1 Yowano 5 - Libuka Lya Kuyela

Kukoma kwetu ha kaye

¹ Nimwendi ukukulupila ngayi Yeshu niye Kilishitu unahemuwu kuli Nyambi, kami nimwendi uku haka ou wahemene, uku haka kami ou wahemuwile kukwendi.

² Na nceshe tukulimuka ngayi tuku haka bana ba Nyambi, oho tuku haka Nyambi na kuholeka ndayano zendi.

³ Ndaba eshe shenga shishemo sha Nyambi, ngayi tuholeke ndayano zendi. Ndayano zendi kaliha zazilemu.

⁴ Ndaba nimwasho shinahemuwu kuli Nyambi shikupitakana kaye. Niko kukoma kukupitakana kaye, niko kukulupila kwenu.

⁵ Yani ou ukupitakana kaye? Ndele ou ukukulupila ngayi Yeshu wenga Mwana Nyambi.

Wupaki hali Yeshu Kilishitu

⁶ Ou wezile na mema na mukeza, Yeshu Kilishitu mwine; kaliha mema pele, ngoboni na mema na mukeza. Kami niye Moyo ukupaka, ndaba Moyo wenga kupwisha.

⁷ Ndaba ku bali bahatu ba kupaka muyilu, Tate na Lizu na Moyo wa Kuyela, nibo bahatu benga umo.

⁸ Kami ku bali bahatu ba kupaka mu litunga, Moyo na mema na mukeza, nibyo bihatu bikulitabila mu umo.

⁹ Ndi tukutambula wupaki wa bantu, wupaki wa Nyambi wawunene kupitakana niwo. Ndaba ou wenga wupaki wa Nyambi ou wapakile ndaba ya Mwanendi.

¹⁰ Ou ukukulupila muli Mwana Nyambi uli na wupaki mumwendi. Ou ukubula kukulupila muli Nyambi unamwingishi mukamakula, ndaba ukubula kukulupila wupaki ou Nyambi apakile kuli Mwanendi.

¹¹ Kami ou wupaki, ngayi Nyambi unatupana wumi wa mwaya myaka na wumi ou uli muli Mwanendi.

¹² Ou uli na Mwana uli na wumi ou ukubula Mwana Nyambi wufwawo wumi.

Wumi wa mwaya myaka

¹³ Byuma ebye natikiti kukwenu enu mu kukulupila mu lizina lya Mwana Nyambi, ngayi mulimuke ngayi muli na wumi wa mwaya myaka, ngayi mukulupile ha lizina lya Mwana Nyambi.

¹⁴ Niko kutemba tuli nakwo mumwendi ngayi, ndi tukulomba shuma shamina ngo shamutima wendi, ukutuyuvwa.

¹⁵ Kami ndi tukulimuka ngayi ukutuyuvwa, shuma nimwasho tukulomba, tukulimuka ngayi tuli na byuma ebye tunalomba kukwendi.

¹⁶ Ndi muntu uku mona kawushinda wendi hatenda wubi kaliha wubi wakutwala ku kufwa, ukalomba, kami niye ukamupanika wumi wabo aba bakubula kutenda wubi wakutwala ku kufwa. Ku wuli wubi wakutwala ku kufwa, nifwako kwamba ngayi uku fwanina kuwu lombela.

¹⁷ Nimwabyo bya kutengama byenga wubi, kami ku wuli wubi wakubula kutwala ku kufwa.

¹⁸ Tukulimuka ngayi nimwendi unahemuwu kuli Nyambi wufwako kutenda wubi, ngoboni ou unahemuwu kuli Nyambi ukulikoweza mwine, Mukawubi wufwako kumukuntula.

¹⁹ Kami tukulimuka ngayi etu tuli bantu ba Nyambi kami kaye nimwako kali mu ngovu za mukawubi.

²⁰ Kami tukulimuka ngayi Mwana Nyambi unezi, unatupana ku yuvwishisha ngayi tulimuke ou wa kupwisha, kami tuli mumwendi ou wa kupwisha, hinge muli Mwanendi Yeshu Kilishitu mwine. Niye Nyambi wa kupwisha, ou niwo wumi wa mwaya myaka.

²¹ Bana bami babashe, likowezenu enubene ku tunankishi.