2 Bamyene 23 - Libuka Lya Kuyela

Yoshiya ukuleha kulemesha banyambi bowa

¹ Mwene Yoshiya wehanine bakakutwaminina nimwabo bamu Yunda hamo na Yelushalema.

² Mwene wayile nabo nimwabo ku litala lya Nyambi ya Ngula, hamo na bakankombela na miluwe ba Nyambi na bantu nimwabo bamu Yelushalema, bakulwane na batwanuke. Mwene walabile ku meho wabo nimwabo mazu nimwawo amu libuka lya Kulimama elye lyawaniwile mu litala lya Nyambi ya Ngula na kukatula ku lizu.

³ Wemanine ku mpangwa ya wene, pe walimamine na Nyambi ya Ngula kumwombatala na kulama mazu wendi na ndayano zendi na mutima wendi nimwabo na moyo na kwenda mu ntambo zendi na kutenda byuma nimwabyo ngo biya byatikitiwile mu libuka. Bantu nimwabo bakulupishile kulama kulimama.

⁴ Niho Hoshiya atongwezele Mukankombela wa mukulwane Hilikiya na bakankombela ba wubili kukwendi na bakakulama ha mulimo waku menginino a litala lya Nyambi ya Ngula kufumisha byuma nimwabyo mu litala lya Nyambi ebye batendeshelenga ha kulemesha Mbaalu na nyambi wa mbuyama Ashela nanebye bya nyenye. Mwene wahokeshelele byuma ebye nimwabyo ha munkanda wa Yelushalema kwakwipi na mukulo wa Kindiloni, kami niho atwalile mutoko wabyo ku Mbetele.

⁵ Yoshiya wafumishile bakankombela ku milimo yabo ya kukombelela, baya bayakile bamyene bamu Yunda, kuhokesha incence ha binkanda bya bakakulemesha banyambi bowa, mu zinkena za Yunda namu zimbalila za kwakwipi na Yelushalema. Nimwabo bakankombela aba bakombelelenga zinkombela kuli Mbaalu naku mutena naku ngonda naku bana batulwe naku nyenye.

⁶ Watungwile mpangwa ya nyambi wa mbuyama Ashela mu litala lya Nyambi wayitutwishile ha munkanda wa lukena ku mukulo wa Kashinzi ka Kindiloni, wayihokeshele, pe wayitile mutoko na kuwu fukumwina ha binzimbi bya bantu bowa.

⁷ Washandwile matala anaba balwiholwiho babalume bakakutenda kaloombe mu litala lya Nyambi. Kuyo niko batungililenga bambuyama bikobelo byabitali baliyavwishilenga ha kulemesha nyambi wa mbuyama Ashela.

⁸ Waletele bakankombela nimwabo ku Yelushalema aba bekalilenga mu zinkena zamu Yunda namu litunga nimwalyo, wazilulwile myanya yaha binkanda ya kulemeshela banyambi bowa oku bahokeshelenga incence, ku balika ku Ngemba kukuma naku Mbelishemba. Kami wabunkwile myanya yakulemeshela banyambi bowa kwakwipi na lipangati atendele Yoshuwa kalela wa lukena, elye lyekalilenga ku shimoho sha lipangati lyalinene, oho bantu bakwingina mu lukena.

⁹ Bakankombela kaliha betabilishile kutenda mulimo mu litala lya Nyambi mu Yelushalema, ngoboni batweshele tuhu kulya mankende a kubula mumena awa bawahishile baminabo bakankombela.

¹⁰ Mwene Yohisha kami wazilulwile Tofweta, mwanya wa bakakulemesha banyambi bowa wekalile mu mukulo wa Hinoma, ngayi mwanga kubule muntu wakukombelela mwanendi wa mulume hinge wa mbuyama kwinga nkombela ya kuhokesha kuli nyambi Moleki.

¹¹ Kami wafumishile bifwekesha bya bambishi baha munzi baya bafungwilile bamyene bamu Yunda mu kulemesha mutena na kuhokesha makoloyi batendeshelenga mu kulemesha, ebye bya yakiwilenga mu shikwinji sha litala lya Nyambi, hahepi na lipangati kami kaliha kwakutali na tumpenci omwe mwekalilenga Natani Meleki, shilolo wa mukulwane.

¹² Mwene Yoshiya wabunkwile tuula tuya bazikile bamyene bamu Yunda hayilu ya musheke, hayilu ya tumpenci omwe mwekalilenga mwene Ahazi. Wabunkwile kami tuula tuya emikile Mwene Manashe mu bipango bibili bya litala lya Nyambi, wanyemwine tuula na kutupabozola, pe wabiyumbile ku Mukulo wa Kindiloni.

¹³ Yoshiya wazilulwile tuula tuya azikile Sholomoni mwene wa Ishalela ku mushamuko wa Yelushalema, ku mabukubuku a lipili lya mitondo ya Olive ha kulemeshela tunankishi twa wunyengwe twa Ashitaloti nyambi wa mbuyama waku Shindoni na kemoshi nyambi waku Mowambi na Moleki nyambi waku Amoni.

¹⁴ Mwene Yoshiya wapabwele zimpangwa za mamanya hanihani, kuketola shifwekesha sha shizila shafunguliwile kuli nyambi wa mbuyama Ashela na hanci aha byemaninenga wafwikileho na bifupa bya bantu.

¹⁵ Yoshiya wabunkwile kami mwanya wakulemeshela mu Mbetele, owe azikile Mwene Yelombowami mwana Nembati, ou washanwishile Ishalela mu wubi. Yoshiya wanyemwine kaala na kupabola mamanya wako hanihani, pe wabitwile muhunga, kami wahokeshele mpangwa ya shifwekesha sha nyambi wa mbuyama Ashela.

¹⁶ Yoshiya ashengezelele pe wamonene binzimbi ha lipili, washimbile bifupa byabo na kubihokeshela ha kaala. Mu nzila eye wazulwile kaala, kutenda ebye alubulwile muluwe wa Nyambi ya Ngula myaka ya kunyima oho kwekalile shimbo oho mwene Yelombowami emanine ku kaala. Mwene Yoshiya washengezelele pe wamonene shinzimbi sha muluwe wa Nyambi ou wabilubwilile.

¹⁷ Mwene wepwile ngayi eshe shinzimbi sha yani? Bantu ba ku Mbetele bakumbwile ngayi, “Nisho shinzimbi sha muntu wa Nyambi uya wafumine ku Yunda pe walubulwile byuma ebye unatende kukano kaala.

¹⁸ Yoshiya wambile ngayi, shishiyenu ngonehe shili, bifupa hinga bifumishiwa.” Nohobene bifupa kaliha byafumishiwile, hamo na bifupa bya muluwe waku Shamaliya.

¹⁹ Mwene Yoshiya wabunkwile myanya nimwayo ya bakakulemesha banyambi bowa mu minzi nimwayo ya Ishalela eye bazikilenga bamyene bamu Ishalela, baya bashonkomwene wukali wa Nyambi ya Ngula. Wabunkwile tula nimwato ngonehe shiya atendele mu Mbetele.

²⁰ Wazihile bakankombela nimwabo bakakulemesha banyambi bowa mu myanya yaha binkanda oku balemeshelenga, kami wahokeshele bifupa bya bantu ha binkanda nimwabyo. Niho abokele ku Yelushalema.

Mwene Yoshiya ukupinga Shimbo sha Kupitilila

²¹ Mwene Yoshiya watongwezele bantu kupinga Shimbo sha Kupitilila mu kulemeeka Nyambi ya Ngula Nyambi yabo, ngonehe shatikitiwa mu Libuka lya Kulimama.

²² Hinga kwatanga kwikala Shimbo sha Kupitilila sha kufweka ngonehe eshe, kupingiwa ku bamyene bamu Ishalela hinge bamu Yunda, kufuma kushikale oho bakakuyata balelelenga Ishalela.

²³ Ngoboni mu mwaka wa 18 wakulela kwa Yoshiya, Shimbo sha Kupitilila shapingiwile mu Yelushalema.

²⁴ Ha kushumisha mazu atikitiwile mu Libuka lya Mukankombela wa mukulwane Hilikiya mu Litala lya Nyambi, Mwene Yoshiya watandile mu Yelushalema na yunda nimwabo bakakuvumbula bafu na balozi na bakakwawula nimwabo na banyambi bowa bamu matala na tunankishi na byuma nimwabyo bya kulemesha banyambi bowa.

²⁵ Hinga kwatanga kushikale mwene wakumufweka, ou walemeshelenga Nyambi ya Ngula na mutima wendi nimwawo na ngana zendi nimwazo na nyala zendi nimwazo na kwombatala mazu a moshesha, hinga kwatanga kwikalako mwene wakumufweka.

²⁶ Ngoboni wukali wa Nyambi ya Ngula wawunene wakulwisha Yunda kaliha watulile ndaba yanebye atendele Mwene Manashe ha kumushonkomona.

²⁷ Nyambi ya Ngula wambile ngayi, “Nikatenda kuli Yunda ngonehe ebye natendele kuli Ishalela. Nikatanda bantu ba Yunda ku meho wami, kami nikakana Yelushalema, lukena nahatile, kami litala lya Nyambi, mwanya uya natoyele ngayi nikayakamo lizina lyami na kundemeshelamo.”

Mamaninino a kulela kwa Yoshiya

²⁸ Byuma byamina nimwabyo biya atendele Mwene Yoshiya byatikitiwile mu likota lya Bamyene bamu Yunda.

²⁹ Oho Yoshiya engile mwene, mwene Neko wamu Engepita wakatwile nzita yendi kuya ku Mushinzi wa Yufuleti mu kuyavwa mwene waku Ashiliya. Mwene Yoshiya wezekele kukanisha nzita ya Baengepita ku Mengindo, pe wazihiwile mu nzita.

³⁰ Babilolo bendi bayakile mutuntu wendi mu koloyi pe bamubweshele ku Yelushalema, oku afundiwile mu bizino bya wene. Bantu ba Yunda bahatile Yehoyahazi mwana Yoshiya wa mulume, pe bamuwabishile mazi kwinga mwene.

Mwene Yowahazi wamu Yunda

³¹ Yehoyahazi wekalile na myaka makumi abili na yihatu oho engile mwene wamu Yunda, pe walelele mu Yelushalema zingonda zihatu. Mandiyendi wengile Hamutali mwana Yelemiya waku munzi wa Limbina.

³² Wabipishilile Nyambi ya Ngula, kukonka nzila yaba nkaka zendi.

³³ Kulela kwendi kwamanine oho Mwene Neko wamu Engepita amutwalile mu wuntapwa mu Limbula, mu litunga lya Hamati. Niho ayumbishile Yunda makilongilamu 3,400 a shiliva na makilongilamu 34 a ngolinde kwinga bya kutupula.

³⁴ Mwene Neko wakwatile mwana Yoshiya wa mulume Eliyakimu kwinga mwene wamu Yunda ku shwana Yoshiya, pe wafutwile lizina lyendi kwinga Yehoyakimu. Yehoyahazi watwaliwile ku Engepita kuli Mwene Neko, pe kuyo niko akafwililile.

Mwene Yehoyakimu wamu Yunda

³⁵ Mwene Yehoyakimu wakungwishile mutelo ku bantu mu kufwanikiza ku wuheti wabo, ngayi mwanga bakatule kumukungwila ou bashingile kuyumba kuli mwene waku Engepita.

³⁶ Yehoyakimu wekalile na myaka 25 oho engile mwene wamu Yunda, pe walelele mu Yelushalema myaka likumi na umo. Mandiyendi wengile Zembunda mwana Pendaya waku munzi wa Luma.

³⁷ Yehoyakimu wabipishilile Nyambi ya Ngula, ha kukonka nzila ya bankakazendi.