2 Bamyene 10 - Libuka Lya Kuyela

Bazukulya Ahambu ba kuzihiwa

¹ Ahambu wekalile na bazukulu 70 bekalilenga mu lukena lwa Shamaliya. Yehu watikitile mañwati pe wa atumine ku babilolo ba Yezilelu, ku bakulwane na kubakakulama bazukulya Ahambu. Mañwati alabiwile ngayi,

² “Enu bakakulama bazukulya mwene, kami muli na makoloyi na bambishi na twimbi twa zinkena na bilwisho. Nohobene, haya mwatambula tuhu elye liñwati,

³ pe hatenuho umo ha bazukulya mwene unafwanini kwinga mwene, pe mulwilenu mu kumuyaka ha litanda lya tatiyendi.”

⁴ Ngoboni batulela ba ku Shamaliya batinine pe bambile ngayi, “Tukutwesha kukanangana Yehu nahiti, mwene Yolamu hinge Mwene Ahaziya kutwesha bafwako?”

⁵ Nohobene shilolo wa mukulwane waku musheke na shilolo wa mukulwane wamu lukena, hamo na bakulwane na bakakulama, batumine lino lizu kuli Yehu ngayi, “Tuli bakamilimo bobe, kami tukombatala kutenda byuma nimwabyo unatoyo. Ngoboni kukakwata muntu nimwendi ngayi enge mwene tufwako. Tenda shuma nimwasho ukuhanganika ngayi shashiwahe.”

⁶ Yehu wabatikitilile liñwati lyamina ngayi, “Ndi munawili kumo na nami kami mukushinga kukonka ndayano zami, nzona ku shikati shino mukalete mitwe ya bazukulya Mwene Ahambu kukwami ku Yezilelu.” Haya balamiwilenga ku bakulwane bamu lukena lwa Shamaliya, nibo balelelenga bazukulya Mwene Ahambu makumi mutanu na abili.

⁷ Oho batambwile tuhu liñwati lya Yehu, bakakutwaminina bamu Shamaliya bazihile bazukulya Ahambu makumi mutanu na abili. Bayakile mitwe yabo mu zintumba pe bayitumine kuli Yehu ku Yezilelu.

⁸ Oho batongwezele Yehu ngayi mitwe ya bazukulya Ahambu yinaletiwi, wa batongwezele ngayi yibungikiwe hamo mu mishiinzi yibili ku lipangati lya lukena na kuyishiyako hantu hiku nzona lumenemene.

⁹ Ku lumenemene wayile ku lipangati, pe wambile na bana bekalileko ngayi, “Amibene nabebele Mwene Yolamu na kumuziha. Enu kaliha muli na mulandu. Ngoboni yani unazihi nimwabo aba?

¹⁰ Eshe shikuwaniwa ngayi byuma nimwabyo biya ambile Nyambi ya Ngula ha bazukulya Ahambu kukawila hanci bifwako. Nyambi ya Ngula unatende ebye a kulupishile muluwe wendi Eliya.”

¹¹ Niho Yehu azihile bawushinda wa Ahambu aba bekalilenga mu Yezilelu nimwabo na babilolo bendi nimwabo na bahoni bendi bashikuma na bakankombela bendi, kowa muntu hakati kabo washalileho wamumi.

Bawushinda wa Mwene Ahaziya ba kuzihiwa

¹² Yehu wafumine ku Yezelela na kuya ku Shamaliya. Oho ayilenga ha nzila yimo yatumbiwile ngayi, Munkungwa wa balishani,

¹³ walihanganine na bawushinda bamo ba mukakufwa ba Mwene Ahaziya wamu Yunda, pe wabepwile ngayi, “Kati muli bayani?” Bawushinda wa Ahaziya bakumbwile ngayi, “Etu tuli na kuya ku Yezelela mu kulunda maleema wetu kuli bana ba Lihano Yezembelo babalume naku wingi wa ba lupashi lwa wene.”

¹⁴ Yehu watongwezele bantu bendi ngayi, “Bakwatenu, mubashimbe babomi.” Wakabazihilile kwakwipi na lishima lya nyuminine lya ku Mbeti Ekendi. Nimwabo bantu makumi anaa na abili, pe kowa muntu umo washalileho wamumi.

Bawushinda wa Ahambu bashalileho nimwabo ba kuzihiwa

¹⁵ Yehu wafunzukile kami, pe oho ayilenga wamushimbawilile Yonandabe mwana Lekabe wa mulume. Yehu wamushangwishile, pe wambile ngayi, “Obe na nami twalifweka mu mahanganiko. Nka ukunyavwa ndi?” Yonandabe wakumbwile ngayi, “Nkwate ku liboko.” Balikwatile ku maboko, Yehu wamuyavwile kumwingiza mu koloyi.

¹⁶ Yehu wambile ngayi, “Tuyenga hamo pe umone ntukumina yami kuli Nyambi ya Ngula.” Kami bendele hamo kuya ku Shamaliya.

¹⁷ Oho bakakumine ku Shamaliya, Yehu wakazihile bawushinda wa Ahambu nimwabo, kaliha wakashiyileko hinge umo. Eshe nisho Nyambi ya Ngula atongwezele Eliya ngayi shikamoneka.

Bakakulemesha Mbaalu ba kuzihiwa

¹⁸ Yehu wehanine bantu nimwabo hamo ba ku Shamaliya, pe wambile ngayi, “Mwene Ahambu walemeshele Mbaalu, ngoboni ami nikamulemesha kupitakanisha.

¹⁹ Yihanenu miluwe ba Mbaalu nimwabo nabakakumulemesha nimwabo na bakankombela bendi nimwabo. Kaliha kukekala muntu wakubulako ndaba nikakombelela nkombela yayinene kuli Mbaalu, pe nimwendi ou ukubulako ukazihiwa.” Yehu watendele shuma eshe na ku shoshoka ngayi awane nzila ya kuziha bakakulemesha Mbaalu nimwabo.

²⁰ Niho Yehu ambile ngayi, “Yimikenu mutena wakulemesha Mbaalu.” Lukuwa lwatendiwile.

²¹ Yehu watumine lizu kupita mu litunga nimwamo lya Ishalela ngayi. Nimwabo balemeshanga Mbaalu beze, pe litala lya Mbaalu lyenzalile ku nkumo naku nkumo.

²² Niho Yehu atongwezele mukankombela wa mukulwane wa bikobelo bya shizila kubitutwisha ha munkanda na kubipanika ku bakakulemesha Mbaalu.

²³ Nohoboni, Yehu wenginine mu litala lya nyambi Mbaalu hamo na Yonandabe mwana Lekabe wa mulume, pe wambile ku bantu ngayi, “Monenu ngayi mwikale tuhu balemeshanga Mbaalu, pe kami ngayi mubule kwingina bakakulemesha Nyambi ya Ngula.”

²⁴ Niho Yehu na Yonandabe benginine mu kukombelela nkombela ya kuhokesha kuli Mbaalu. Wayakile bantu makumi mutanu na ahatu ha munkanda wa litala, pe wabatongwezele ngayi, “Zihenu aba bantu nimwabo, muntu nimwendi wakupanzishaho umo pe ukahingishamo wumi wendi.”

²⁵ Yehu oho amanishile tuhu kukombelela zinkombela wambile kubakakulama na babilolo ngayi, “Yenu muka bazihe nimwabo, hinga muleha muntu umo ngayi apanze.” Benginine mukati na mikwale mu maboko, pe babazihile nimwabo, pe bakokelele mituntu yabo ha munkanda. Niho benginine mukati ka kampenci ka litala lya Mbaalu.

²⁶ Batutwishile mpangwa ya shizila iya yekalilenga ku litala lya Mbaalu, pe bayihokeshele.

²⁷ Nohobene banongeshele mpangwa ya shizila na litala lya Mbaalu, pe wafutwile litala kwinga shimbushu eshe shishiliko na lelo.

²⁸ Nisho amanishile Yehu bakakulemesha Mbaalu mu Ishalela noho.

²⁹ Ngoboni wahembwizikile wubi wa Mwene Yelombowami mwana Nembati, ou watwalile ba Ishalela mu wubi wakulemeshanga bifwekesha bya bankunzi ba ngolinde biya byemikiwile mu Mbetele namu Ndani.

³⁰ Nyambi ya Ngula wambile kuli Yehu ngayi, “Unatende byuma nimwabyo nakutongwezele kutenda ku bazukulya Ahambu. Nohobene nikukulupisha ngayi bazukulyobe kukuma naku mukoka wawunaa bakenga bamyene bamu Ishalela.”

³¹ Ngoboni Yehu wakanine kwombatala mazu a Nyambi ya Ngula, Nyambi wa Ishalela na mutima wendi nimwawo, ndaba wahembwizikile biheka bya Yelombowami, ou watwalile ba Ishalela mu wubi.

Lufu lwa Yehu

³² Ha shikati shiyo Nyambi ya Ngula watatikile ku shepesha ku wene wa litunga lya Ishalela. Mwene Hazayelu wamu Shiliya wakomene litunga lya Baishalela,

³³ ku mushamuko wa Yondana, kukuma naku mabukubuku a munzi wa Aloya ha mushinzi wa Anoni kufungila kumo na matunga a Ngiliyande na Mbashani oku kwekalilenga mishobo ya Ngandi na Lubena na Manashe.

³⁴ Byuma nimwabyo byamina biya atendele Yehu, kufungila kumo na biheka byendi bya kukanca, nimwabyo byatikitiwile mu Likota lya Bamyene bamu Ishalela.

³⁵ Wafwile pe bamufundile mu Shamaliya, pe mwanendi wa mulume Yehoyahazi wamushwanine kwinga mwene.

³⁶ Myaka iya alelele Yehu mu Ishalela mu lukena lwa Shamaliya yengile myaka 28.