2 Bamyene 18 - Libuka Lya Kuyela

Mwene Hezekiya wamu Yunda

¹ Mu mwaka wawuhatu wakulela kwa Hoshiya mwana Ela wa mulume mwene wamu Ishalela, Hezekiya mwana Ahazi wengile mwene wamu Yunda.

² Wekalile na myaka 25, pe walele Yelushalema myaka 29. Mandiyendi wengile Ambi mwana Zakaliya.

³ Watendele ebye byawahilishile Nyambi ya Ngula, wakonkele nzila ya nkakayendi Ndavita.

⁴ Washandwele myanya yaha binkanda ya bakakulemesha banyambi bowa, wabunkwele zimpangwa za mamanya na kuketola mishubwa ya bifwekesha bya nyambi wa mbuyama Ashela. Kami wapokwezele liyoka uya abumbile Moshesha wa lubemba, ou atumbile ngayi Nehushitani, ndaba kukuma naku shikati shiyo bantu ba Ishalela bahokeshelenga incence ya kupana lileema kukwalyo.

⁵ Hezekiya wakulupilile kuli Nyambi ya Ngula Nyambi wa Ishalela, pe litunga lya Yunda kaliha lyekalile na mwene wakumufweka, hinge ha kutatika hinge ha shikati sha munyima yendi.

⁶ Wengile wakulunga kuli Nyambi ya Ngula, kami wabulile kumuhandula, ngoboni walamine ndayano nimwazo ziya Nyambi ya Ngula apanine Moshesha.

⁷ Nohobene Nyambi ya Ngula wekalile nendi hamo, pe wengile wakutangama mu byuma nimwabyo biya atendelenga. Wafutulukilile mwene wamunene waku Ashiliya, wakanine kulishepesha kukwendi.

⁸ Walwishile Bafwilishitina mu minzi yabo ku balika kukapeshi kutwala ku shipata.

⁹ Mu mwaka wawunaa wakulela kwa mwene Hezekiya, ou wengile mwaka wa mutanu na yibili wakulela kwa mwene Hoshiya wamu Ishalela mwana Ela, mwene Shalimaneshe waku Ashiliya wakatukilile mutakwe Ishalela na kuzinguluka Shamaliya.

¹⁰ Mu mwaka wawuhatu oho bashili kuzinguluka, ou wengile mwaka wa mutanu na umo wakulela kwa Hezekiya na mwaka wa mutanu na yinaa wakulela kwa mwene Hoshiya, Shamaliya wakomiwile.

¹¹ Mwene wamunene wa Ashiliya, watwalile Baishalela ku Ashiliya kwinga bantapwa na kuyaka bamo mu munzi wa Hala na bamina kwakwipi na mushinzi wa Hamba mu litunga lya Ngozani na bamina mu minzi ya Mendiya.

¹² Shamaliya wakomiwile ndaba Baishalela kaliha bombatalile Nyambi ya Ngula Nyambi yabo. Ngoboni bakilukile kulimama kuya alimamine nabo, kaliha bombatalile kufundiziza nimwako abapanikile Moshesha mukamulimo wa Nyambi ya Ngula. Babulilenga kuyuvwa na kubula kwombatala.

Baashiliya ba kufumbila Yelushalema

¹³ Mu mwaka wawulikumi na yinaa wakulela kwa mwene Hezekiya, Shenakelimba, mwene wamunene wa Ashiliya walwishile minzi ya Yunda ya bipata na kuyikoma.

¹⁴ Hezekiya mwene wamu Yunda watumine lizu kuli Shenakelimbu, ou wekalilenga mu Lakishi ngayi, “Lehasho kutulwisha natenda shibi, pe nikayumba ebye nimwabyo ukushinga.” Mwene wa Ashiliya wakumbwile ngayi, Hezekiya uku fwanina kumutumina makilo makulukazi likumi a shiliva na makilo likulukazi limo lya ngolinde.

¹⁵ Hezekiya wamu tuminine shiliva nimwayo yamu litala lya Nyambi naya mu mfuma ya musheke.

¹⁶ Kami Hezekiya walamunwine ngolinde yaha bihala bya ku litala lya Nyambi ya Ngula na ngolinde nimwayo yiya yalambiwile ha bikwiliti bya ku shipana, pe wayitumine kuli Shenakelimba.

¹⁷ Mwene waku Ashiliya watumine kanzita wa mukulwane kufuma ku Lakishi kuya mu kulwisha Hezekiya ku Yelushalema, bayendeshele bengile babilolo bendi babalume bahatu. Oho bakumine ku Yelushalema, balikakile nzila oku batendelanga mulimo wa bakakutunga makwiza, hahepi na lilomba liya lyaletelenga mema aku liziba lya ku nkambamo.

¹⁸ Niho batumine mwene Hezekiya na Eliyakimu mwana Hilikiya ou wengile mukulwane waku musheke na Shembina mukakutikita wamu shinzanza na Yowa mwana Ashafwi ou wengile mukulwane mukakulama bya likota lya wene.

¹⁹ Umo ku babilolo ba Baashiliya wabatongwezele ngayi, “Mwene wamunene waku Ashiliya ukushinga kulimuka eshe shinashumishi mutima wa mwene Hezekiya.

²⁰ Kati mu kuhanganika ngayi mazu akutwesha kuhinga mu mwanya wa bakanzita ba kulimuka na ku shuma ndi?

²¹ Mona, uli na kukinka mutima hali Engepita, uyo muwana wa litete wakumunguka, ou ukutwesha kutubula liboko lya muntu nimwendi ukuyendaminaho. Eshe nisho ali Fwalo wa Engepita ku nimwabo ba kukinka mutima hahendi.

²² Ngoboni ndi mukwamba kukwami ngayi, twakinka mutima hali Nyambi ya Ngula Nyambi yetu, Kaliha niye Nyambi, ou mwene yenu. Hezekiya wahandwile na ku shandola myanya yendi ya hayilu na tuula twendi oho atongwezele zinkena za Yunda na Yelushalema kulemesha kunaka kaala ka mamanya.

²³ “Tokonoko tuhu tuliyuvwashane nanenu mu lizina lya mwene wamunene wa Ashiliya. Mwanga nikamipane makulukazi abili a bambishi tumone ndi mukatwesha kuwana bantu babengi ba kukandamaho.

²⁴ Muli bavwa shikuma kutwesha kukoma hinge umo ha babilolo betu babashe mufwako, hinge ndi munakinki mitima ha Baengepita ngayi bamitumine makoloyi na bambishi na bakakukandamaho?

²⁵ Kati mukuhanganika ngayi nezi mu kulwisha litunga lyenu kwakubula kutumiwa kuli Nyambi ya Ngula ndi? Nyambi ya Ngula niye mwine wantongweza kulwisha litunga lyenu na kulilobesha.”

²⁶ Niho Eliyakimu mwana Hilikiya na Shembina na Yowa batongwezele shilolo wamukulwane wa nzita ngayi, “Hekulu twambishe mu Shialamayiki. Twayuvwangasho. Hinga wamba mu shihebelu bantu nimwabo bali ha kembi bali na kuyuvwilila.”

²⁷ Shilolo waku Ashiliya wakumbwile ngayi, “Kati mu kuhanganika ngayi enu na mwene enu tuhu babilolo antuminine mwene wamunene mukwamba byuma nimwabyo ebye ndi? Byo! Nili na kwamba kami ku bantu aba banekala ha kembi aba bakalya byabibi bya mu zinyutu zabo na kunwa mema amu zinyutu zabo nibo bamwine, ngonehe eshe mukenga nanenu.”

²⁸ Niho mukulwane wa nzita emanine pe wabilikizile mu Shihebelu ngayi, “Yuvwililenu ebye akumitongweza mwene wamunene waku Ashiliya!

²⁹ Hinga mwitabila Hezekiya kumyongeza. Hezekiya kutwesha kumi lamwina ufwako.

³⁰ Kami hinga mu mwitabila ngayi amikandamike kukinka mitima hali Nyambi ya Ngula. Hinga muhanganika ngayi Nyambi ya Ngula ukamilamwina, kami ngayi ukakanisha banzita ba Baashiliya kupukula lukena lwenu.

³¹ Hinga muyuvwilila kuli Hezekiya. Mwene waku Ashiliya ukumitongweza ngayi mututike mu lukena kwiza na kulishepesha. Nimwenu muketabilishiwa kulya ku mikabo yaku mikolobozi yenu ya shinyanca na nkuyu za ku mitondo yenu na kunwa mema amu mashima wenu.

³² Hantu naboko na kumitwala ku litunga lya kulifweka ngonehe liya lyenu, oku kwekala mafuba a shinyanca akutenda waine, kami kuli mbuto ya kuvuba mankende, nilyo linengi litunga lya mitondo ya olive na mazi a olive na wushi. Ndi mukutenda ebye na kumitongweza, kukafwa mufwako, ngoboni mukayoya. Hinga mwitabila Hezekiya ngayi amyongeze na kuhanganika ngayi Nyambi ya Ngula ukamilamwina.

³³ Kati ku bali banyambi ba ku mikoka nimwayo balamwinine matunga wabo kuli mwene wa Ashiliya ndi?

³⁴ Balibo kuti haya banyambi ba ku Hamati na Alipandi? Balibo kuti banyambi ba Shefwalavayimu na Hena na Aviva? Kati kuli nyambi wamina ukutwesha kulamwina Shamaliya kukwami ndi?

³⁵ Kati shikati ngani banyambi bamu matunga nimwawo batweshele kulamwina matunga wabo kukwami? Hayaboni bishini bikumihanganikisha ngayi Nyambi ya Ngula ukutwesha kulamwina Yelushalema ku liboko lyami?”

³⁶ Bantu bamwenene hulutuu, ngonehe mwene Hezekiya abatongwezele pe nibo kaliha bakumbwile shuma shimo.

³⁷ Niho Eliyakimu mwana Hilikiya mukulwane waku musheke na Shembina mukakutikita na Yowa mwana Ashafwi wengile mukakulama bya likota lya wene batabwile bivwalo byabo mu wunginga, pe bayile kuli Hezekiya na ku shimika kuli mwene ebye ambile shilolo waku Ashiliya.