2 Bamyene 15 - Libuka Lya Kuyela

Mwene Uziya wamu Yunda

¹ Mu mwaka wa 27 wa kulela kwa Yelombowami wawubili wamu Ishalela, Uziya mwana Amaziya wa mulume washwanine kwinga mwene wamu Yunda.

² Wekalile na myaka 16 oho engile mwene kami walele mu Yelushalema myaka 52. Mandiyendi wengile Yekoliya wamu Yelushalema.

³ Wawahililishile Nyambi ya Ngula ngonehe shiya atendelenga tatiyendi Amaziya

⁴ Ngoboni kaliha walobeshele myanya yaha binkanda yakulemeshela banyambi bowa, pe bantu bazaminine kukombelela zinkombela na kuhokesha incence.

⁵ Nyambi ya Ngula washushwile Uziya na wulweli wa mbumba ha lutu uya ekalile nawo kutwala na ku kufwa kwendi. Wekalilenga tuhu mu litala lya ninkayendi, kami mwanendi wa mulume Yotamu wamuyavwilenga ku milimo nimwayo ya kulela litunga.

⁶ Byuma bimina biya atendele Uziya byatikitiwile mu Likota lya bamyene bamu Yunda.

⁷ Uziya wafwile kami wafundiwile mu bizino bya wene mu Lukena lwa Ndavita, pe mwanendi Yotamu wamushwanine kwinga mwene.

Mwene Zakaliya wamu Ishalela

⁸ Mu mwaka wa 38 wakulela kwa mwene Uziya wamu Yunda, Zakaliya mwana Yelombowami wawubili wengile mwene wamu Ishalela, pe walele mu Shamaliya zingonda mutanu na yimo.

⁹ Niye wendele mu zinzila ziya bendele baya ashwanine, wabipishilile Nyambi ya Ngula. Wakonkele nzila yayibi ya mwene Yelombowami mwana Nembati ou watwamininine Baishalela mu nzila yayibi.

¹⁰ Shaluma mwana Yambeshi wabebele mwene Zakaliya, wakamuzihilile ku Imbilema niho amushwanine kwinga mwene.

¹¹ Byuma nimwabyo biya atendele mwene Zakaliya byatikitiwile mu likota lya bamyene bamu Ishalela.

¹² Nohobene shamonekele shiya ambile Nyambi ya Ngula kuli mwene Yehu ngayi, “Bazukulyobe bakakuma ku shihemunwino sha wunaa hibenga bamyene mu Ishalela.”

Mwene Shaluma wamu Ishalela

¹³ Mu mwaka wa 39 wakulela kwa mwene Uziya wamu Yunda, Shaluma mwana Yambeshi wengile mwene wamu Ishalela, pe walele mu Shamaliya ngonda yimo.

¹⁴ Menahema mwana Ngandi waku Tilaza wayile ku Shamaliya, wakazihile Shaluma mwana Yambeshi pe wamushwanine kwinga mwene.

¹⁵ Byuma nimwabyo biya atendele Shaluma, kufungilako na kubeba kwendi, byatikitiwile mu Likota lya Bamyene bamu Ishalela.

¹⁶ Oho Menahema ayilenga mu nzila yendi ku Tilaza, walobeshele lukena lwa Tifwisha naba bazikamo naba bamu mfuba ya nteme ndaba baka lukena kaliha balishishile kukwendi. Pe waloshwelenga bana bakubula kukoma mu mavumo a bambuyama nimwabo.

Mwene Menahema wamu Ishalela

¹⁷ Mu mwaka wa 39 wa kulela kwa mwene Azaliya mwene wamu Yunda, Menahema mwana Ngandi wengile mwene wamu Ishalela, pe walelele mu Shamaliya myaka likumi.

¹⁸ Menahema wabipishilile Nyambi ya Ngula, pe wendele mu zinzila za kuluwa za Yelombowami mwana Nembati, ou watwamininine Ishalela ku wubi kutwala ha mutena wa lufu lwendi.

¹⁹ Tingilati Pilesha mwene wamunene wa Ashiliya, wakatukilile mutakwe ba Ishalela pe Menahema wamupanine makilo 34,000 a shiliva ngayi amuyavwe mu kushumisha ngovu za wene wendi.

²⁰ Menahema wawanine mali ku balume ba kuheta bamu Ishalela na kukandamika muntu na muntu kupana mu kungwila makumi mutanu a mali a muwayawaya wa shiliva. Nohobene Tingilati Pilesha wabokele ku litunga lyendi.

²¹ Byuma bimina biya atendele Menahema byatikitiwile mu Likota lya bamyene bamu Ishalela.

²² Wafwile pe wafundiwile, kami mwanendi wa mulume Pekahiya wamushwanine kwinga mwene.

Mwene Pekahiya wamu Ishalela

²³ Mu mwaka wa 50 wakulela kwa mwene Uziya wamu Yunda, Pekahiya mwana Menahema wengile mwene wamu Ishalela, pe walele mu Shamaliya myaka yibili.

²⁴ Wabipishilile Nyambi ya Ngula ha kukonka mu zinzila za kuluwa za mwene Yelombowami mwana Nembati, ou watwamininine Ishalela mu wubi.

²⁵ Shilolo wa bakanzita ba Peka mwana Lemaliya, Peka wabebele mwene Pekahiya hamo na balume makumi mutanu ba ku Ngiliyande. Wazihilile mwene Pekahiya hamo na Alingombu na Aliya mu musheke wa mukati ka twimbi mu Shamaliya, pe wamushwanine kwinga mwene.

²⁶ Byuma byamina biya atendele Pekahiya byatikitiwile mu Likota lya bamyene bamu Ishalela.

Mwene Peka wamu Ishalela

²⁷ Mu mwaka wa 52 wakulela kwa mwene Uziya wamu Yunda, Peka mwana Lemaliya mwene wamu Ishalela, walele Shamaliya myaka makumi abili.

²⁸ Wabipishilile Nyambi ya Ngula ha kukonka zinzila za kuluwa za mwene Yelombowami mwana Nembati, ou watwamininine Ishalela mu wubi.

²⁹ Nisho shengile shikati shiya Peka engile mwene, oho Tingilati Pilesha mwene wamunene wa Ashiliya apukwile zinkena za Yiyoni na Abele Mbeti Maaka na Yanowa na Kendeshi na Hazola na matunga a Ngiliyande na Ngalileya na Nafwitali, pe washimbile bantu na kubatwala ku Ashiliya mukwinga bantapwa.

³⁰ Ha mwaka wa makumi abili a kulela kwa Yotamu mwana Uziya mwene wamu Yunda, Hoshiya mwana Ela wabebele mwene Peka, wamuzihile pe wamushwanine kwinga mwene.

³¹ Byuma bimina biya atendele Peka byatikitiwile mu Likota lya bamyene bamu Ishalela.

Yotamu Mwene wamu Yunda

³² Mu mwaka wawubili wakulela kwa Peka mwana Lemaliya mu Ishalela, Yotamu mwana Uziya washwanine ha wene wamu Yunda.

³³ Wekalile na myaka makumi abili na mutanu oho engile mwene, pe walelele mu Yelushalema myaka likumi na mutanu na umo. Mandiyendi wengile Yelusha mwana Zandoki.

³⁴ Yotamu watendele ebye byawahilishile Nyambi ya Ngula, wakonkele zinzila za tatiyendi Uziya.

³⁵ Ngoboni kaliha banyemwine myanya yaha binkanda ya kulemeshela banyambi bowa, pe bantu bazaminine kukombelela zinkombela na kuhokesha incence. Yotamu wazikile Lipangati lya ku ncelele ya Litala lya Nyambi.

³⁶ Byuma bimina biya atendele Yotamu byatikitiwile mu Likota lya bamyene bamu Yunda.

³⁷ Nisho shengile shikati sha kulela kwa mwene Yotamu shiya Nyambi ya Ngula atumine mwene Lezina wamu Shiliya na mwene Peka wamu Ishalela kukalwisha Yunda.

³⁸ Yotamu wafwile pe wafundiwile mu bizino bya wene mu Lukena lwa Ndavita, niho mwanendi wa mulume Ahazi amushwanine kwinga mwene.