2 Bamyene 14 - Libuka Lya Kuyela

Mwene Amaziya wamu Yunda

¹ Mu mwaka wawubili wakulela kwa Yehowashi mwana Yowahazi kwinga mwene wa Ishalela, Amaziya mwana Yowashi wa mulume wengile mwene wa Yunda.

² Amaziya wekalile na myaka 25 oho engile mwene, kami walele myaka 29 mu Yelushalema. Mandiyendi wengile Yehoyandini waku Yelushalema.

³ Amaziya watendele ebye byawahilishile Nyambi ya Ngula, kaliha watendele ngonehe nkakayendi Ndavita, ngoboni niye wendele mu zintambo za tatiyendi Yowashi.

⁴ Amaziya wabulile kunyemuna tuula twaha binkanda twa kulemeshela banyambi bowa kami bantu bazaminine kukombelela zinkombela na kuyoha incence.

⁵ Oho wene wa Amaziya washumine, wazihile babilolo baya bazihile tatiyendi ou wengile mwene.

⁶ Ngoboni kaliha wazihile bana babo, ndaba wombatalile mazu a Nyambi ya Ngula mu libuka lya ndayano za tikitiwile na Moshesha. “Bahemi kaliha ba ku fwanina kufwila wubi wa bana babo, hinge bana kufwila wubi wa bahemi babo. Muntu nimwendi uku fwanina kuzihiwila wubi anatende niyemwine.”

⁷ Amaziya wazihile bakanzita ba Baendoma 10,000 mu mukulo wa mushele kami wakomene na lukena lwa Shela pe walutumbile lizina lya Yokitelu, nilyo lizina lyawo naku lelo.

⁸ Amaziya watumine bantumwana kuli Yehowashi mwana Yehoyahazi mwene wamu Ishalela na kumushonkawiza ngayi baliwane mu nzita balwe.

⁹ Ngoboni mwene Yehowashi wamu Ishalela wakumbwile mwene Amaziya wamu Yunda ngayi, “Kwekalile lipukumuna lya mihengela ha lipili lya Lembanoni lyatongwezele mutondo wa shinda ngayi, ‘Yitabila ngayi mwanobe ayekiwe kuli mwanami.’ Niho kwezile kayamana wa lishaka na kulyatangila liya lipukumuna lya mihengela.

¹⁰ Amaziya wuluno unakomo Baendoma, pe uli na kuliyemeza. Haya tulumana ha kukoma kami yikala tuhu mu lukena lwobe. Kati shumangani eshe ukulishingishila wukalu ou ukaleta kuloba hahobe na ha bantu bobe bamu Yunda?”

¹¹ Ngoboni Amaziya wakanine kuyuvwa, niho mwene Yehowashi wamu Ishalela akatukile na bakanzita bendi kuya mu kulwisha Amaziya wamu Yunda. Pe bakanzita babo baliwanine mu nzita ku Mbeti Shemeshi mu Yunda.

¹² Bakanzita ba Amaziya babakomene, niho bapanzanine na kuyitukila ku minzi yabo.

¹³ Mwene Yehowashi wamu Ishalela wakwatile mwene wamu Yunda, Amaziya muzukulya Ahaziya ku Mbeti Shemeshi. Niho ayile ku Yelushalema, oku akanyemwine limota lya munzi mamita 200 kubalikila ku lipangati lya Efulemu kukakuma naku lipangati lya ku Nkomi.

¹⁴ Washimbile ngolinde na shiliva nimwayo iya awanine na bishebezesho bya mu Litala lya Nyambi na ntutu nimwayo yamu litala lya wene niho abitwalile ku Shamaliya. Watwalile kumo na bantu bamo.

¹⁵ Byuma bimina biya atendele Yehowashi mu kulela kwendi na nimwabyo biya atendele, kuyakako na kukanca kwendi na nzita alwile na Amaziya wamu Yunda, byatikitiwile mu Likota lya Bamyene bamu Ishalela.

¹⁶ Yehowashi wafwile niho bamufundile ku Shamaliya mu bizino bya Bamyene bamu Ishalela. Mwanendi wa mulume Yelombowami wawubili wamushwanine kwinga mwene.

Lufu lwa mwene Amaziya wamu Yunda

¹⁷ Mwene Amaziya wamu Yunda mwana Yowashi wayoyele myaka likumi na mutanu munyima ya kufwa kwa mwene Yehowashi mwana Yehoyahazi wa Ishalela.

¹⁸ Byuma bimina biya atendele Amaziya mu kulela kwendi, byatikitiwile mu likota lya bamyene bamu Yunda.

¹⁹ Mu Yelushalema kwekalile bihanganiko bya kuziha Amaziya. Oho ayuvwileko wetukilile ku Lakishi. Ngoboni bamalamo bendi batumine bakakumuziha munyima yendi niho bakamuzihilile kuyo.

²⁰ Baletele mutuntu wendi ku Yelushalema ha bambishi pe wafundiwile na bawushinda wendi mu Lukena lwa Ndavita.

²¹ Bantu nimwabo bamu Yunda bashwanishile Uziya mwana Azaliya wa mulume ou wekalile na myaka 16, kwinga mwene mu mwanya wa tatiyendi Amaziya.

²² Munyima ya lufu lwa tatiyendi Uziya watendulwile lukena lwa Elati kami walubweshele ku Yunda.

Mwene Yelombowami wawubili ukulela Ishalela

²³ Mu mwaka wawu 15 wakulela kwa Amaziya mwana Yowashi mwene wamu Yunda, Yelombowami wawubili watatikile kulela Ishalela. Yelombowami walele mu Shamaliya myaka 41.

²⁴ Wabipishile ku meho a Nyambi ya Ngula. Wabulile kutenguluka ku wubi ou Yelombowami mwana Nembati atwamininine Ishalela kuwu tenda.

²⁵ Yelombowami wabweshele matunga nimwawo a Ishalela mukati ka Lembo hamati na liwate lya Mushele ngonehe shiya Nyambi ya Ngula, Nyambi wa Ishalela a kulupishile kupitila muli Yona mwana Amitayi, ou wengile muluwe waku Ngati Hefwa.

²⁶ Nyambi ya Ngula wamonene makando amanene ku ba Ishalela, kami kwabulile muntu wakubayavwa.

²⁷ Nyambi ya Ngula kaliha washingile ngayi Baishalela nimwabo balobeshiwe mu litunga, pe niho abalamwinine muli mwene Yelombowami wawubili mwana Yowashi.

²⁸ Byuma bimina biya atendele Yelombowami wawubili bya kukanca kwendi naneshi abweshele zinkena za Ndamashika na Hamati, ziya zekalile za kupukuliwa ku bantu ba Yunda, nimwabyo byatikitiwile mu Likota lya Bamyene bamu Ishalela.

²⁹ Yelombowami wafwile pe wafundiwile mu bizino bya wene pe mwanendi Zakaliya wamushwanine.