pe wazitwalile mu litala. Niho abweshele bakamilimo ba Naamani.

²⁵ Wabokele mu litala, pe Elisha wamwipwile ngayi, “Ngehazi unekalanga kuti?” Wakumbwile ngayi, “Hekulu, kowa oku nekalanga.”

²⁶ Ngoboni Elisha wakumbwile ngayi, “Kati moyo kaliha wekala hamo nanobe, oho ashulukanga uya muntu mu koloyi yendi mu ku kushimbawila ndi? Eshe kaliha shikati sha kutambula mali na bivwalo, hinge mikabo ya olive na mafuba a shinyanca, hinge bambelele na zingombe, hinge bakamilimo.

²⁷ Pe haya wulweli wa Naamani ukeza hahobe, pe obe na bazukulyobe bakekala too ngonehe mpemba.” Oho Ngehazi afumine kuli Elisha wekalile na mbumba pe watubile too ngonehe mpemba.