2 Bamyene 3 - Libuka Lya Kuyela

Nzita mukati ka Ishalela na Mowambi

¹ Mu mwaka wawulikumi na mutanu na yihatu wakulela kwa Mwene Yehoshafwati wamu Yunda. Yeholamu mwana Ahambu wa mulume wengile mwene wamu Ishalela, pe walelele mu Shamaliya myaka likumi na yibili.

² Wabipishile ku meho a Nyambi ya Ngula ngoboni kaliha wengile wamubi shikuma ngonehe tatiyendi hinge mandiyendi Yezembelo, ndaba wazulile mpangwa ya limanya iya abazile tatiyendi ya kulemeshela Mbaalu.

³ Ngoboni ngonehe shiya ekalile Mwene Yelombowami mwana Nembati wa mulume, watwaminine Ishalela mu wubi na kubula kulehasho.

⁴ Mwene Mesha waku Mowambi walelelenga bambelele, pe watwalilenga zintupu kuli mwene wa Ishalela za bana babambelele 100,000 ha mwaka na mwaka na wushako waha bikungwe 100,000.

⁵ Ngoboni oho Mwene Ahambu wamu Ishalela afwile, Mesha mwene waku Mowambi walehele kutwala zintupu ku Ishalela.

⁶ Hohobene Mwene Yeholamu wafumine ku Shamaliya pe walobele bakanzita bendi nimwabo.

⁷ Watumine lizu kuli Mwene Yehoshafwati waku Yunda ngayi, “Mwene waku Mowambi unamfutulukili, kati tukalifungila nobe hamo mu nzita tukamulwishe ndi?” Mwene Yehoshafwati wakumbwile ngayi, “Ee, nika kuyavwa nili ku maboko wobe, hamo na bantu bami na bambishi bami.

⁸ Nzila ngani eye tukapita ha kuya mu kulwa?” Yolamu wakumbwile ngayi, “Tukapita nzila yayitali yapita mu libelelengwa lya Endoma.”

⁹ Nohobene Mwene Yolamu wamu Ishalela na bamyene bamu Yunda hamo na mwene wamu Endoma bakatukile. Oho bendele matena mutanu na abili, mema wabo amanine, kwabulile mema akushalaho a bantu hinge a bimuna.

¹⁰ Mwene Yolamu walokomokele ngayi, “Twalifwilakale! Nyambi ya Ngula unatuyaka wuhatu wetu ku maboko a mwene waku Mowambi.”

¹¹ Mwene Yehoshafwati wepwile ngayi, “Kati kowa muluwe wa Nyambi kuno oku tukutwesha kwipwiziza kuli Nyambi ya Ngula ndi?” Shilolo wa bakanzita ba Mwene Yolamu wakumbwile ngayi, “Elisha mwana Shafwati wekala kuno. Wengile ncwana mumi wa muluwe Eliya.”

¹² Mwene Yehoshafwati wambile ngayi, “Nengi muluwe ou wekala na lizu lya Nyambi ya Ngula wa kupwisha.” Nohobene bamyene mu wuhatu wabo bayile kuli Elisha.

¹³ Elisha wambile kuli Mwene wa Ishalela ngayi, “Kati shumangani nika kuyavwila? Yanga ukepwizize ku baya miluwe kuya bepwizizilenga batatiyobe na bamandiyobe.” Yolama wakumbwile ngayi, “Byo. Unengi Nyambi ya Ngula Ou unatuyaka etu bamyene mu wuhatu wetu ku maboko a mwene waku Mowambi.”

¹⁴ Elisha wakumbwile ngayi, “Nikulibeza na Nyambi wa Makunge, Ou natendelanga milimo ngayi, sha kubula ou watenda nendi shikonzi Mwene Yehoshafwati wamu Yunda, ou nikalemeeke shinga sha kutenda na nenu nifwasho.

¹⁵ Haya ndetelenu mukakumbeta kambuli.” Oho mukakumbeta ambetelenga kambuli kendi, ngovu za Nyambi ya Ngula zezile hali Elisha,

¹⁶ pe wambile ngayi, “Eshe nisho akwamba Nyambi ya Ngula ngayi, kabenu malomba mu mbuwa yino.

¹⁷ Hinge ndi kukamona mvula mufwako hinge mpepo, mbuwa yikenzala na mema, pe enu na zingombe zenu, hamo na bimuna byenu bikekala na mema amengi akunwa.”

¹⁸ Ngoboni shuma eshe shashiboto ku shitenda kuli Nyambi ya Ngula, kami ukamipana ngovu ha Bamowambi.

¹⁹ Mukakona zinkena zabo zaziwahe za bipata, mukatema mitondo nimwayo yayiwahe ya mikabo yabo nimwayo, mukabuwulula tuheloke twabo nimwato na kulobesha mafuba wabo nimwawo a wilo na kuwafwika na mamanya.

²⁰ Oho kwashile lumenemene, ha shikati sha nkombela yaku lumenemene, mema ezile ku Endoma, pe kwekalile mema mu litunga.

²¹ Oho Bamowambi bayuvwile ngayi bamyene bahatu banezi mu kubalwisha, balume nimwabo ba kukuma ha shikati sha kulwa, kubalika ku wamukulwane kuleta naku wa kanuke, behaniwile pe batulilile ku nginza.

²² Oho bapindukile lumenemene, mutena wabyaziminine ha mema. Bamowambi kukwabo bamonene mema ngengu ngonehe mukeza.

²³ Balikomokelele ngayi, “Monenu mukeza. Bipani bihatu bya bakanzita ba bamalamo kampe bafwanina kulilwisha mukati kabo na kuliziha umo na wamina. Tokonoko tuye tukapukule munkungwa wa Bamowambi.”

²⁴ Ngoboni oho bakumine ku munkungwa, Baishalela babalwishile na kubapalanganisha. Baishalela bayile na kutanda Bamowambi na kubaziha,

²⁵ na kunongesha minzi yabo. Oho bapitile ku mafuba a wilo, Kaishalela na Kaishalela wayumbilile limanya mu mfuba hantu noho mafuba nimwawo afwikiwile, kami babuwulwile tuheloke twa mema na kutema bitondo bya mikabo. Ha kumanisha kwashalile tuhu lukena lwalunene lwa Kili Haleshi, pe bakakubebula baluzingulukile na kushinga kululobesha.

²⁶ Oho mwene waku Mowambi amonene ngayi nzita yatakalalakale, washimbile myanda mutanu na yibili ya bakanzita ba mikwale na kwezeka kulishininika mukati ka mihoko ya bamalamo bendi kutinina kuli Mwene waku Endoma ngoboni wakwangile.

²⁷ Nohobene washimbile mwanendi wa mulume wa mweli, ou wafwaninine kukamushwana kwinga mwene, pe wamukombelele ha kembi ka lukena kwinga nkombela ya nyambi wa Mowambi. Baishalela batinine niho bashintulukile, pe babokele ku litunga lyabo.