2 Bamyene 13 - Libuka Lya Kuyela

Mwene Yehoyahazi wamu Ishalela

¹ Mu mwaka wa makumi abili na yihatu ya kulela kwa Yowashi mwana Ahaziya wa mulume mwene wamu Yunda, Yehoyahazi mwana Yehu wa mulume wengile mwene wamu Ishalela, pe walelele mu Shamaliya myaka likumi na mutanu na yibili.

² Niye walifwekele na Mwene Yelombowami mwana Nembati ou watatikile ku shwanaho wa bipishile ku meho a Nyambi ya Ngula, pe watwamininine ba Ishalela mu wubi, hinga atangile kuleha zinzila zendi zazibi.

³ Nohobene Nyambi ya Ngula wapilaminine ba Ishalela, pe wetabilile Mwene Hazayelu wamu Shiliya na mwanendi wa mulume Mbeni Handandi kukoma Ishalela ha shikati na shikati.

⁴ Niho Yehoyahazi alombelele kuli Nyambi ya Ngula, pe Nyambi ya Ngula wamonene eshe mwene waku Shiliya ayandishilenga Baishalela na nguma, wakumbwile lilombelo lyendi.

⁵ Nyambi ya Ngula watuminine Ishalela mukakutwaminina ou wabalamwinine ku Baashiliya, nohobene Baishalela bekalile mu ku mwena ngonehe ha kutatika.

⁶ Ngoboni hinge noho Baishalela kaliha balehele wubi ou mwene Yelombowami abatwamininine, ngoboni bazaminine kutenda wubi, pe mpangwa ya shifwekesha sha nyambi wa mbuyama Ashela shekalile mu Shamaliya.

⁷ Yehoyahazi wabulile bakanzita ndele tuhu balume 50 bakakukandama ha bambishi na makoloyi 10 na 10,000 balume bakwenda hanci, ndaba mwene waku Shiliya walobeshele babengi na kubalyatangila hanci ngo mashinde aku lishima.

⁸ Byuma bimina biya atendele Yehoyahazi na biheka byendi nimwabyo bya kukanca, nimwabyo byatikitiwile mu Likota lya Bamyene bamu Ishalela.

⁹ Yehoyahazi wafwile pe wafundiwile mu Shamaliya, pe mwanendi wa mulume Yowashi wamushwanine kwinga mwene.

Mwene Yehowashi wamu Ishalela

¹⁰ Mu mwaka wa 37 wa kulela kwa Yowashi mwene wamu Yunda, Yehowashi mwana Yehoyahazi wa mulume wengile mwene wamu Ishalela, pe walelele mu Shamaliya myaka likumi na mutanu na umo.

¹¹ Kami wabipishile ku meho a Nyambi ya Ngula na kuhembwizika mu mwanza wa Mwene Yelombowami mwana Nembati, ou watwamininine ba Ishalela mu wubi.

¹² Byuma byamina biya atendele Yowashi kufungilako na kukanca kwendi mu nzita ya kulwisha Mwene Amaziya wamu Yunda, byatikitiwile mu Likota lya Bamyene bamu Ishalela.

¹³ Yowashi wafwile pe wafundiwile mu bizino bya wene mu Shamaliya, pe mwanendi wa mulume Yelombowami wawubili wamushwanine kwinga mwene wa Ishalela.

Lufu lwa Elisha

¹⁴ Muluwe Elisha wakolelenga wulweli wakumutwala kukufwa, pe oho amininenga moyo, Mwene Yowashi wamu Ishalela wayile na kumuzingula. Niye wabilikizile oho alililenga ngayi, “Batate! Batate! Obe wenganga shipata sha ngovu sha Ishalela.”

¹⁵ Elisha wamutongwezele ngayi, “Tola shipando sha mukunzi na mivwi yimo.” Yehowashi washitolele,

¹⁶ pe Elisha wamutongwezele ngayi aliwahishe kupuha. Mwene watendele noho, pe Elisha wayakile maboko wendi ha maboko a mwene.

¹⁷ Niho Mwene ha kukonka kufundiziza kwa muluwe, mwene washinkwilile limpananga liya lya shangula ku Shiliya. Elisha wamutongwezele ngayi, “Puha muvwi.” Wanguwangu oho mwene ukupuha muvwi, muluwe wabilikizile ngayi, “Owe unengi muvwi wa Nyambi ya Ngula, ou ukakoma Baashiliya. Ukalwisha baka Shiliya mu Afweki hantu unabakomo.”

¹⁸ Niho Elisha atongwezele mwene kutola mivwi yamina na kuyaha hanci. Mwene wayahile hanci bikati bihatu, pe niho alehelesho.

¹⁹ Eshe shapilamishile muntu wa Nyambi, pe wambile kuli mwene ngayi, shinga unayaha hanci bikati mutanu hinge mutanu na shimo, pe shinga unakapitakana Baashiliya ngoboni haya ukabapitakana bikati bihatu tuhu.

²⁰ Elisha wafwile, pe wafundiwile. Likunge lya Bamowambi lyakatukililenga mutakwe mu kulwisha litunga lya Ishalela ha mwaka ha mwaka shikati sha mvumbi.

²¹ Shikati shimo, Baishalela oho bafundilenga muntu, likunge limo lya bakanzita lya Bamowambi lyamonekele, pe bayumbilile mutuntu uya mu shinzimbi sha Elisha, niho betukile. Wanguwangu oho mutuntu waliwanine na bifupa bya Elisha uya mulume washangukile pe wemanine.

Nzita mukati ka Ishalela na Shiliya

²² Mwene Hazayelu waku Shiliya wayandishile Baishalela shikati nimwasho shiya sha kulela kwa Yehoyahazi,

²³ ngoboni Nyambi ya Ngula wengile wa shishemo na nceshe kukwabo. Kaliha wabalehele ngayi balobeshiwe, ngoboni wabayavwile, ndaba ya kulimama kwendi na Abulahama na Ishaki na Yakobo. Hinga atangile kuvulama bantu bendi.

²⁴ Ha kufwa kwa Mwene Hazayelu wamu Shiliya, mwanendi Mbeni Handandi wa mulume wengile mwene.

²⁵ Niho Mwene Yowashi wamu Ishalela akomene Mbeni Handandi bikati bihatu, pe wabweshele zinkena ziya zashimbiwile kuli Mbeni Handandi ha shikati sha kulela kwa Yehoyahazi, tata Yehowashi.