2 Bamyene 22 - Libuka Lya Kuyela

Mwene Yoshiya wamu Yunda

¹ Yoshiya wekalile na myaka mutanu na yihatu oho engile mwene wamu Yunda, walelele mu Yelushalema myaka 31. Mandiyendi wengile Yendinda, mwana Andayiya waku munzi wa Mbozika.

² Yoshiya watendele byuma byabiwahe byawahilishile Nyambi ya Ngula. Wakonkele nzila ya nkakayendi Ndavita, hakwombatala mazu a Nyambi bikati nimwabyo.

Libuka lya mazu a Nyambi likuwaniwa

³ Mu mwaka wawulikumi na mutanu wakulela kwendi, Mwene Yoshiya watumine Shafwani mukakutikita wamu shinzanza, mwana Azaliya wa mulume muzukulya Meshulama, ku litala lya Nyambi ya Ngula ngayi,

⁴ “Yanga kuli mukankombela wa mukulwane Hilikiya, akakutongweze wingi wa mali analetiwi mu Litala lya Nyambi ya Ngula, awa banakungwishi bakankombela baha mulimo waku menginino a litala lya Nyambi ku bantu.

⁵ Mu mutongweze kupana mali ku balume aba benga bakakwendesha bya kutendulwisha litala lya Nyambi. Mwanga bayumbe bakakutenda mulimo.

⁶ Bakayane bambazi na bakakuzika matala na bakakumangula mamanya na bakakulanda maleenge na mamanya akuliyavwisha ha kutendulula Litala lya Nyambi.

⁷ Bakakwendesha mulimo bengile bakulunga shikuma, nohobene kaliha bashingilenga kubepula ha kulaba bya mali amu mfuma.”

⁸ Mukakutikita Shafwani watwalile lizu lya mwene kuli Hilikiya, pe Hilikiya wamutongwezele ngayi unawana libuka lya mazu a Nyambi mu litala lya Nyambi ya Ngula. Hilikiya wamupanine libuka pe Shafwani walilabile.

⁹ Niho mukakutikita Shafwani wabokele kuli mwene na ku shimika ngayi, “Bakamilimo bobe banashimbi mali aya ekalile mu litala lya Nyambi kami banawapana ku bakulwane baka kutendulula.

¹⁰ Hilikiya napana lino libuka, pe walilabilile mwene naku katula ku lizu.”

¹¹ Oho mwene ayuvwile ebye bya labiwilenga mu libuka, pe watabwele bivwalo byendi na kuyena.

¹² Watumine Hilikiya na Ahikama mwana Shafwani wa mulume na Akimbo mwana Mikaya wa mulume na Shafwani mukakutikita wamu shinzanza na Ashaya, shikombwa wa mwene, pe wabalayile ngayi,

¹³ “Yenunga mukanyipwizizile kuli Nyambi ya Ngula ha byami naha bya bantu nimwabo bamu Yunda hanebye byatikitiwile mu nelye libuka. Nyambi ya Ngula unatupilamini, ndaba bankakazetu kaliha bombatalile ebye byatikitiwile mu nelye libuka ngayi bitendiwe.”

¹⁴ Hilikiya na Ahikama na Akimbo na Shafwani na Ashaya bayile mukwipwiziza kuli muluwe wa Nyambi wa Mbuyama lizina lyendi Hulinda, mukaza Shaluma, wekalile ku mbalila yayipya ya Yelushalema. Mukokwendi Shaluma, mwana Tikiva muzukulya Halihashi, wengile mukulwane waku bivwalo bya mu litala lya Nyambi. Bantumwana batontwelelele muluwe Hulinda ebye byamonekele,

¹⁵ pe muluwe wabatongwezele kuboka kuli mwene mu kumutongweza,

¹⁶ Elye lizu lya Nyambi ya Ngula likwamba ngayi, “Nikashushula Yelushalema na bantu nimwabo, ngonehe shatikitiwile mu libuka liya alaba mwene wamu Yunda.

¹⁷ Banankana kami banakombelele zinkombela ku banyambi bowa, pe haya banashonkomono wukali wami hanebye nimwabyo banatende. Nakalihi kami wukali wami kukatulumana ufwako.

¹⁸ Ngoboni hali mwene wa Yunda ou namitumu kwiza mukwipwiziza kuli Nyambi ya Ngula Nyambi wa Ishalela, nayuvwu shiwahe ebye byatikitiwa mu libuka,

¹⁹ ndaba watenguluka na kulilimbwilisha kukwami, watabozola bivwalo byobe na kulila oho wa yuvwa eshe nafumbilile Yelushalema na bantu bamo ngayi bakalobeshiwe na kukutiwa. Ngoboni haya nayuvwu malombelo wobe,

²⁰ pe kashushwilo kaya natoyelele Yelushalema kukeza kafwako ndele unafu. Niketabila ngayi ukafwe mu ku mwena, pe meho wobe kukamona byabibi ebye nikaleta ha mwanya ou ufwako.” Niho bantu batwalilile mwene Yoshiya elye lizu.