2 Bamyene 24 - Libuka Lya Kuyela

¹ Oho Yehoyakimu hinga enga mwene, Mwene Nembukandineza wamu Mbambiloniya, walwishile Yunda, kami myaka yihatu Yehoyakimu wakandikiziwile kulishisha kukulela kwendi, niho amufutulukilile.

² Nyambi ya Ngula watumine matanga a banzita bapakatile bilwisho ba ku Mbambiloniya naku Baashiliya naku Bamowambi naku Baamoni mu kulwisha Yehoyakimu kunongesha Yunda, ngonehe ambile Nyambi ya Ngula muli bakamilimo bendi bamiluwe.

³ Eshe shatendiwile kuya na kufundiziza kwa Nyambi ya Ngula, ngayi mwanga atande bantu ba Yunda ku meho wendi, ndaba ya wubi nimwawo uya atendele Mwene Manashe,

⁴ kami shinene ndaba ya kuyita mukeza nimwawo wa bantu baya bakubula mulandu. Nohobene ndaba wenzalishile Yelushalema na mukeza wa bantu bakubula mulandu, Nyambi ya Ngula wakanine kuyata Manashe ha shiyo.

⁵ Byuma nimwabyo byamina biya atendele Yehoyakimu byatikitiwile mu likota lya Bamyene bamu Yunda.

⁶ Yehoyakimu wafwile, pe mwanendi wa mulume Yehoyakini wamushwanine kwinga mwene.

⁷ Hinga atangile kami mwene wamu Engepita na nzita yendi kukatuka mu litunga lyendi kuya na kulwa, ndaba mwene waku Mbambiloniya wakomene kukwabo litunga nimwalyo lya Engepita ku balika ku mushinzi wa Yufuleti ku nginza yaku ncelele ya litunga lya Engepita.

Mwene Yehoyakini wamu Yunda

⁸ Yehoyakini wengile mwene wamu Yunda oho ekalile na myaka 18, pe walelele mu Yelushalema zingonda zihatu. Mandiyendi wengile Nehushita mwana Elinatani waku Yelushalema.

⁹ Yehoyakini wabipishilile Nyambi ya Ngula kukonka nzila ya tatiyendi.

¹⁰ Shengile shikati sha kulela kwendi shiya mwene Nembukandineza akatwile nzita ya mbambiloniya, kuya na kulwisha lukena lwa Yelushalema na kuluzinguluka.

¹¹ Ha shikati sha kuzinguluka, Nembukandineza mwene waku Mbambiloni wezile ku Yelushalema,

¹² pe Yehoyakini mwene wamu Yunda hamo na mandiyendi na bana bendi babalume na babilolo bendi bamu musheke balishishile ku Bambambiloni. Mu mwaka wa mutanu na yihatu ya kulela kwa Nembukandineza, watwalile Yehoyakini mu wuntapwa,

¹³ kami watwalile wuheti nimwawo wamu litala lya Nyambi namu musheke ku Mbambiloniya. Ngonehe shiya ambile Nyambi ya Ngula, Nembukandineza ukapokozola byuma nimwabyo bya kukwatila bya ngolinde ebye atendele Sholomoni mwene wa Ishalela bya ku tendesha mu litala lya Nyambi.

¹⁴ Nembukandineza watwalile bantu bamu Yelushalema na bana ba bamyene babalume na naba babambuyama nimwabo, hamo na bamanono na bamfunzi nimwabo mukwinga bantapwa, bengile 10,000. Bashiyile tuhu bantu ba kushepwa shikuma mu Yunda.

¹⁵ Nembukandineza watwalile Yehoyakini ku Mbambiloniya, hamo na manda Yehoyakini na bakazendi na babilolo bendi na bakakutwaminina bantu bamu Yelushalema mukwinga bantapwa.

¹⁶ Nembukandineza watwalile bantu nimwabo ku Mbambiloniya, bengile 7,000 na 1,000 bakamilimo na bamanono, kuyakako na bamfunzi, nimwabo bengile balume ba kukalamana ba ku fwanina mu nzita.

¹⁷ Nembukandineza mwene waku Mbambiloni wakwatile Mataniya kanyantu ka Yehoyakini kwinga mwene wamu Yunda, pe wafutwile lizina lyendi ngayi Zendekiya.

Mwene Zendekiya wamu Yunda

¹⁸ Zendekiya wekalile na myaka 21 oho engile mwene wamu Yunda pe walelele mu Yelushalema myaka likumi na umo. Mandiyendi wengile Hamutali mwana Yelemiya wa mbuyama waku munzi wa Limbina.

¹⁹ Mwene Zendekiya wabipishilile Nyambi ya Ngula ngonehe atendele mwene Yehoyakimu.

Kuwa kwa Yelushalema

²⁰ Nyambi ya Ngula wapilaminine bantu bamu Yelushalema namu Yunda, nisho shaleteshele ngayi abatande ku meho wendi. Zendekiya wafutukilile mwene Nembukandineza waku Mbambiloni.