2 Bamyene 4 - Libuka Lya Kuyela

Elisha ukuyavwa mfwile wakuyanda

¹ Mfwile waku muhoko wa bamiluwe ba Nyambi wayile kuli Elisha pe wambile ngayi, “Hekulu, mukokwami wafwa ngonehe unamono, wengile muntu wakutina Nyambi, ngoboni muntu oku akashimbile mukuli wa mali, unezi mu kushimba bana bami babalume babili kwinga bandungo ba kukuliza mukuli wa mukokwami.”

² Elisha wepwile ngayi, “Ukushinga nikutendele bishini? Ntongweze ebye uli nabyo ku munzi?” Wakumbwile ngayi, “Kowa eshe nili nasho ndele tuhu ntesho ya mazi a olive.”

³ Elisha wamutongwezele ngayi, “Yanga ku bandambo bobe ukanyepeko zintesho zazingi za mukungulu ngonehe ukutwesha.

⁴ Niho obe na bana bobe mwingine mu litala na ku shinkako shihala, pe munungwilile mazi mu zintesho. Bengwilenu ntesho na ntesho kumbali oho yenzalakale.”

⁵ Nohobene mbuyama wenginine mu litala lyendi na bana bendi na ku shinkako shihala. Pe washimbile ntesho yayishe ya mazi, pe wanungwilile mazi mu zintesho oho bana bendi bamuletelelengazo.

⁶ Oho benzalishile zintesho nimwazo, mbuyama wepwile ndi niko zishili zintesho zamina. Umo ha bana bendi wakumbwile ngayi, “Eye niyo ya mamanishililo.” Pe mazi alehele kuvwa.

⁷ Mbuyama wabokele kuli muntu wa Nyambi Elisha, ou wamutongwezele ngayi, “Kalandishe mazi, ukayumbe ku mikuli yobe, pe kukekala mali akashala akatwesha kumiyoyesha obe na bana bobe.”

Elisha na mbuyama wakuheta waku Shunema

⁸ Mutena umo Elisha wayile ku Shunema, oku kwekalilenga mbuyama wakuheta. Wamuyumbwile byakulya, kubalika haya na kumbili oho apitilenga iya nzila wayilenga na kulya byakulya ku litala lyendi.

⁹ Mbuyama wambile kuli mukokwendi ngayi, “Nawana ngayi uya muluwe wezanga kuno shikati nimwasho wenga muntu wa kuyela wa Nyambi.

¹⁰ Twinge tuzike kampenci kakashe hayilu ya litala, pe tuyakemo wulili na tebulu na shipona na lambi, pe ukutwesha kwikalangamo shikati nimwasho eshe akwizanga na kutwambwesha.”

¹¹ Mutena umo, Elisha wabokele ku Shunema, pe wakandamine ku kampenci kendi mu kukatala.

¹² Watongwezele mukamulimo wendi Ngehazi kuya na kwihana mbuyama. Oho ezile oku ekalilenga Elisha,

¹³ pe Elisha wambile kuli Ngehazi ngayi, “Mwipule ngayi nikutwesha kumutendela bishini mu kubwesha kuyavwa kwendi oku atufulankananga na kutukobelela. Hamina ukashinga ngayi nimuyile kuli mwene hinge kuli mukulwane wa nzita na kumwambilako mazu amawahe.” Mbuyama wakumbwile ngayi, “Nebye nikulifulankana nifwabyo hakati ka bantu bami nimwabo.”

¹⁴ Elisha wepwile Ngehazi ngayi, “Bishini nikutwesha kumutendela boni?” Ngehazi wakumbwile ngayi, “Owe mbuyama, mwana ufwaye, kami mukokwendi wakulumpalakale.”

¹⁵ Elisha wambile ngayi, “Mutongweze eze kuno.” Mbuyama wezile na kwimana ku shipana,

¹⁶ Pe Elisha wambile kukwendi ngayi, “Ku shikati shino mwakowu ukakwata mwana wa mulume mu maboko wobe.” Wabwalumukile ngayi, “Halee! Hekulyami. Obe unengi muntu wa Nyambi. Hinga unyongeza.”

¹⁷ Ngoboni, ngonehe shiya ambile Elisha, hahepi naku shikati shiya atoyele ku mwaka uyo wabelekele mwana wa mulume.

¹⁸ Oho kwapitakale myaka kanuke wakulile, ha shikati sha kuteza, kanuke wa mulume wayile lumenemene kukonka tatiyendi, ou wekalile mu mfuba na bakakuteza.

¹⁹ Kubazumuka tuhu, ha kukalokela kuli tatiyendi ngayi, “Tawee mutwe wami! Mutwe wami ukukola!” Tatiyendi wambile ku mukamulimo wendi ngayi, “Katula kanuke mutwale kuli mandiyendi.”

²⁰ Mukamulimo wamukatwile wamutwalile kuli mandiyendi, ou wamwambikile ha bilama byendi kutwala naku shikati sha mwana eshe afwile.

²¹ Mbuyama wamutwalile ku kampenci ka Elisha muntu wa Nyambi, wamulangikile ha wulili na ku shinkako, pe wamushiyile.

²² Niho atumine lizu kuli mukokwendi pe wamutongwezele ngayi, “Tuma mukamulimo alete mbongolo. Nikushinga kuya kuli muntu wa Nyambi. Wuluno niboke.”

²³ Mukokwendi wepwile ngayi, “Kati shumangani ukuyila lelo? Niwo kaliha wunengi Mutena Wakukatala hinge ndi wa shimbo sha Ntelamo za ngonda Wamupya.” Wakumbwile ngayi, “Sha shiwahe.”

²⁴ Niho ayakile nyangwa ha mbongolo, pe watongwezele mukamulimo wendi ngayi, “Yendesha mbongolo sha wanguwangu ngo omu akutweshela, pe hinga wenda shashishe hantu nakutongweze.”

²⁵ Nohobene wakatukile, wayile ku Lipili lya Kamela oku ekalilenga Elisha muntu wa Nyambi. Elisha wamumonene oho ushili kwakutali heza, pe wambile kuli mukamulimo wendi Ngehazi ngayi, “Mona mbuyama waku Shunema uyo uli na kwiza.

²⁶ Nyankupila kukwendi ukamwipule ndi uli shiwahe na mukokwendi na mwanendi.” Mbuyama watongwezele Ngehazi ngayi, “Tuli tuhu shiwahe.”

²⁷ Ngoboni oho akumine kuli Elisha wafunkamine hanci kumbili yendi na kumukwata ku mawulu. Ngehazi washingile kumunyakula, ngoboni Elisha wambile ngayi, “Mulehe. Kati ku mona ngayi uli mu makalikiza amanene wufwako ndi? Kami Nyambi ya Ngula kuntongweza shuma shimo haneshe wufwako.”

²⁸ Mbuyama wambile ngayi, “Hekulu na kunyepele mwana ndi? Kati kaliha nakutongwezele ngayi hinga unyaka mila mu livumo ndi?”

²⁹ Elisha wafutukile pe wambile kuli Ngehazi ngayi, “Nyankupisha. Shimba muwana wami uyenga. Hinga wimana na kushangwisha muntu nimwendi uya ukulihangana nendi, kami ndi muntu nimwendi ukukushangwisha hinga wikala na shikati sha kumukumbula. Yanga tuhu na kululumana ku litala pe ukakambike muwana wami hali kanuke.”

³⁰ Mbuyama wambile kuli Elisha ngayi, “Nikulibeza na kupwisha na Nyambi ya Ngula Wakuyoya na kukwobe ngayi kukakushiya nifwako.” Nohobene wubili wabo bayile hamo.

³¹ Ngehazi wayilengaho kumbili na kukambika muwana wa Elisha ha kanuke, ngoboni kaliha kwekalile kwoya hinge shilimukisho sha wumi. Nohobene wabokelemo mu kulihangana na Elisha pe wambile ngayi, “Kanuke kuyoya wufwako.”

³² Oho Elisha akumine, wenginine ninkayendi mu kampenci pe wamonene kanuke hinga atuntumana ha wulili wakufwa.

³³ Washinkile shihala, pe walombelele kuli Nyambi ya Ngula.

³⁴ Niho alalile ha kanuke, wayakile kanwa kendi ha kanwa ka kanuke na meho wendi ha meho a kanuke na maboko wendi ha maboko a kanuke. Oho alalile kutandabalila hali kanuke, lutu lwendi lwatatikile kutukuma.

³⁵ Elisha wapindukile, wendele mu kampenci, pe niho abokele, pe kami watandabalilile ha kanuke. Kanuke wanyahwile bikati mutanu na kabili, pe niho ayimbwile meho.

³⁶ Elisha wehanine Ngehazi pe wamutongwezele ngayi ehane bamanda kanuke. Oho ezilemo wambile kukwendi ngayi, “Mwanobe uno.”

³⁷ Mbuyama wawililile ku mawulu wendi na kukinka lupala lwendi hanci, niho atambwile mwanendi pe wayile.

Bikomokesho bya wubili byamina

³⁸ Ku mwaka kwekalile kapande mu litunga kami Elisha wabokele ku Ngilingale. Oho alongeshelenga likunge lya miluwe, watongwezele mukamulimo wendi ngayi ayake nyungu ha liziko pe abatelekele likampu.

³⁹ Umo wabo wayile ku mafuba na kushinga mashiha. Wawanine mukolobozi wa mutendengungwa pe wabuyileko ntendengungwa zazingizingi ngo kutwesha kwendi. Wezile nazo nakuziketwela mu mashiha na kubula kulimuka ngayi byengile bishini.

⁴⁰ Likampu balitapilile balume ngayi balye, ngoboni wanguwangu oho bayeleleko bakalokelele kuli Elisha ngayi, “Obe muntu wa Nyambi, binengi bya kufwana.” Pe kaliha babilile.

⁴¹ Elisha wabatongwezele ngayi, “Letenuko muhunga.” Niho ayakile muhunga mu nyungu, pe Elisha wambile ngayi, “Bakampwilenumo balye.” Haya kowa shuma sha kufwana shiliko.

⁴² Shikati shamina, muluwe wafumine kuli Mbaalu Shalisha, waletelele Elisha muntu wa Nyambi mipumpa ya mankende makumi abili yavubiwile ha ncongamincale ya muhalule ya kutatika kuteza ha mwaka na mapumpwa a kubombola a mbuto. Elisha watongwezele mukamulimo wendi ngayi, panika ku likunge lya bamiluwe balye,

⁴³ ngoboni wakumbwile ngayi “Kati ukuhanganika ngayi ebye bikukonkana ku bantu ba mwanda umo ndi?” Elisha wakumbwile ngayi, “Bapanikebyo balye, ndaba Nyambi ya Ngula ukwamba ngayi bakalya pe bikashalaho bimo.”

⁴⁴ Nohobene mukamulimo watulile byakulya kumbili yabo, pe ngonehe ambile Nyambi ya Ngula, nimwabo balile pe byashalileho bimo.