2 Bamyene 25 - Libuka Lya Kuyela

¹ Nembukandineza wezile na bakanzita bendi nimwabo. Walwishile Yelushalema ha mutena wawulikumi mu ngonda wawulikumi mu mwaka wa mutanu na yinaa wakushwana kwa Zendekiya. Pe batendele munkungwa ha munkanda wa munzi, batendele kembi kazingulukile kuyaka Yelushalema mukati.

² Yelushalema wekalile mukati ka kembi hantu mu mwaka wawulikumi na umo wakushwana kwa mwene Zendekiya.

³ Ha mutena wa mutanu na anaa mu ngonda wawunaa wa kulela kwa Zendekiya oho kwekalile kapande kakanene oho bantu babulile byakulya.

⁴ Kembi ka lukena kawile ku mbalila yimo, Bakambambiloniya nibo bayakile lukena mukati ngoboni Bakanzita bamu Yelushalema bashilile wushiku. Batutikilile ku shipana sha ku mfuba ya mwene. Bapitile na nzila ya shipana sha mukati ka twimbi tubili, pe batinine na kuya ku mbuwa ya Yondana.

⁵ Ngoboni bakanzita ba Bakambambiloniya batandile mwene Zendekiya, bakamukwatilile ku zimbuwa za ku Yeliko, kami bantu bendi nimwabo bamushiyile na kupanzana.

⁶ Bamutwalile kuli mwene wamu Mbambiloni ou wekalile ku Limbula, pe niye wakamuyatile.

⁷ Bana ba Zendekiya babalume babazihile oku tatiyabo hamonako, pe Nembukandineza watibile meho a Zendekiya niho bamutwalile ku Mbambiloni.

Yelushalema ukulobeshiwa

⁸ Ha mutena wa mutanu na abili mu ngonda wa mutanu mu mwaka wawu 19 wakulela kwa mwene Nembukandineza waku Mbambiloni, Nembuzalandani mukakubela wa mwene na mukulwane wa bakanzita wenginine mu Yelushalema.

⁹ Wahokeshele litala lya Nyambi ya Ngula na lukena lwa wene na matala nimwawo amu Yelushalema. Walobeshele matala nimwawo amanene mu lukena.

¹⁰ Bakanzita ba ku Mbambiloniya banyemwine mamota a Yelushalema ku zimbalila nimwazo.

¹¹ Nembuzalandani washimbile bantu nimwabo baya bashalile mu Yelushalema, balume bawutungu na baya balishangwile na kubatwala kuli mwene waku Mbambiloni mu wuntapwa.

¹² Ngoboni Nembuzalandani washiyile bancepwe bamo mu Yunda baya babulile byuma ngayi batendenga milimo mu mafuba a shinyanca.

¹³ Bakambambiloniya bapokwezele zimpangwa na tutambo twa mawili bya lubemba biya byekalile mu litala lya Nyambi ya Ngula, hamo na Tanki yayinene ya lubemba iya yekalilenga mu litala lya Nyambi ya Ngula pe batwalile lubemba ku Mbambiloni.

¹⁴ Kami bashimbile mafwosholo na binzoyo bya kukundwisha mutoko ha kaala. Bashimbile na zimanya kwa kupatika mimuni na zindonga na nimwabyo biya baliyavwishilenga ha kukombelela mu litala lya Nyambi.

¹⁵ Bashimbile shuma nimwasho shatendiwile ha ngolinde na shiliva na binzoyo bya kukalila mundilo na bya kuhokeshela incence.

¹⁶ Bakwangile kulimuka wulemu wa lubemba lwa zimpangwa zibili na katambo ka mawili na Tanki ya mema ndaba byengile byabilemu shikuma. Ebye byuma wabitendele mwene Sholomoni kwinga bishebezesho bya mu Litala Lya Nyambi ya Ngula.

¹⁷ Zimpangwa zibili zengile hamo. Mpangwa na mpangwa yengile mamita 8 mumwimo na mitwe yazo yengile mamita 1.3. Mitwe ya ziya zimpangwa bayizingwilishile na bifwekesha bya manzenze bya lubemba bya kutenda na manono.

Bayunda ba kutwaliwa ku Mbambiloni

¹⁸ Nembuzalandani mukulwane wa byamanga, wakwatile Shelaya mukankombela wa mukulwane na Zefwaniya mukankombela wakumulundamina na babilolo bamina bahatu ba kushipana sha mwene.

¹⁹ Mu lukena washimbilemo mulume wengile mukakwendesha bakanzita na balume mutanu bakakubela mwene. Niho ashimbile na mukakutikita wa mukulwane wa bakanzita, ou wakowezelenga zibuka za mazina a bakanzita na balume 60.

²⁰ Nembuzalandani mukulwane wa byamanga, wabatwalile kuli mwene waku Mbambiloni ou wekalile ku lukena lwa Limbula.

²¹ Kami kuyo ku Limbula mu litunga lya Hamati, mwene waku Mbambiloni wabazihile nimwabo. Bayunda nisho bafumishiwile mu litunga lyabo na kutwaliwa mu wuntapwa.

Ngendaliya Kalela wamu Yunda

²² Mwene Nembukandineza mwene waku Mbambiloni wahatile Ngendaliya mwana Ahikama muzukulya Shafwani kwinga kalela wa bantu baya ashiyile mu Yunda.

²³ Oho bakulwane ba bakanzita na bantu babo nimwabo balimukile ngayi mwene waku Mbambiloni unahata Ngendaliya kwinga kalela, bayile mu kumumona ku Mizipa. Aba bengile ba Ishimaele mwana Netaniya wa mulume na Yohanani mwana Kaleya na Shelaya mwana Tenihumeti, ba Netofwa na Yazaniya mwana Maaka na bantu babo nimwabo.

²⁴ Ngendaliya wabezele kukwabo na bantu babo na kwamba ngayi, “Hinga mutina babilolo ba Bakambambiloniya. Yikalenu mu litunga lino na kutendela milimo mwene wa Mbambiloniya pe mukekala shiwahe.”

²⁵ Ngoboni mu ngonda wa mutanu na zibili wa mwaka uya bene, Ishimaele mwana Netaniya muzukulya Elishama, waku mushobo wa ba lupashi lwa wene, wayile ku mizipa na balume likumi, balwishile Ngendaliya. Bamuzihile kami bazihile bantu ba Yunda na Bakambambiloniya aba bekalile nendi kuyo.

²⁶ Niho Baishalela, ba kuheta na ba kushepwa nimwabo hamo na babilolo banzita, bakatukile na kuya ku Engepita, ndaba batininenga ba Mbambiloniya.

Yehoyakini ukufumishiwa mu Tolongo

²⁷ Mu mwaka uya oho Ebile Melondaki engile mwene wamu Mbambiloniya, waholwele nceshe kuli mwene Yehoyakini wamu Yunda ha kumushobolola mu tolongo. Eshe shamonekele ha mutena wawu 27 wa ngonda wawulikumi na zibili wa mwaka wawu 37 kufuma haya Yehoyakini atwaliwile mu wuntapwa.

²⁸ Ebile Melondaki wamwikalishile na nceshe, wamupanikile shitapilo shashinene sha maleema kupitakana bamyene bamina aba ekalile nabo mu wuntapwa mu Mbambiloniya.

²⁹ Nohobene Yehoyakini wetabilishiwile kuvwula bivwalo bya mu tolongo pe wavwalile byashenge na kulyanga kutebulu ya mwene kutwala ku kufwa kwendi.

³⁰ Mutena na mutena mu kuyoya kwendi nimwako mwene wamupanikilenga mali a kuliyavwa nawo.