2 Bamyene 21 - Libuka Lya Kuyela

Mwene Manashe wamu Yunda

¹ Manashe wekalile na myaka likumi na yibili oho ashwanine wene wamu Yunda, pe walelele mu Yelushalema myaka 55. Mandiyendi wengile Hefwizimba.

² Manashe wabipishilile Nyambi ya Ngula na kukonka biheka bya wunyengwe ebye yatendelenga mikoka eye atandile Nyambi ya Ngula oho bantu bendi bayilenga na kulikaka.

³ Manashe mwana Hezekiya watendulwile myanya ya kulemeshela banyambi bowa iya anyemwine tatiyendi, pe wazikile tuula twa kulemeshela Mbaalu, pe watendele mpangwa ya shifwekesha sha nyambi wa mbuyama Ashela, ngonehe atendele Mwene Ahambu wamu Ishalela. Manashe kami walemeshelenga nyenye.

⁴ Wazikile tuula twa banyambi bowa mu litala lya Nyambi ya Ngula muya atoyele Nyambi ya Ngula ngayi mu Yelushalema nimwo nikayaka lizina lyami na kulemeshiwilamo.

⁵ Mu bipango bya binzanza bibili bya ku litala lya Nyambi wazikilemo tuula twakulemeshelanga nyenye.

⁶ Wakombelelemo mwanendi wa mulume kwinga nkombela ya kuhokesha. Wayilenga ku bibuko naku bakamalele, pe wayilenga ku bakakwawula na bakakwamba na bafu. Wabipishilile Nyambi ya Ngula shikuma na ku shonkomona wukali wendi.

⁷ Wayakile shifwekesha sha nyambi wa mbuyama Ashela mu litala lya Nyambi. Mwanya ou ambile Nyambi ya Ngula kuli Ndavita na mwanendi Sholomoni ngayi, “Muno bene mu Yelushalema, ku lino bene litala niwo mwanya uya ninahata mu litunga nimwalyo lya mishobo likumi na yibili ya bantu ba Ishalela kwinga myanya oku nikayaka lizina lyami na kulemeshiwilangako.

⁸ Kami ndi bantu ba Ishalela bakwombatala ndayano zami nimwazo na kulama mazu wami nimwawo aya abapanine mukamulimo wami Moshesha, pe kukabetabila ngayi batandiwe mu litunga liya napanikile ku bankakazabo nifwako.”

⁹ Ngoboni bantu bamu Yunda kaliha bombatalile Nyambi ya Ngula, pe Manashe wabashanwishile na kutenda wubi wawunene kupitakana uya batendele mishobo oyo atandile Nyambi ya Ngula oho bantu bendi bayilenga na kulikaka.

¹⁰ Nyambi ya Ngula wambilile mubakamilimo bendi bamiluwe ngayi,

¹¹ “Mwene Manashe unatende byuma ebye bya wunyengwe, kami unatende byuma bya kuluwa ebye batendele Baamoli, unashanwishi bantu ba Yunda mu wubi na tunankishi twendi.

¹² Nohobene Ami Nyambi ya Ngula, Nyambi wa Ishalela, nikaleta makando ha Yelushalema na Yunda ngayi bantu nimwabo bayuvwako bakabangula matu.

¹³ Nikashushula Yelushalema ngonehe Shamaliya, ngonehe natendele Mwene Ahambu wamu Ishalela na bazukulyendi. Nikamanisha bantu bamu Yelushalema ngonehe muntu wukuyowesha lulonga na kulukunkumuna pe hikulufulumika.

¹⁴ Nikafutamina bantu aba, pe nikabapana ku bamalamo babo, kukoma na kupukula litunga lyabo.

¹⁵ Nikatenda eshe ku bantu bami ndaba banabipishi ha kundwisha pe banashonkomono wukali wami, ku balika shikati shiya bankakazabo bafumine mu Engepita kukuma naku mutena wa lelo.”

¹⁶ Manashe wazihile bantu babengi bakubula mulandu ngayi zinzila zamu Yelushalema zahwentelenga mukeza kufungila ku wubi uya ashanwishile bantu bamu Yunda mu kulemesha tunankishi, nohobene babipishile ku meho a Nyambi ya Ngula.

¹⁷ Byuma byamina nimwabyo biya atendele Manashe na wubi atendele byatikitiwile mu likota lya Bamyene bamu Yunda.

¹⁸ Manashe wafwile wafundiwile mumfuba yaku musheke, mu mfuba ya Uza, pe mwanendi Amoni wamushwanine kwinga mwene.

Mwene Amoni wamu Yunda

¹⁹ Amoni wekalile na myaka makumi abili oho engile mwene wa Yunda, pe walelele mu Yelushalema myaka yibili. Mandiyendi wengile Meshulemeti, mwana Haluzi waku munzi wa Yotimba.

²⁰ Wabipishilile Nyambi ya Ngula ngonehe tatiyendi Manashe.

²¹ Wahembwizikile milimo ya tatiyendi, walemeshelenga tunankishi tuya alemeshelenga tatiyendi.

²² Wakanine Nyambi ya Ngula, Nyambi wa bankakazendi, pe wabulile kwombatala ndayano za Nyambi ya Ngula.

²³ Babilolo ba Amoni bamubebele pe bamuzihilile mu musheke.

²⁴ Ngoboni bantu ba Yunda bazihile batupondwa ba Amoni, pe bakwatile mwanendi wa mulume Yoshiya kwinga mwene.

²⁵ Byuma nimwabyo byamina biya atendele Amoni byatikitiwile mu likota lya Bamyene bamu Yunda.

²⁶ Amoni wafundiwile mu shizino shamu mfuba ya maluba ya Uza, pe mwanendi Yoshiya wamushwanine kwinga mwene.