2 Bamyene 16 - Libuka Lya Kuyela

Mwene Ahazi wamu Yunda

¹ Mu mwaka wa 17 wakulela kwa Peka mwana Lemaliya kwinga mwene wamu Ishalela, Ahazi mwana Yotamu washwanine ha wene wamu Yunda.

² Ahazi wekalile na myaka makumi abili, pe walelele mu Yelushalema myaka 16. Kaliha wakonkele zinzila zaziwahe za nkakayendi mwene Ndavita, ngoboni kaliha watendele ebye byawahilishile Nyambi ya Ngula, Nyambi yendi.

³ Wakonkele zinzila za bamyene bamu Ishalela. Wakombelelele mwanendi wa mulume wakulibelekela kwinga nkombela ya kuhokesha ku tunankishi, kuhembwizika biheka bya wunyengwe ebye batendelenga bantu aba atandile Nyambi ya Ngula mu litunga oho Baishalela bayilenga na kulikaka.

⁴ Ahazi wakombelelele na kuhokesha incence ku myanya yaha binkanda yakulemeshela banyambi bowa namu mibombola ya mitondo nimwayo.

⁵ Mwene Lezina wamu Shiliya na mwene Peka wamu Ishalela balwishile Yelushalema kami baluzingulukile, ngoboni kaliha batweshele kukoma Ahazi.

⁶ Ha shikati shosho shimo, mwene waku Endoma wabokelele kulela lukena lwa Elati, watandilemo Bayunda aba bazikilengamo. Baendoma bekalilenga mu Elati kami bashili kwikalamo.

⁷ Ahazi watumine bantumwana kuli Tingilati Pilesha mwene wamunene wamu Ashiliya na mazu awa akwamba ngayi, “Ami mukamulimo wobe waku nceto. Yeka undamwine ku bamyene bamu Shiliya na Ishalela, aba bali na kundwisha.”

⁸ Ahazi washimbile Shiliva na ngolinde. Pe wabitumine kwinga ntupu kuli mwene wamunene wamu Ashiliya.

⁹ Nohobene Tingilati Pilesha wakatukile na bakanzita bendi kuya mu kulwisha lukena lwa Ndamashika, walupukwile kami wazihile mwene Lezina, pe watwalile bantu mu wuntapwa ku Kila.

¹⁰ Oho mwene Ahazi ayile ku Ndamashika na kuliwana na mwene wamunene Tingilati Pilesha waku Ashiliya. Oho ekalile kuyo wamoneneko kaala, kami washimbile shifwekesha sha kubumba sha kulifweka na kaya kaala kwezekesha ngonehe kekala, pe wakatumine kuli mukankombela Uliya.

¹¹ Nohobene Uliya watendele kaala kakulifweka ngonehe niko, pe wakamanishile oho Mwene Ahazi shilolo aboke ku Ndamashika.

¹² Ha kuboka kwendi kufuma ku Ndamashika, Ahazi wamonene ngayi kaala kanamana, kami watupwile ntupu kuyo.

¹³ Nohobene wahokesheleleho nkombela yendi ya shimuna na ntupu yendi ya mpeka, pe wayitilile ntupu ya waine ku kaala. Wamyanzilileho mukeza wa nkombela ya kulilumikila.

¹⁴ Kaala ka lubemba kafunguliwile kuli Nyambi ya Ngula kekalile mukati ka kaala kakapya na litala lya Nyambi. Nohobene Ahazi washituntwilile ku mbalila ya ncelele ya kaala kakapya.

¹⁵ Niho mwene Ahazi atongwezele Uliya ngayi, “Tendesha aka kaala kami kakanene ku zinkombela za kuhokesha za lumenemene na zintupu za mpeka, ku mazolo na zinkombela za kuhokesha za mwene na zinkombela zendi za mpeka, hamo na zinkombela za kuhokesha za bantu nimwabo, hamo na zintupu zabo za waine. Myanzila mukeza nimwawo wa zinkombela za kuhokesha na mukeza nimwawo wa zinkombela ha kaala kakapya. Ngoboni ndamwine kaala ka lubemba mwanga nitendeshenga ha kubuka.”

¹⁶ Mukankombela Uliya watendele ngonehe amutongwezele mwene Ahazi.

¹⁷ Mwene Ahazi walamwine bikakambwa bya lubemba ebye batendeshelenga ku litala lya Nyambi na kufumisha zindonga ziya zekalileho, lizawo lya lubemba ha myongo ya bankunzi ba lubemba na kubiyaka ha mwimbi wa limanya.

¹⁸ Kami ngayi mwanga biwahililishe mwene wamunene wa Baashiliya. Ahazi wafumishile shibaamba na ku shinka ku menginino a litala lya Nyambi.

¹⁹ Byuma bimina biya atendele mwene Ahazi byatikitiwile mu Likota lya bamyene bamu Yunda.

²⁰ Ahazi wafwile kami wafundiwile mu bizino bya wene mu Lukena lwa Ndavita, pe mwanendi Hezekiya wamushwanine.