2 Bamyene 2 - Libuka Lya Kuyela

Eliya ukutwaliwa muyilu

¹ Shikati sha Nyambi ya Ngula sha kutwala Eliya muyilu na kakundukundu sha kumine. Eliya na Elisha bakatukile ku Ngilingale,

² pe ha nzila Eliya wambile kuli Elisha ngayi, “Haya shala kuno, Nyambi ya Ngula unantumu ngayi niye ku Mbetele.” Ngoboni Elisha wakumbwile ngayi, “Nalibeze na kupwisha na Nyambi ya Ngula Wakuyoya naku kwobe ngayi kukakushiya nifwako.” Niho bayile hamo ku Mbetele.

³ Likunge lya bamiluwe ba Nyambi ku Mbetele aba bekalilenga kuyo bayile kuli Elisha na kumwipula ngayi, “Pe obe hiwulimuka ngayi lelo Nyambi ya Ngula ukufumisha hekulyobe kukwobe ndi?” Elisha waba kumbwile ngayi, “Ingoi hinilimuka. Ngoboni hinga mwamba.”

⁴ Niho Eliya ambile kuli Elisha ngayi, “Haya shala kuno, Nyambi ya Ngula unantumu ngayi niye ku Yeliko.” Ngoboni Elisha wakumbwile ngayi, “Nalibeze na kupwisha na Nyambi ya Ngula Wakuyoya na kukwobe ngayi kukakushiya nifwako.” Niho bayile hamo ku Yeliko.

⁵ Likunge lya bamiluwe ba Nyambi bekalilenga ku Yeliko bayile kuli Elisha na ku mwipula ngayi, “Pe obe hiwulimuka ngayi lelo Nyambi ya Ngula ukufumisha hekulyobe kukwobe ndi?” Elisha wakumbwile ngayi, “Ingoi hinilimuka. Ngoboni hinga mwamba.”

⁶ Niho Eliya ambile kuli Elisha ngayi, “Haya shala kuno, Nyambi ya Ngula unantumu ngayi niye ku mushinzi wa Yondana.” Ngoboni Elisha wakumbwile ngayi, “Nalibeze na kupwisha kuli Nyambi ya Ngula Wakuyoya na kukwobe ngayi kukakushiya nifwako.” Niho Bayile hamo.

⁷ Kami miluwe ba Nyambi makumi mutanu babakonkele ku Yondana. Eliya na Elisha bemanine ku mushinzi, pe miluwe makumi mutanu bemanine hahatali shashishe.

⁸ Niho Eliya avulile lyambangubo lyendi, walivungile pe walikamine ha mema. Mema alitapile, pe niye na Elisha bapitile ha kuyuma kuzabukila mu nciza.

⁹ Kuyo Eliya wambile kuli Elisha ngayi, “Ntongweze ebye ukushinga ngayi nikutendelebyo oho shilolo nitwaliwe.” Elisha wakumbwile ngayi, “Nikushinga nikone kabili ngovu za moyo wobe mwanga zikankumishe ha kwinga ncwana yobe.”

¹⁰ Eliya wakumbwile ngayi, “Shuma eshe unanyepe shashikalu. Ngoboni ukekala nasho ndi ukamona hinitwaliwa, ndi kukamona wufwako, pe kukatambulasho ufwako.”

¹¹ Oho bendelenga hibambola, pe babazumukile tuhu koloyi ya mundilo yakokiwilenga na bambishi ba mundilo yezile mukati kabo kubatapulula, pe Eliya watwaliwile muyilu na kakundukundu.

¹² Elisha washimonene pe wabilikile ngayi, “Batate tawee, batate tawee! Niku mona Makoloyi na Mulamwini wamunene wa Ishalela aya.” Pe kaliha wamonene Eliya kami. Ha wunginga wawunene, Elisha watabwile lyambangubo lyendi kabili.

¹³ Niho atolele Lyambangubo lya Eliya liya lyawile kukwendi, pe wabokele na kwimana ha shibumbo sha Yondana.

¹⁴ Wakamine ha mema kabili na lyambangubo lya Eliya, pe walihohomene ngayi, “Haya uli kuti Nyambi ya Ngula, Nyambi wa Eliya?” Pe mema alitapile, niho azabukile mu nciza.

¹⁵ Miluwe makumi mutanu bafumine ku Yeliko bamumonene pe bambile ngayi, “Moyo wa Eliya uli hali Elisha.” Bayile mu kuliwana nendi, balambile kumbili yendi.

¹⁶ Pe bambile ngayi “Nimwetu kuno tuli makumi mutanu a balume ba kushuma. Tokonoko tuye tukashinge hekulyobe. Hamina kampe Moyo wa Nyambi ya Ngula unamutwala kwashenge na kumushiya ha lipili limo, hinge mu mukulo umo.” Elisha wakumbwile ngayi, “Byo, ku fwanina kuya mufwako.”

¹⁷ Ngoboni bamukananganine hantu noho alehelesho pe wabetabilile ngayi baye. Makumi mutanu nimwabo bayile na kushinga Eliya hayilu ya mapili na ku nceto ya mapili ha matena ahatu, ngoboni kaliha bamuwanine.

¹⁸ Niho babokele kuli Elisha, ou wekalile na kubatatilila ku Yeliko, pe wambile kukwabo ngayi, “Nka namitongweza ngayi hinga muya.”

Bikomokesho bya Elisha

¹⁹ Bantu bamo bafumine ku Yeliko bayile kuli Elisha pe bambile ngayi, “Ngonehe unamono hekulu, luno lukena lwenga lwalunene ngoboni mema amabi kami limvu kaliha lyameneshanga mbuto.”

²⁰ Elisha wabatongwezele ngayi, “Yakenu mushele mu lulonga lwalupya mululete kukwami.” Pe bamuletelelelwo.

²¹ Pe wayile ku kaheloke, wakubile mushele mu mema, pe wambile ngayi, “Nyambi ya Ngula ukwamba eshe ngayi, ‘Nikuyelesha awa mema, pe kukaleta kami lufu afwako hinge kukanisha mbuto kumena.’ ”

²² Niho aya mema engile amawahe shikati nimwasho ngonehe shiya ambile Elisha, nisho ekalile.

²³ Elisha wafumine ku Yeliko na kuya ku Mbetele, pe ha nzila bandumbana bamo bafumine ha munzi bamuhengaminine na kumuhandula ngayi, “Fuma kuno obe wa ntenda.”

²⁴ Elisha wafutukile wabalushwilile meho, pe waba kutwile mu lizina lya Nyambi ya Ngula. Niho bambeya babili babakali bafumine mu lusholo pe bashanyozwele baya bandumbana makumi anaa na babili.

²⁵ Elisha walumbilenga kupenzesha ku lipili lya Kamela, niho abokele ku Shamaliya.