2 Bamyene 17 - Libuka Lya Kuyela

Mwene Hoshiya wamu Ishalela

¹ Mu mwaka wawulikumi na yibili ya kulela kwa mwene Ahazi wamu Yunda, Hoshiya mwana Ela wa mulume wengile mwene mu Ishalela, pe walelele mu Shamaliya myaka mutanu na yinaa.

² Wabipishilile Nyambi ya Ngula ngoboni kaliha shikuma ngonehe bamyene aba balelele Ishalela ha kutatika.

³ Mwene Shalimaneshe waku Ashiliya walobele nzita ya kulwisha Hoshiya, pe niye walishishilenga kuli Shalimaneshe, wamutupwililenga ntupu ha mwaka ha mwaka.

⁴ Ngoboni mwaka umo Hoshiya watumine bantumwana kuli mwene Sho waku Engepita, mu kunyepa kuyavwiwa, pe walehelesho kunyepa ntupu kuli mwene wa Ashiliya yaha mwaka ngonehe atendelenga. Oho Shalimaneshe alimukile haneshe wakwatile Hoshiya na kumuyaka mu tolongo.

Kuwa kwa Shamaliya

⁵ Niho mwene Shalimaneshe akatukilile mutakwe Ishalela, pe bazingulukile Shamaliya myaka yihatu.

⁶ Mu mwaka wa mutanu na yinaa wakulela kwa Hoshiya, mwene wamunene wa Ashiliya wapukwile Shamaliya, watwalile Baishalela ku Ashiliya mukwinga bantapwa, wayakile bamo mu lukena lwa Hala na bamo kwakwipi na shibumbo sha mushinzi wa Hamba mu litunga lya Ngozani kami bamina mu zinkena za Mendiya.

⁷ Shamaliya wawile ndaba Baishalela babipishilile Nyambi ya Ngula, Nyambi yabo kuli mwene waku Engepita na kubafumisha mu Engepita. Kami balemeshelenga banyambi bowa.

⁸ Bakonkele biheka bya bantu aba atandile Nyambi ya Ngula mukati oho bantu bendi bayilenga na kulikaka na biheka bya kuyambula, biheka ebye baletele bamyene bamu Ishalela.

⁹ Baishalela batendele byuma biya abulile kwitabilisha Nyambi ya Ngula, Nyambi yabo. Balitendelele nibo bamwine myanya ya kulemeshela banyambi bowa mu minzi yabo nimwayo, ku balika ku kapeshi na kutwala ku lukena lwa shipata.

¹⁰ Ha binkanda nimwabyo na ku nceto ya mibombola ya mitondo bemikile zimpangwa za mamanya na mishubwa ya bifwekesha bya nyambi wa mbuyama Ashela.

¹¹ Kami bahokeshelenga incence ha tula nimwato twa ha binkanda bya bakakulemesha banyambi bowa, kukonka ntendelo ya bantu aba atandile Nyambi ya Ngula mu litunga. Bashonkomwene wukali wa Nyambi ya Ngula na biheka byabo bya kuluwa.

¹² Babulile kwombatala ndayano za Nyambi ya Ngula, ha kulemesha tunankishi.

¹³ Nyambi ya Ngula watumine bamiluwe bendi mu kushiwulula Ishalela na Yunda ngayi, “Shiyenu zinzila zenu zazibi, pe ombatalenu ndayano zami na mazu napanine bankakazenu, eze nazipanine kukwenu muli bakamilimo bami bamiluwe.”

¹⁴ Ngoboni kaliha bombatalile, bakaluhishile mitima ngonehe bankakazabo, aba babulile kukulupila muli Nyambi ya Ngula Nyambi yabo.

¹⁵ Bakanine kwombatala kufundiziza kwendi, kaliha balamine kulimama kwendi kuya alimamine na bankakazabo, babulile kutwala mitima kukubela kwendi. Balemeshele tunankishi twowa kami bafutukile kwinga byowa nibo bamwine, pe bakonkele biheka bya matunga aya azikilenga nabo a kubula kwombatala ndayano za Nyambi ya Ngula zambiwile ngayi hinga mubahembwizika.

¹⁶ Bakilukile mazu nimwawo a Nyambi ya Ngula, Nyambi yabo. Babumbile bifwekesha bibili bya bankunzi ba shondo na kubalemesha, babumbile kami shifwekesha sha nyambi wa mbuyama Ashela, balemeshelenga nyenye, kami balemeshelenga nyambi Mbaalu.

¹⁷ Bakombelelenga bana babo babalume na ba bambuyama kwinga zinkombela za kuhokesha ku banyambi bowa. Bayilenga ku bambuki naku bakakwawula, kami balihahilenga nibo bamwine Kubipisha kuli Nyambi ya Ngula, pe bashonkomwene wukali wendi.

¹⁸ Nohobene Nyambi ya Ngula wapilaminine shikuma Baishalela pe wabatandile ku lupala lwendi, Washiyile tuhu wene wa Yunda.

¹⁹ Ngoboni hinga nibo bantu ba Yunda babulile kwombatala ndayano za Nyambi ya Ngula, Nyambi yabo, bakonkele biheka ebye batendelenga Baishalela.

²⁰ Nyambi ya Ngula wakanine Baishalela nimwabo, wabashushwile na kubapanika ku bamalamo babo banguma, hantu noho abatandile ku lupala lwendi.

²¹ Oho Nyambi ya Ngula atapwilile Ishalela ku wene wa Ndavita, Baishalela bakwatile Yelombowami mwana Nembati kwinga mwene yabo. Yelombowami wabashiyishile Nyambi ya Ngula, Nyambi yabo na ku batwaminina mu wubi wawunene.

²² Bakonkele Yelombowami na kuzamina kutenda wubi nimwawo uya atendelenga,

²³ hantu noho Nyambi ya Ngula abatandile ku meho wendi, ngonehe abashiwulwile muli bakamilimo bendi bamiluwe ngayi nisho akatenda. Nohobene Baishalela batwaliwile mu wuntapwa mu Ashiliya, oku bashili kuzika nalelo.

Baashiliya bakwikala mu Ishalela

²⁴ Mwene wamunene waku Ashiliya wafumishile bantu bamo mu zinkena zamu Mbambiloniya na Kute na Aviva na Hamati na Shefwalavayimu na kubayaka mu minzi yamu Shamaliya, kuhinga mu myanya ya Baishalela batwaliwile mu wuntapwa. Bashimbile likona lya minzi eye pe bazikilemo.

²⁵ Oho batatikile kwikalamo, kaliha balemeshelenga Nyambi ya Ngula, niho Nyambi ya Ngula abatuminine babimbwi, pe bazihileho bamo hakati kabo.

²⁶ Mwene wamunene waku Ashiliya bamutongwezele ngayi baya bantu wayaka mu minzi yamu Shamaliya kaliha balimuka kufundiziza kwa nyambi wamu litunga liyo, pe haya Nyambi uya unabatumini babimbwi, aba bali na ku baziha ndaba kaliha balimuka mazu a Nyambi wa litunga liyo.

²⁷ Nohobene mwene wamunene wabatongwezele ngayi, “Tumako mukankombela umo ha bakankombela aba twakaletele mu wuntapwa, umubweshe akekaleko, pe akalongeshe bantu mazu a nyambi wa litunga liyo.”

²⁸ Nohobene mukankombela wa Kaishalela waku Shamaliya ou watwaliwile mu wuntapwa wabokela mu Mbetele mu kuzikamo, omu alongeshelenga bantu kulemesha Nyambi ya Ngula.

²⁹ Ngoboni bantu aba bazikile mu Shamaliya bazaminine kutenda tunankishi twabo, batuyakile mu myanya yaha binkanda ya kulemeshela banyambi bowa yiya bazikile Baishalela. Kanzunga na kanzunga katendelenga tunankisha mu minzi omu bekalilenga.

³⁰ Bantu ba ku Mbambiloni batendele tunankishi twa nyambi Shukoti Mbenota na bantu ba ku Kute batendele tunankishi twa Nelingale na bantu ba ku Hamati batendele tunankishi twa Ashima,

³¹ na bantu ba ku Aviva batendele tunankishi twa Nimbihazi na Talitake na bantu ba ku Shefwalavayimu bakombelelenga bana babo kwinga zinkombela za kuhokesha ku banyambi babo Andilameleki na Anamaleka.

³² Aba bantu kami balemeshelenga Nyambi ya Ngula, pe bahatile hakati kabo bantu ba mishoboshobo kwinga bakankombela ku myanya ya bakakulemesha banyambi bowa na ku bakombelelako zinkombela ha myanya yaha binkanda yakulemeshela.

³³ Nohobene batinine Nyambi ya Ngula, ngoboni kami batendelele milimo banyambi babo, ngo ku biheka bya matunga oku bafumine.

³⁴ Nihano bashili kuzamina biheka byabo bya mwaka. Kutina Nyambi ya Ngula bafwako hinge kwenda mu zinzila zendi, hinge kwombatala kufundiziza kwendi na mazu wendi na ndayano zendi eze apanine kuli Yakobo ou atumbile ngayi Ishalela.

³⁵ Nyambi ya Ngula walimamine nabo, pe wabalayile ngayi, “Hinga mushintama manungo kukwabo hinge kubatendela milimo hinge kukombelela zinkombela kukwabo.

³⁶ Ngoboni ombatalenu Ami Nyambi ya Ngula ou wamifumishile mu Engepita na ngovu zazinene na liboko lya kwoloka. Mukashinkame manungo hanci kukwami na kulamba na kukombelela zinkombela kukwami.

³⁷ Mukendenga mu zintambo zami na kwombatala kufundiziza kwami na mazu wami na ndayano zami ziya namitikitilile. Hinga mukalemeesha banyambi bowa,

³⁸ kami hinga mukavulama kulimama kuya nalimamine nenu. Hinga mukalemeesha ba nyambi bashenge.

³⁹ Mukanyombatale Ami Nyambi ya Ngula Nyambi yenu, pe nikamilamwina ku bamalamo benu.”

⁴⁰ Ngoboni obo bantu babulile kuyuvwa, kami bazaminine kukonka biheka byabo bya mwaka.

⁴¹ Nohobene bantu batininenga Nyambi ya Ngula, ngoboni kami balemeshelenga tunankishi twabo, kukuma naku mutena wa lelo bazukulyabo bashili kuzamina kutenda shosho shuma shimo.