2 Bamyene 20 - Libuka Lya Kuyela

Kukola Kwa Mwene Hezekiya na Kupola kwendi

¹ Ha matena ayo, mwene Hezekiya wekalile na kukola pe washingile kufwa. Muluwe wa Nyambi Ishaya mwana Amozi wayile mu kumumona pe wamutongwezele ngayi, “Nyambi ya Ngula unamba ngayi wahisha byuma byobe shiwahe ndaba ufwako kukapola ukafwa.”

² Niho Hezekiya akinkile lupala lwendi ha limota pe walombelele kuli Nyambi ya Ngula ngayi,

³ “Obe Nyambi ya Ngula anuka eshe na kutendelanga shiwahe na kwoloka, kami shikati nimwasho nezekanga kutenda ebye washinganga ngayi nibitende.” Niho Hezekiya alilile shikuma.

⁴ Ishaya washiyile mwene ngoboni oho ushili kwendela mukati ka shipango sha shinzanza shamu musheke, Nyambi ya Ngula wamutongwezele ngayi,

⁵ “Boka kuli Hezekiya ntwamina wa bantu ba Nyambi ya Ngula, pe wambe kukwendi ngayi, ‘Nyambi ya Ngula Nyambi ya nkaka yobe Ndavita nayuvwu lilombelo lyobe kami namono mihozi yobe. Nikakupolesha pe mu matena ahatu ukaya ku litala lya Nyambi.

⁶ Nikanunga ku myaka yobe ya kuyoya na myaka likumi na mutanu. Nikakulamwina na lukena luno lwa Yelushalema kuli mwene wamunene waku Ashiliya. Nikalwila luno lukena, ndaba ya lileema lyami amimwine na mukamulimo wami Ndavita.’ ”

⁷ Niho Ishaya atongwezele mwene kuyaka lukambi lwaha nkuyu ha linzunge lyendi, pe ukekala shiwahe.

⁸ Mwene Hezekiya wepwile ngayi, “Kati shilimukisho ngani shikatontolola ngayi ukampolesha pe kami ngayi kwapita matena ahatu nikatwesha kuya ku litala lya Nyambi.”

⁹ Ishaya wakumbwile ngayi, “Shino nisho shilimukisho sha kuli Nyambi ya Ngula, shikatontolola ngayi ukalama shikulupisho shendi. Haya kati ukushinga mumvulu uye kumbili na zintambo likumi ha shipimo sha kulimukilamo shikati, ndi ukushinga mumvulu uboke mantenganyima na zintambo likumi ndi?”

¹⁰ Hezekiya wakumbwile ngayi, Shinengi shawangu kutwala mumvulu kumbili na zintambo likumi, ngoboni haya bwesha mumvulu mantenganyima na zintambo likumi!

¹¹ Muluwe Ishaya walombelele kuli Nyambi ya Ngula, pe wabweshele mumvulu mantenganyima na zintambo likumi ha shipimo sha Mwene Ahazi sha kulimukila shikati.

Bantumwana ba ku Mbambiloniya

¹² Ha shikati shiyo bene Melondaki mwana Mbalandani, ou wengile mwene waku Mbambiloniya, wayuvwile ngayi Mwene Hezekiya wakolanga, pe wamutuminine liñwati na bishemo.

¹³ Hezekiya watekeshele bantumwana na kubatongweza wuheti wendi wa shiliva na ngolinde na mazi amawahe na lukumba na bilwisho byendi nimwabyo bya nzita. Kaliha kwekalile shuma shimo mu bikongelo hinge mu musheke wendi hinge nimwamo mu wene wendi biya abulile kubamonesha.

¹⁴ Niho muluwe Ishaya ayile kuli Mwene Hezekiya pe wepwile ngayi, “Aba balume bakufuma kuti, kami banamba bishini kukwobe?” Hezekiya wakumbwile ngayi, “Bakufuma ku litunga lya kwakutali, ku Mbambiloniya.”

¹⁵ Wamwipwile ngayi, “Kati banamono bishini mu musheke wobe?” Pe mwene Hezekiya wakumbwile ngayi, “Banamono byuma nimwabyo mu musheke wami. Kowa shuma shimo shiya nabulu kubamonesha mu bikongelo.”

¹⁶ Niho Ishaya atongwezele mwene ngayi, “Nyambi ya Ngula Mpandashilanga ukwamba ngayi,

¹⁷ Matena akeza oho byuma nimwabyo biya bakongele bankakazobe binakumu naku mutena wa lelo, bikatwaliwa ku Mbambiloniya. Kowa shuma shikashalako.

¹⁸ Bazukulyobe baha mutima bakatwaliwa kami bakenga bantatula ba ku musheke wa mwene waku Mbambiloniya.”

¹⁹ Mwene Hezekiya wayuvwishishile eshe ngayi shikutontoloka ku mwena na kulamiwa ha shikati nimwasho sha wumi wendi, pe wakumbwile ngayi, “Elye lizu unamba lya kuli Nyambi ya Ngula linawaha.”

Kumana kwa kulela kwa Hezekiya

²⁰ Byuma bimina biya atendele Mwene Hezekiya, bya kukanca kwa biheka byendi naneshe atendele lishima lyanyuminine na kukaba mumpongo wakuleta mema mu lukena. Nimwabyo byatikitiwile mu likota lya Bamyene bamu Yunda.

²¹ Hezekiya wafwile, pe mwanendi Manashe wamushwanine kwinga mwene.