2 Bamyene 19 - Libuka Lya Kuyela

Mwene ukwipula kubela kwa Ishaya

¹ Mwene Hezekiya oho ayuvwile lushango lwabo, watabwele bivwalo byendi mu wunginga, wavwalile mincangwe, pe wayile ku Litala lya Nyambi ya Ngula.

² Watumine Eliyakimu shilolo wa mukulwane waku musheke na Shembina mukakutikita wamu shinzanza na bakankombela ba bakulwane, kuli muluwe wa Nyambi Ishaya mwana Amozi. Nibo kami bavwalile mincangwe.

³ Elye lizu nilyo abatongwezele kukashimika kuli Ishaya, “Lelo unengi mutena wakuyanda na ku shushuliwa kami na kuhanduliwa. Tunengi ngo mbuyama unayenduku kushinga kubeleka ngoboni unabulu ngovu shikuma za kumututwisha.

⁴ Mwene wamunene wa Ashiliya unatumu shilolo wendi wamukulwane mu kuhandula Nyambi wakuyoya. Kampe Nyambi ya Ngula, Nyambi yobe nayuvwu eli lihandu pe ukashushula obo bambalyo. Nohobene lombelela bantu betu banashalaho kuli Nyambi.”

⁵ Oho Ishaya atambwile lizu lya mwene Hezekiya,

⁶ wakumbwile ngayi, “Nyambi ya Ngula ukumitongweza ngayi hinga mwitabila Baashiliya ngayi bamitinishe na mazu ngayi kutwesha kumipulwisha ufwako.

⁷ Nyambi ya Ngula ukayaka moyo muli mwene wamunene waku Ashiliya, pe ukayuvwa mbuzi ya mahalo, ukekala na mutentu uya ukamubwesha ku litunga lyendi, niko kami Nyambi ya Ngula akamuzihila.”

Baashiliya ba kutuma kami banzita

⁸ Oho mukulwane wa nzita ayuvwile ngayi mwene wa Ashiliya wafumakale ku Lakishi pe uli na kulwisha munzi wa Limbina, pe wayileko mu kuliwana nendi.

⁹ Haya mwene watambwile lizu ngayi nzita ya ba Engepita, akwendesha Mwene Tilihaka waku Kushi, yili na kwiza mu kubalwisha. Oho Mwene wamunene waku Ashiliya ayuvwile eshe, watumine bantumwana kuli Hezekiya mwene wamu Yunda na kumutongweza ngayi,

¹⁰ “Nyambi ou muli na kukulupila mumwendi hinga amyongeza na kumi kulupisha ngayi Yelushalema kukawila mu maboko a mwene wa Ashiliya ufwako.

¹¹ Munayuvwu ebye anatende Mwene wamunene waku Ashiliya ku matunga nimwawo, unawanongeshe kulungu. Kati mu kuhanganika ngayi mu kutwesha kupanza ndi?

¹² Bankaka zami banongeshele minzi ya Ngozani na Halani na Lezefwa pe bazihile bantu ba ku Endeni aba bekalilenga mu Telasha kami kowa banyambi babo batweshele kubapulwisha.

¹³ Balikuti bamyene bamu zinkena za Hamati na Alipandi na Shefwalavayimu na Hena na Aviva?”

¹⁴ Mwene Hezekiya watambwile liñwati ku bantumwana na kulilaba. Niho ayile ku litala lya Nyambi, watandubwile liñwati ku meho a Nyambi ya Ngula,

¹⁵ pe walombelelele ngayi, “Obe Nyambi ya Ngula, Nyambi wa Ishalela, unekala ha litanda lya wene wobe, hayilu ya Makelumbi, obe Nyambi tuhu ninkayobe ukulela wene nimwawo wa hano hanci. Obe walengele hanci na liyilu.

¹⁶ Haya obe Nyambi ya Ngula, tengeka litu lyobe, utuyuvwe na kupenza meho wobe kukwetu, obe Nyambi ya Ngula umone pe yuvwilila ku byuma nimwabyo biya anambanga Shenakelimba bya kukuhandula obe Nyambi wakuyoya.

¹⁷ Nimwetu hitulimuka obe Nyambi ya Ngula ngayi, bamyene babanene ba ku Ashiliya banongeshele mikoka yayingi na matunga wabo.

¹⁸ Pe bahokeshele banyambi babo mu mundilo, aba babulile kwinga banyambi, byengile tuhu tunankishi twa bitondo na mamanya bya kutendiwa ku maboko a bantu.

¹⁹ Obe Nyambi ya Ngula Nyambi yetu haya tulamwine ku Baashiliya ngayi mikoka nimwayo ya hano hanci yikalimuke ngayi, obe tuhu Nyambi ya Ngula.”

Lizu lya Ishaya kuli Mwene Hezekiya

²⁰ Niho Ishaya mwana Amozi atumine lizu kuli Mwene Hezekiya lya kumutongweza ngayi, Nyambi ya Ngula Nyambi wa Ishalela nayuvwu kulomba kwobe hali Shenakelimba mwene waku Ashiliya pe na kumbulu.

²¹ Awa mazu anamba Nyambi ya Ngula hali Shenakelimba ngayi, “Kankanga wamu Ziyoni uli na kukuhendola na ku kushilawiza. Mbuyama wamu Yelushalema uli na kufwa ku mahepo oho muli na kuya lubilo.

²² Kati ukuhanganika ngayi ou unahandulu na kulimbwilisha nengi yani? Wenga wa lihandu kukwami na kumulungumwina meho na kuliyemeza? Nengi Nyambi wa kuyela wa Ishalela!

²³ Na bantumwana bobe unahandulu hekulu, pe unamba ngayi nakandamine na kupitakana hayilu ya mapili ha makoloyi wami amengi, kupitakana hayilu ya mapili a Lembanoni. Natemene mitondo ya shinda yayitali ya Lembanoni na mitondo yayiwahe shikuma ya mupaini. Nakakumine mukati ka lishaka lya kwakutali shikuma na mukati ka shimbundu sha kuzika.

²⁴ Nakabile mashima na kunwa mema mu matunga a mapukwenda. Nayumishile tushinzi twamu Engepita na bilyatilo bya mawulu wami.

²⁵ “Kati kaliha mwayuvwile ngayi nashishumishile kunyima? Pe haya nashiholola kale ngayi mwanga shimoneke, shiya nafungile mwaka ku matena akunyima, ngayi utweshe ku shandola zinkena za bipata kwinga mishiinzi ya mamanya.

²⁶ Bantu bekalilengako bengile bakubula ngovu, pe batampwile na kwikala na lisheni. Bengile ngo mwila wamu lishaka, ngonehe mwila wa wukata, banafweke ngo mwila unamene ha shiluli, walebukanga oho shilolo ukule.

²⁷ “Ngoboni nikulimuka byuma nimwabyo bya hahobe, ebye watendanga nanoku wayanga naneshe ukundwisha.

²⁸ Ndaba unandwishi, pe kulitemba kwobe kunakumu ku matu wami. Nikayaka kahanto na lumingo ku muzulu wobe na nkobo mukanwa kobe, pe nika kubweshela na nzila eye wezile nayo.”

²⁹ “Eshe nisho shikenga shimonekesho kukwobe, obe Hezekiya. Uno mwaka mukalya byakulya bya kulimenena na mwaka wawubili, mukalya ebye bikalimenena ngoboni ku mwaka wawuhatu mukalima na kukuba mbuto na kuteza na kutampika mafuba a shinyanca na kulya mikabo yayo.

³⁰ Mashaliza bamu Yunda banapukulu, bakahalaba mipishi hanci pe kuyilu yika yima mikabo.

³¹ Ndaba mu Yelushalema mukashala mashaliza naku lipili lya Ziyoni kukashala muhoko wa bampuluki. Ntukumina ya Nyambi wa Makunge yikashitenda.

³² “Nohobene eshe nisho anamba Nyambi ya Ngula hali Mwene wamunene waku Ashiliya ngayi, ‘Kukengina mu luno lukena ufwako, hinge kupuha muvwi wendi muno. Kukeza na likebo lyendi ufwako, hinge ku bumbako mushimino wakuzingwilishako.

³³ Na nzila eye ezile nayo, niyo kami akaboka nayo. Nyambi ya Ngula unamba ngayi kukengina mu lukena luno ufwako.

³⁴ Ndaba nikalwila luno lukena na kulupulwisha, ndaba ya namimwine, kami ndaba ya mukamulimo wami Ndavita.’ ”

³⁵ Niho Lingeloyi lya Nyambi lyayile ku munkungwa wa Baashiliya pe lya kazihilemo bakanzita 185,000. Oho bapindukile lumenemene, mituntu ya bantu ba kufwa yinashewama hanci shewaa!

³⁶ Niho Mwene wamunene wa Ashiliya Shenakelimba abokele ku Neniva.

³⁷ Mutena umo oho alemeshelenga mu litala lya nyambi yendi Nishiloki, Andilameleki na Shaleza bana bendi babalume babili bamuzihile na mikwale yabo, pe niho batininine ku litunga lya Alalata. Eshahandoni wamina ha bana babalume, bamushwanishile kwinga Mwene wamunene.