2 Bamyene 1 - Libuka Lya Kuyela

Eliya na Mwene Ahaziya

¹ Mwene Ahambu wamu Ishalela oho wafwakale litunga lya Mowambi lyafutulukilile Ishalela.

² Mwene Ahaziya wamu Ishalela wandumukile ha kampenci ka hayilu ya musheke wendi wa wene wamu Shamaliya bya kumulama, pe walemanine shikuma. Nohobene watumine bantumwana bamo kuli Mbaalu Zebube, nyambi wa Bafwilishitina bamu munzi wa Ekiloni, ngayi mwanga bakayipwizize ndi kampe ukapola hinge ndi wufwako.

³ Ngoboni lingeloyi lya Nyambi ya Ngula lyatongwezele muluwe wa Nyambi Eliya waku Tishimbe ngayi aye akaliwane na bantumwana ba Mwene Ahaziya pe akabepule ngayi, “Kati shumangani mu kuyila mukwipwiziza kuli Mbaalu Zebube nyambi waku Ekiloni? Kati ndaba una hanganiki ngayi mu Ishalela mowa Nyambi ndi?

⁴ Tongwezenu mwene ngayi Nyambi ya Ngula unamba ngayi, ‘Kukapola kunebye analemana wufwako, ukafwa.’” Eliya watendele ngonehe amulayile Nyambi ya Ngula,

⁵ Bantumwana babokele kuli mwene, pe mwene wabepwile ngayi, “Kati shumangani munabokele?”

⁶ Bakumbwile ngayi, “Tunalihangana na muntu ou unatutongweze ngayi tuboke kukwobe na kukutongweza mazu anamba Nyambi ya Ngula ngayi, ‘Shumangani unatumini bantumwana kuya kuli Mbaalu Zebube, nyambi waku Ekiloni? Kati ndaba unahanganiki ngayi mu Ishalela mowa Nyambi ndi? Obe kukapola ku bitombo wufwako, ukafwa.’”

⁷ Mwene wepwile ngayi, “Kati ou muntu wamihangana shifwekesha shendi sha nahiti?”

⁸ Bakumbwile ngayi, “Wavwalile shikobelo shashitali shatungiwa ha bitembe, sha kuvwalisha na mukunzi wakunyuka wa shitumba.” Niho mwene alimukile ngayi, “Kati nengi Eliya waku Tishimbe.”

⁹ Niho mwene atumine shilolo na bantu makumi mutanu mu kuleta Eliya. Shilolo wamuwanine unekala ha shinkanda, pe wambile kukwendi ngayi, “Obe muntu wa Nyambi, mwene unamba ngayi kunkuluka uye ku musheke kuli mwene.”

¹⁰ Eliya wakumbwile ngayi, “Ndi ami nengi muntu wa Nyambi mwanga mundilo ufume kuyilu ukuzihe na bantu bobe.” Niho mundilo wafumine kuyilu pe wazihile shilolo na bantu bendi.

¹¹ Mwene watumine shilolo wamina na bantu makumi mutanu, aba bakankalalile, pe bambile kuli Eliya ngayi “Obe muntu wa Nyambi, mwene unamba ngayi ukunkuluke shawanguwangu ku musheke kuli mwene.”

¹² Eliya wakumbwile ngayi, “Ndi ami nengi muntu wa Nyambi mwanga mundilo ufume kuyilu ukuzihe na bantu bobe.” Niho mundilo wafumine kuyilu wazihile shilolo na bantu bendi.

¹³ Mwene wabokeleleho kami watumine shilolo wamina na bantu makumi mutanu. Wakankalalile ha shinkanda pe wafunkamine ha manungo kumbili ya Eliya, wamulambililile ngayi, “Obe muntu wa Nyambi unyuvwileko nceshe na bantu bami. Shiyaho wumi wetu.

¹⁴ Babilolo babili na bantu babo bazihiwile ku mundilo wakuyilu, ngoboni hekulu nyuvwileko nceshe.”

¹⁵ Lingeloyi lya Nyambi ya Ngula, lyambile kuli Eliya ngayi, “Yanga kunkuluka nendi ku musheke kuli mwene, pe hinga utina.” Nohobene Eliya wayile na shilolo kuli mwene Ahaziya,

¹⁶ pe wambile kukwendi ngayi, “Eshe nisho akwamba Nyambi ya Ngula ngayi, ‘Ndaba watumine bantumwana kuya mukwipwiziza kuli Mbaalu Zebube nyambi wa Ekiloni ngo mu Ishalela mowa Nyambi wakuya mukwipwiziza. Kukapola wufwako, ukafwa.’”

¹⁷ Ahaziya wafwile ngonehe shiya ambile Nyambi ya Ngula muli Eliya. Ahaziya wabulile bana babalume pe mukonzo wendi Yolama wamushwanine kwinga mwene, mu mwaka wawubili wakulela kwa Yeholamu mwana Yehoshafwati wa mulume mwene wamu Yunda.

¹⁸ Byuma nimwabyo biya atendele Mwene Ahaziya byatikitiwile mu Likota lya Bamyene bamu Ishalela.